“2002 წელს ი. გ. და გ. თ. დაქორწინდნენ, (ინიციალები არ შეესაბამება მათ ნამდვილ სახელ და გვარს) ცხოვრობდნენ გ. თ-ის მშობლების სახლში. დაქორწინებიდან მეორე თვეში გ. მეუღლეს აყენებდა, როგორც სიტყვიერ ასევე ფიზიკურ შეურაცხოფას. სცემდა 2 თვის ფეხმძიმეს. მიზეზი ასეთი ქცევის იყო პათოლოგიური სიმთვრალე. ი-ს უგინებდა მშობლებს, რასაც ის არ ითმენდა, რის გამოც არაერთხელ გახდა ფიზიკური ძალადობის მსხვერპლი. მათ შეეძინათ პირველი შვილი. 3 თვის იყო ბავშვი, როცა ი.გ- პირველად წამოვიდა ქმრის ოჯახიდან, მალევე მეუღლემ მიაკითხა დეიდაშვილთან-თან ერთად და ბავშვი წაიყვანეს, მეორე დღესვე დედამ ბავშვს მიაკითხა და მოხდა მეუღლეების შერიგება.
პერიოდულად გ.თ. ნორმალურად ექცეოდა ი.გ.-ს, მაგრამ ეს იყო მხოლოდ გარკვეული დღეების განმავლობაში. ხშირად მას ისევ სიტყვიერ და ფიზიკურ შეურაცხყოფას აყენებდა ქმარი.
მეორე გაშორება მოხდა 2005 წელს, ამჯერად ი. გ. 9 თვე მშობლებთან ცხოვრობდა, ამ ხნის განმავლობაში გ.თ. სისტემატიურად მოდიოდა მასთან, ამ პერიოდში მან დაჭრა ი. გ.-ს მამა, ეს ფაქტი მაშინ ოჯახმა დაუმალა სამართალდამცავებს, იმის იმედით, რომ მათი შვილი შეურიგდებოდა მეუღლეს. ი.გ. როგორც მსხვერპლი ვერ აცნობიერებდა , რომ ძალადობის მსხვერპლი იყო, ეშინოდა, რომ მეუღლე კიდევ გამოამჟღავნებდა თავისი ოჯახის წევრების მიმართ აგრესიას, ამიტომაც ამჯობინა კონფლიქტური სიტუაცია შერიგებით გადაეჭრა. 2006 წელს დაბრუნდა მეუღლის ოჯახში. მათ მეუღლის მშობლებმა შეუძინეს ბინა, სადაც წყვილი ცალკე გადავიდა საცხოვრებლად. 2008 წელს შეეძინათ მეორე შვილი, რადგანაც ი. გ. -ს ორი შვილის გაზრდაში დამხმარე არ ჰყავდა უფროსი ბავშვი გასაზრდელად დედას ნ. გ-ს მიაბარა ს. დვაბზუში.
ი.გ-მ მეუღლე არჩევანის წინაშე დააყენა, მან მოსთხოვა სმისთვის თავი დაენებებინა, წინააღმდეგ შემთხვევაში ის საბოლოოდ გაშორდებოდა და მშობლებთან გადავიდოდა საცხოვრებლად. გ.თ-მ ოჯახის შესანარჩუნებლად შეთავაზებაზე თანხმობა განაცხადა და ცდილობდა ალკოჰოლისაგან თავი დაეღწია, რაც ვერ შეძლო.
2010 წლის 11 ოქტომბრიდან ი.გ ბავშვებთან ერთად მშობლების სახლში საცხოვრებლად გადავიდა. ამ დღიდან ი.გ. მეუღლესთან გაცილებულად თვლის თავს,” _ განაცხადა ჟურნალისტებთან საუბრის დროს ქეთევან ხიდაშელმა.
2011 წლიდან დაწყებული დღემდე ოჯახი არაერთხელ გახდა გ.თ-ის მხრიდან ფიზიკური და ფსიქოლოგიური ძალადობის მსხვერპლი. ამ ხნის განმავლობაში მოხდა პოლიციის რეაგირება ფაქტზე, გამოიწერა შემაკავებელი ოქმი. შემდეგ გამოიცა დამცავი ორდერი, რომლის მიხედვითაც მოძალადეს აეკრძალა ი-სა და მისი ოჯახის წევრებთან მიახლოვებაც კი 6 თვის განმავლობაში.
2012 წელს ი. გ. მუშაობა დაიწყო ქობულეთში ერთ-ერთ კომპანიაში, სადაც დღემდე მუშაობს და ეს სამსახური მისთვის ერთადერთია, რითაც იგი თავის ორ მცირეწლოვან შვილს ინახავს. მისი ყოფილი მეუღლე ი.გ-ს აიძულებს სამსახურს თავი დაანებოს.
“ის ამისათვის იყენებს ისეთ მეთოდებს როგორიცაა: მძღოლებს, რომლებსაც ი.გ. დაჰყავს სამსახურში აშანტაჟეს, ემუქრება (აგიფეთქებ მანქანას, დაგიჩეხავ მგზავრებს, შეგივარდები ბორბლებში), ამის მომსწრე არიან მგზავრებიც. მასთან პირადი გასაუბრებისას მძღოლმა დაადასტურა მსგავსი სახის მუქარების ნამდვილობა, თუმცა პოლიციისთვის მიმართვას არ აპირებს, მისი პასუხი ასეთი გახლდათ: მართლაც რომ შეასრულოს მუქარა, რა, თქვენ ამინაზღაურებთ ზარალს? თქვენ მსხვერპლიც კი ვერ დაგიცვიათ და მე რას დამიცავთო. ის 2012 წლის 12 დეკემბერს დახვდა სამარშუტო ტაქსს ქობულეთის ტარეიტორიაზე, რომლითაც მგზავრობდა ი.გ. თავის 9 წლის შვილთან ერთად, გ.თ-მ გააჩერა ტაქსი და ძალით ჩაათრია მეუღლე, სასტიკად გაუსწორდა მას. არც მძღოლს და არც მგზავრებს აზრად არ მოსვლიათ გამოეძახათ პოლიცია. ნაცემი სახლში თავისი ფეხით მივიდა და თავად გამოიძახა პოლიცია, მიუხედავად იმისა, რომ მას უკვე დამცავი ორდერი ეჭირა ხელთ, პოლიციამ არ გააფორმა აქტი მომხდარის თაობაზე, ი.გ.-ს ჯანმრთელობის გაუარესების გამო მეორე დღეს მიმართა ოზურგეთის სამედიცინო კლინიკას, სადაც მას პირადად ვახლდი მე, ავიღეთ ფორმა #100 , საქმე მოძალადის მიმართ აღიძრა ქობულეთის პოლიციის სამმართველოში, სადაც მოხდა ი.გ.-ს დაკითხვა. ამ ფაქტის შემდეგ ჩვენი ორგანიზაცია ჩართულია რეაგირების პროცესში, თუმცა ვერანაირ შედეგს ვერ მივაღწიეთ, წერილობით მივმართეთ ქობულეთის პოლიციის განყოფილებას, თუ რა ეტაპზე იყო გამოძიება, ასევე წერილობით მივიღეთ პასუხი, რომ საქმე დაიხურა. წერილში არ იყო მინიშნებული თუ რა მიზეზით დაიხურა ი.გ-ს საქმე.
მე პირადად შევხვდი მთავარ პროკურატურაში ადამიანის უფლებათა დაცვის განყოფილების უფროსს ქ-ნ მაია კვირიკაშვილს, შეხვედრაში მონაწილეობდა ასევე შინაგან საქმეთა სამინისტროს თანამშრომელი მაკა ფერაძე, ძალადობისაგან დაცვის ეროვნული ქსელის ხელმძღვანელი ქ-ნი ელისო ამირეჯიბი. საქმეს დეტალურად გავეცანით, იყო დაპირება უფრო სერიოზულობით მოეკიდებოდნენ საქმეს, თუმცა რეალობა სხვაგვარია. გამომძიებელი, რომელიც პირადად იძიებს აღნიშნულ საქმეს, ვატყობთ საქმეში დაინტერესებული პირია, რომელიც მიზანმიმართულად არ აკეთებს არაფერს მოძალადის საწინააღმდეგოდ, ჩვენი ორგანიზაცია ითხოვს ამ გამომძიებლის აცილებას.
ახლა არის გენდერული ძალადობის კვირეული, ასეთი ფაქტების მიმართ მეტად მგრძნობიარე უნდა იყოს საზოგადოება, პოლიცია და ყველა სხვა სტრუქტურა, რომელსაც ამ პრობლემის გადაწყვეტა შეუძლია.
გვინდა მეტი სიცხადე შევიტანოთ იმაში, თუ რატომ არ მუშაობს კანონი ოჯახური ძალადობის შესახებ ოზურგეთში. მოძალადე ისევ თავაშვებულია, მასზე მოქმედებს დაუსჯელობის სინდრომი, დაუცველია მსხვერპლი. მიჩნდება ლოგიკური კითხვა, ამ კონკრეტულ შემთხვევაში რა უშლის ხელს კანონის აღსრულებას, სად არის პრობლემა, სისტემის რომელ რგოლში? იქნებ საკანონმდებლო ხარვეზთან გვაქვს საქმე, ან სამართალდამცავების არაკომპეტენტურობასთან ან კიდევ ინტერესთა კონფლიქტთან?” _ კითხულობს ქეთევან ხიდაშელი.
შეხვედრას ასევე ესწრებოდა “საქართველოს ახალგაზრდა იურისტთა ასოციაციის” ოზურგეთის ოფისის ხელმძღვანელი თამაზ ტრაპაიძე.
“ჩვენ პერიოდულად ამ საქმესთან დაკავშირებით მოგვმართავდნენ და იურიდიულ კონსულტაციებს ვუწევდით. ნაბიჯ-ნაბიჯით ყველა სამართლებრივი სტადიაა გავლილი. სამწუხაროდ, როგორც ირკვევა მსხვერპლს ხელი აქვს მოწერილი დოკუმენტზე, რომელსაც დაახლოებით შემდეგი შინაარსი აქვს: “ის აღარ უჩივის მეუღლეს, მისი ციხეში ჩასმის სურვილი არ აქვს, ოღონდ მას თავი დაანებოს”. შესაძლოა ამ ქალბატონმა თქვა, რომ ყოფილი მეუღლის დაჭერა მას არ აინტერესებდა, ოღონდ მასზე ძალაობა აღარ გაგრძლებულიყო. როგორც პროკურატურაში დავადგინეთ, საქმეში სწორედ ეს ხელმოწერილი დოკუმენტი დევს და მის საფუძველზე შეწყვიტეს სისხლის სამართლის საქმე.
რაც შეეხება სამართლებრივი მდგომარეობას დღეისთვის _ უკვე იყო დამცავი ორდერი და შემაკავებელი ოქმი გაცემული. ერთხელ ქობულეთის ტერიტორიაზე მოხდა დამცავი ორდერის ზემოქმედების პერიოდში მისი დარღვევა და სისხლის სამართლის საქმე აღიძრა, მაგრამ დაიხურა, ამის შესახებ უკვე მოგახსენეთ. ამის შემდეგაც იყო ოჯახური ძალადობის ფაქტები. დღევანდელი ინფორმაციით, კიდევ გაიცემა დამცავი ოქმი და თუ კი ამ დამცავი ორდერის პერიოდში კიდევ მოხდა ძალადობა, მაშინ სისხლი სამართლის საქმე აღიძრება,” _ განაცხადა თამაზ ტრაპაიძემ.
