დავით ნარმანიამ უარყო გავრცელებული ბრალდება და არასაპარლამენტო ოპოზიციური წარმომადგენლებისგან ბოდიშის მოხდა მოითხოვა. მისი განცხადებით, ის დაასახელებს იმ პოლიტიკური ლიდერების ვინაობას, რომლებმაც პირადად წაიღეს ნარმანიას კაბინეტიდან თვითმმართველობის კოდექსები.
“შემიძლია დავასახელო რამდენიმე მათგანი, რომელთანაც თვითმმართველობის კოდექსის პროექტზე საუბარი პირადად მქონდა და ასეთი განცხადებები მათი მხრიდან მხოლოდ პოლიტიკური დივიდენდების მისაღებად კეთდება. თუ ისინი საჯაროდ არ მოიხდიან ბოდიშს, მე დავასახელებ იმ პოლიტიკური ლიდერების სახელებს და გვარებს, რომლებმაც ჩემი კაბინეტიდან თვითმმართველობის კოდექსები წაიღეს,“ _ განაცხადა ნარმანიამ.
12 პარტიული ერთობის მიერ გავრცელებულ განცხადებაზე ხელი აქვს მოწერილი “ახალ მემარჯვენეებსაც”. “გურია ნიუსი” დავით ნარმანიას განცხადებაზე კომენტარის გასაკეთებლად პარტიის ერთ-ერთ ლიდერ მანანა ნაჭყებიას დაუკავშირდა.
“ბატონი დავით ნარმანია თავის ამ განცხადებით სწორედ იმას ადასტურებს, რის გამოც ჩვენ ხელისუფლებას ვაკრიტიკებთ. კულუარულად რომ უწევდა გარკვევა, რა ხდებოდა ამ კანონპროექტთან დაკავშირებით, ხან მინისტრისგან რომ ცდილობდა და ცდილობს ოპოზიცია ინფორმაციის მოპოვებას, ხან სხვა სახელმწიფო მოხელეებისგან, მაგას ვჩივით სწორედ. პროცესი ჩაკეტილად წარიმართა, კანონპროექტის შემუშავებაში მონაწილეობა არ მიუღიათ ქვეყანაში მოქმედ პოლიტიკურ ძალებს, თამაშის წესები ჯერაც არ იციან იმ მოთამაშეებმა, ვინც „აქტიორები“ უნდა იყვნენ არჩევნებშიც და მას მერეც – საკრებულოებში. კანონპროექტი არ შეთანხმებულა და ექსპერტიზა არ გაუვლია საერთაშორისო ორგანიზაციებში, როგორც ამას ევროპულ ქარტიაზე ჩვენი ოფიციალური ხელმოწერა გვავალდებულებს. კანონპროექტი ოფიციალურად ვებ–გვერდზე დაიდო და მაშინათვე იქნა ინიცირებული პარლამენტში. ერთია კანონპროექტის შემუშავებაში მონაწილეობა და მეორეა უკვე შემუშავებულის განხილვაში ფორმალურად მონაწილეობა. ამაზეა აქ საუბარი სწორედ და ეს მიგვაჩნია ცუდ პრაქტიკად. ასეთი ტიპის დოკუმენტები ერთი კოალიციის, თუნდაც მმართველი კოალიციის კუთვნილება არ არის, მასზე მუშაობა და მსჯელობა აუცილებელია პოლიტიკურ პარტიებთან და ადგილობრივი თვითმმართველობების წარმომადგენლებთან ერთად. ამას ვუკიჟინებდით „ნაციონალურ მოძრაობას“ და ეს ისევ პრობლემად დარჩა ჩვენს ქვეყანაში. მგონია, რომ ბატონ დავითს ეს კარგად ესმის თავისი გამოცდილებიდან გამომდინარე,” _ უთხრა ნაჭყებიამ “გურია ნიუსს”.
