შეგახსენებთ, რომ გუშინ სოფელ ხურვალეთის განაპირას, რუსმა ე.წ. მესაზღვრეებმა ორი ქართველი დააკავეს. არსებული ინფორმაციით, 24 წლის მალხაზ ვანიშვილი და 28 წლის გოჩა მაყიშვილი ცხინვალის მილიციის წინასწარი დაკავების იზოლატორში არიან გადაყვანილი. ორივე მათგანი მავთულხლართებთან ახლოს გუშინ საღამოს დააკავეს. ამასთან, გუშინვე, რუსმა ოკუპანტებმა ქარელის რაიონის სოფელ ღოღეთში ე.წ. საზღვრის აღმნიშვნელი ბანერები დაამონტაჟეს. ორი დღის წინ კი, გამყოფ ხაზთან მდებარე სოფელ ბერშუეთის განაპირას, ოსური მხარის კონტროლირებადი ტერიტორიიდან სასოფლო-სამეურნეო ტექნიკა გამოჩნდა და ქართული მხარის კონტროლირებად ტერიტორიაზე, ბერშუეთის მკვიდრ გიორგი ხოდელის კუთვნილი ნაკვეთის დამუშავება დაიწყო.
შინაგან საქმეთა სამინისტროს საინფორმაციო-ანალიტიკური დეპარტამენტის ხელმძღვანელი დავით სუჯაშვილი “გურია ნიუსთან” საუბრისას აცხადებს, რომ ოკუპაციის ხაზის მიმდებარე სოფლებში ამ დროისათვის სტაბილური ვითარებაა. თუმცა, ბოლო შემთხვევებმა იქ მაცხოვრებლებზე გარკვეულწილად ფსიქოლოგიური ზეგავლენა იქონია.
“იცით, რომ გარკვეული სოფლების მიმართულებით ჩვენი მოსახლეობის ნიადაგზე რუსულმა მხარემ ე.წ. საზღვრის აღმნიშვნელი ბანერები დაამონტაჟა, რამაც გარკვეულწილად ფსიქოლოგიური ზეგავლენა იქონია ადგილობრივ მოსახლეობაზე.
გარდა ამისა, გუშინ 2 მოქალაქე იყო დაკავებული. ერთ-ერთი მათგანი დავით ვანიშვილის შვილიშვილია. დავით ვანიშვილი კი სწორედ ის პიროვნებაა, რომელსაც მავთულხლართების გაყვანის შედეგად პრობლემა უშუალოდ შეეხო და პრესასთან და დიპლომატებთან ყოველთვის ღიად საუბრობს ხოლმე. მისი შვილიშვილის დაკავებით ახორციელებენ მასზე ზეწოლას.
ამის საწინააღმდეგოდ ჩვენ აქტიურად ვაგრძელებთ შეხვედრებს საქართველოში აკრედიტებულ დიპლომატებთან, ჩვენი პარტნიორი ქვეყნების წარმომადგენლებთან, აგრეთვე, გავზარდეთ ჩვენი ქვედანაყოფების პატრულირების ინტენსივობა,” _ ამბობს სუჯაშვილი.
ამასთან, იგი ოკუპანტების ბოლო ქმედებებსა და ვილნიუსის სამიტის თარიღის მოახლოებას შორის პარალელების გავლებას ერიდება.
“პარალელების გავლებისგან თავს შევიკავებდი. უბრალოდ ვიტყვი, რომ საქართველოს ტერიტორია არის ოკუპირებული და პროვოკაციები მოსალოდნელია. თუმცა, არ გამოვრიცხავ რომ სწორედ საქართველოს ევროკავშირთან დაახლოების პროცესის პარალელურად, ამ მიმართულებით რუსეთი გააქტიურდეს,” _ უთხრა “გურია ნიუსს” სუჯაშვილმა.
აღნიშნულ საკითხზე კომენტარი დღეს თავდაცვის მინისტრმა ირაკლი ალასანიამაც გააკეთა და განაცხადა, რომ რუსეთის მხრიდან ვერც ერთ ხელისშემშლელ ქმედებას საქართველოს ევროკავშირთან ასოცირების ხელშეკრულების პარაფირებაზე ხელის მოწერის პროცესში ვერანაირი შედეგი ვერ ექნება.
“ჩემი აზრით, მთელი მსოფლიო, მათ შორის, ევროკავშირი არის კიდევ უფრო მხარდამჭერი საქართველოსი, როდესაც ხდება კონფლიქტის ზონაში ასეთი ინცინდენტები და როდესაც რუსეთი უგულებელყოფს ყველა შეთანხმებას, რომელზეც მას ხელი აქვს მოწერილი. აქედან გამომდინარე, რუსეთის მხრიდან ვერც ერთ ხელისშემშლელ ქმედებას საქართველოს ევროკავშირთან ასოცირების ხელშეკრულების პარაფირებაზე ხელის მოწერის პროცესში ვერანაირი შედეგი ვერ ექნება,” _ განაცხადა ალასანიამ.
პოლიტოლოგი კორნელი კაკაჩია “გურია ნიუსთან” აღნიშნულ საკითხზე კომენტირებისას აცხადებს, რომ რუსეთის ამ ქმედებებში ახალი არაფერია.
“რუსეთი აგრძელებს იმისკენ მიმართულ პოლიტიკას, საქართველოს რაღაცნაირად აგრძნობინოს, რომ იგი ჯერ კიდევ მნიშვნელოვანი აქტიორია ჩვენს ქვეყანაში. მიუხედავად იმისა, რომ თითქოს დაკარგა პირდაპირი გავლენა ქართულ პოლიტიკაზე, მას ჯერ კიდევ აქვს ზეგავლენის ბერკეტები. თუნდაც, კონფლიქტურ რეგიონებში და მისი ეს ბოლო თავხედური ქმედებები ამის აშკარა გამოხატულებაა. ეს ყველაფერი გამოწვევასავით არის, ანუ თუ მოხერხდა ქართული საზოგადოების გამოწვევა, ასეთ პროვოკაციებზე რაღაც პასუხის გაცემა და მერე თუ ამაზე მოხდება ძირითადად აპელირება და აქ უკვე აბსოლუტურად მეორე ხარისხოვანი გახდება ვილნიუსი და ა.შ.” _ ამბობს კაკაჩია.
ამასთან, მიიჩნევს, რომ ბოლო ქმედებები დიდი პრობლემა მაინც არაა, მაგრამ მსგავსი ხასიათის და უფრო რადიკალური ღონისძიებები შესაძლოა მომავალი წლისთვის, სექტემბრამდე განხორციელდეს, როდესაც ასოცირების ხელშეკრულების ხელმოწერის საკითხი რეალურად დადგება. პოლიტოლოგის თქმით, იმ დროისათვის რუსეთმა სხვა მექანიზმებიც შეიძლება გამოიყენოს, როგორიცაა ეკონომიკური სანქციები და ა.შ.
“შეიძლება ითქვას, რომ ეს ერთგვარი მსუბუქი გაფრთხილება იყო რუსეთის მხრიდან ვილნიუსის სამიტამდე რამდენიმე დღით ადრე. რთულია იმის თქმა, ეს რუსეთმა გააკეთა თუ ერთობლივად მან და ცხინვალის მარიონეტულმა ხელისუფლებამ, მაგრამ ფაქტია, რომ ისინი სინქრონულად მოქმედებენ და ეს დაახლოებით, შეიძლება იყოს გაფრთხილება თუ რა პროცესები შეიძლება განვითარდეს თუ საქართველო არ გადაუხვევს იმ გეზს, რაც აღებული აქვს,” _ უთხრა კაკაჩიამ “გურია ნიუსს”.
“საქართველოს რეფორმების ასოციაციის” ხელმძღვანელი, საგარეო საქმეთა მინისტრის ყოფილი მოადგილე სერგი კაპანაძე მიიჩნევს, რომ ბოლო დღეებში ოკუპაციის ხაზთან განხორციელებული ქმედებებით, რუსეთი “კუნთებს გვაჩვენებს”.
“რუსეთის ქმედებების შემდეგ, რასაც ის აღმოსავლეთ პარტნიორობის ქვეყნებში აკეთებს, ეს მოსალოდნელი იყო და ამაში არაფერი განსაკუთრებული არ არის. დიდი ხნის განმავლობაში ანონსდებოდა ასეთი ტიპის ქმედებები. შეიძლება ზოგს არ ეგონა, რომ რუსეთის მხრიდან დამოკიდებულება ასეთი მკაცრი იქნებოდა, მაგრამ ეს ზუსტად ასახავს იმას, რაც ხდება კრემლში და როგორ უყურებს ის თავის მეზობლებს. იგივე ხალხი იღებს ამ გადაწყვეტილებებს, ვინც თავის დროზე საქართველოსთან ომის დაწყების გადაწყვეტილება მიიღო. ასე რომ, ამაში რაღაც განსაკუთრებული არაფერია, მაგრამ ჩვენთვის მნიშვნელოვანია და კარგი გაკვეთილია ის, რაც უკრაინაში ხდება.
უკრაინაში გამოჩნდა, რომ რუსეთი ყველაფერზეა წამსვლელი და ძალიან დიდი ფასი შეიძლება დაადოს ქვეყნის ევროინტეგრაციის გზას. რა თქმა უნდა, ჩვენ ცოტა განსხვავებულ მდგომარეობაში ვართ, რადგან რუსეთს ჩვენზე, საბედნიეროდ, ზემოქმედების იმდენი ბერკეტი აღარ აქვს, რამდენიც ვთქვათ, უკრაინაზე, მოლდოვასა და სომხეთზე. იმიტომ, რომ ყველა ეს ბერკეტი ჩვენზე უკვე გამოცდილი აქვს – ომით დაწყებული და ხალხის გამოდევნით დამთავრებული. თუმცა, მაინც არ უნდა გვქონდეს ილუზია იმისა, რომ რაკი ბერკეტები აღარ აქვს, ჩვენთან უფრო, ასე ვთქვათ, მოქნილი იქნება. კიდევ დარჩა რუსეთს საკმაო რაოდენობის ბერკეტი – იგივე, გაზრდილი ეკონომიკური დამოკიდებულება რუსეთზე, შესაძლოა, ჩვენს წინააღმდეგ იქნას შემოტრიალებული ისე როგორც არასოდეს. ასევე, გაზრდილი ენერგეტიკული დამოკიდებულება. ამასთან, არ უნდა დაგვავიწყდეს, ჩვენი რამდენი მოქალაქე ცხოვრობს რუსეთში და საჭირო შემთხვევაში ამას როგორ გამოიყენებს კრემლი,” _ აცხადებს კაპანაძე.
ამასთან, იგი აბაშიძე-კარასინის მოლაპარაკებების შესახებ აღნიშნავს, რომ სავაჭრო-ეკონომიკური კუთხით მოლაპარაკებები რუსეთს საქართველოსთან მიმართებაში ზეგავლენის არანაირ ბერკეტებს არ მისცემს, “თუკი დიალოგის ფარგლებში არ იქნა ისეთი რამ შეთანხმებული, რაც ბერკეტს წარმოადგენს, თორემ საუბარი არაფერს არ აფუჭებს, მთავარია, საუბრის დროს რაზე არის შეთანხმება”.
“ქართული პროდუქციის დიდი კი არა, მცირე ნაწილიც რომ გადაინაცვლებს რუსულ ბაზარზე, ესეც უკვე ბერკეტია კრემლის ხელში, რადგან აქ ათეულ მილიონობით ლარიანი ვაჭრობაც კი უკვე შეიძლება ბერკეტად იქნას გამოყენებული. ფრთხილად უნდა ვიყოთ.
არ მგონია, ამ სავაჭრო-ეკონომიკური ურთიერთობების გაღრმავება ბოლომდე გონივრული იყოს, თუ ეს დამოკიდებულება ისეთი იქნება, რომ საბოლოოდ ჩვენთვის უარყოფითი აღმოჩნდება,” _ უთხრა “გურია ნიუსს” სერგი კაპანაძემ.
