სხდომა მისასალმებელი სიტყვით პარლამენტის თავმჯდომარემ, დავით უსუფაშვილმა გახსნა. იგი სხდომის მონაწილეებს და მოწვეულ სტუმრებს პარლამენტის სახელით მიესალმა და ღონისძიების მნიშვნელობაზე ისაუბრა. მისი განცხადებით, ის, რომ დღევანდელ სხდომას საქართველო მასპინძლობს მნიშვნელოვანი მიღწევაა, ვინაიდან სუამ-ის ორგანიზაციის შექმნა და მისი მოღვაწეობა წლების განმავლობაში საქართველოს ერთ-ერთი პრიორიტეტი იყო.
“მოხარული ვარ, რომ ამ ორგანიზაციამ საფუძველი ჩაუყარა მჭიდრო თანამშრომლობას არა მხოლოდ მის წევრ სახელმწიფოებს შორის, არამედ საერთაშორისო ორგანიზაციებს შორის ურთიერთობებს გაცილებით ფართო კონტექსტში. სუამი აღმოჩნდა სიცოცხლისუნარიანი, მიუხედავად იმისა, რომ განვითარების პროცესში გარკვეული დაბრკოლებები იყო”, _ აღნიშნა დავით უსუფაშვილმა. პარლამენტის თავმჯდომარემ კმაყოფილებით აღნიშნა, რომ მიმდინარე წელს საქართველოს ერგო პატივი ყოფილიყო სუამის თავმჯდომარე ქვეყანა და ეს ახალი ხელისუფლების წარმომადგენლებისთვის დიდი პატივი და პრივილეგია იყო. მისასალმებელ სიტყვაში დავით უსუფაშვილი სუამის ქვეყნებისთვის ვილნიუსის სამიტის მნიშვნელობასაც შეეხო.
“სუამის ორგანიზაციაში, როდესაც ჩვენ საწყის თანამშრომლობაზე შევთანხმდით, მაშინ აღინიშნა, რომ ერთად ვივლიდით საერთო მიზნისკენ – დემოკრატიული, განვითარებული, სტაბილური რეგიონის ჩამოყალიბებისკენ, მაგრამ ასევე შევთანხმდით იმაზეც, რომ თითოეულ სახელმწიფოს საკუთარი ინდივიდუალური გზა ექნებოდა ამ მიზნის მისაღწევად. ჩვენ, საქართველოს პარლამენტის წარმომადგენლები, პატივს ვცემთ თითოეული სახელმწიფოს არჩევანს ამ მიმართულებით”, _ განაცხადა დავით უსუფაშვილმა. მან მოლდოველ კოლეგებს სამიტზე მიღებული გადაწყვეტილებები მიულოცა და აღნიშნა, რომ საქართველო, რომელმაც ასევე სასარგებლო შედეგი მიიღო ვილნიუსის სამიტისგან, მოლდოვის სახელმწიფოსთან მჭიდრო თანამშრომლობას გააგრძელებს. პარლამენტის თავმჯდომარე სუამის სხვა ქვეყნების ევროპასთან ინტეგრაციის პროცესსაც შეეხო და განაცხადა, რომ საქართველო პატივს სცემს აზერბაიჯანის მთავრობის გადაწყვეტილებას, რომელმაც ევროპასთან ურთიერთობის გაგრძელება განსხვავებული გზით და ტემპით გადაწყვიტა.
“მინდა განსაკუთრებით აღვნიშნო ის ყურადღება, რომლითაც ჩვენ ვადევნებთ თვალს უკრაინაში მიმდინარე მოვლენებს. გამოვთქვამ ღრმა რწმენას იმისას, რომ პოლიტიკური ძალები და ლიდერები არსებული კრიზისის პოლიტიკური გადაწყვეტილებების გზებს და საშუალებებს გამონახავენ და ხელისუფლების მიერ უკრაინელი ხალხის არჩევანი რეალიზებული იქნება. ჩვენ სოლიდარობას ვუცხადებთ უკრაინელ ხალხს და პატივს ვცემთ მათ არჩევანს, როგორიც არ უნდა იყოს იგი. ვისურვებდით ყველა ეს პროცესი დროზე დაუბრუნდეს იმ ადგილებს, სადაც გადაწყვეტილებებია მისაღები და ჩვენ უკრაინელ ხალხთან ერთად გავაგრძელებთ სვლას თავისუფლებისკენ და ჩვენი სუვერენული არჩევანის რეალიზებისკენ”, _ განაცხადა დავით უსუფაშვილმა.
კონფერენციის მონაწილეებს საგარეო საქმეთა მინისტრი, მაია ფანჯიკიძეც მიესალმა. მან თავის გამოსვლაში ორგანიზაციაში საქართველოს თავმჯდომარეობის პერიოდში მიღწეულ მნიშვნელოვან წარმატებებებს, ასევე ორგანიზაციის მომავალ პრიორიტეტებს გასუვა ხაზი.
მინისტრის განცხადებით, თავმჯდომარეობის პერიოდში საქართველომ ყველა ღონეს მიმართა რეგიონულ ფორმატში თანამშრომლობის გაძლიერების მიზნით.
“ჩვენს პრიორიტეტულ მიზანს სუამის წევრ სახელმწიფოებთან პოლიტიკური თანაქმედების გაძლიერება, ასევე ორგანიზაციის ძირეული პრინციპების, განსაკუთრებით, სოლიდარობისა და კონსენსუსის პრინციპების განმტკიცება წარმოადგენდა. ძლიერი პოლიტიკური ნების გარეშე, ჩვენ ვერ შევძლებდით საერთო გამოწვევებთან ერთობლივად გამკლავებასა და საერთო ინტერესების დაცვას. სუამის პოლიტიკური განცხადებები არასდროს ყოფილა ისეთი ძლიერი, როგორც მიმდინარე წლის განმავლობაში”, _ განაცხადა მაია ფანჯიკიძემ. მინისტრის განცხადებით, საქართველოს თავმჯდომარეობის პერიოდში ერთ-ერთ მთავარ პრიორიტეტს, ასევე წარმოადგენდა სუამის პარტნიორებთან თანამშრომლობის გაძლიერება. მინისტრმა ამ კონტექსტში, ყურადღება გაამახვილა სუამი – ამერიკის შეერთებული შტატებისა და სუამი-იაპონიის თანამშრომლობაზე.
სხდომის გახსნისას მისასალმებელი სიტყვებით კონფერენციის მონაწილეებს აზერბაიჯანის მილი მეჯლისის თავმჯდომარის პირველმა მოადგილემ, ზიაფატ ასკეროვმა, მოლდოვას რესპუბლიკის პარლამენტის თავმჯდომარის მოადგილემ, ოლეგ ბოდრუგმა, უკრაინის ვერხოვნა რადას ვიცე სპიკერმა, რუსლან კოშულინსკიმ, ბალტიის ასამბლეის პრეზიდენტმა, რაიმონდს ვეიონისმა, პოლონეთის რესპუბლიკის პარლამენტის სეიმის მარშალის მოადგილემ, ცეზარ გრაბარჩიკმა და სუამ-ის გენერალურმა მდივანმა, ვალერი ჩეჩელაშვილმაც მიმართეს, რომლის შემდეგაც კონფერენციის მონაწილეებმა საერთო ფოტო გადაიღეს.
სუამ-ის საპარლამენტო ასამბლეის პირველი სხდომა ორგანიზაციის წევრი ქვეყნების გეოპოლიტიკურ გარემოს და სუამის ფორმატში თანამშრომლობის საკითხებს დაეთმო. მომხსენებლებმა საერთაშორისო და რეგიონული უსაფრთხოების მხარდაჭერის სფეროში საპარლამენტთაშორისო თანამშრომლობის როლზე ისაუბრეს და სუამ-ის საზღვრებში არსებული კონფლიქტები და რეგიონულ და საერთაშორისო მშვიდობაზე მათი ზეგავლენა მიმოიხილეს. გამოსვლების შემდეგ დისკუსია გაიმართა, რომელიც კითხვა-პასუხის ფორმატით წარიმართა.
პირველი სხდომის მეორე ნახევარი პოლიტიკური ურთიერთობებისა და ევროპული და ევროატლანტიკური ინტეგრაციის საკითხების მიმოხილვას დაეთმო. სესიას საქართველოს პარლამენტის საგარეო ურთიერთობათა კომიტეტის თავმჯდომარის პირველი მოადგილე, ზვიად კვაჭანტირაძე თავმჯდომარეობდა. ევროპასთან ინტეგრაციის კომიტეტის თავმჯდომარემ, ვიქტორ დოლიძემ განაცხადა, რომ “სუამი არ არის მხოლოდ ორგანიზაცია, ესაა ის სტრუქტურა, რომელიც სტრატეგიულ ურთიერთობებზეა გათვლილი, რეგიონული და ევროუსაფრთხოების დაცვისათვის, რაც უმნიშვნელოვანესია ევროინტეგრაციის პროცესში”. მან, ასევე, ვილნიუსის სამიტის შედეგებიც შეაჯამა და განაცხადა, რომ ეს აზერბაიჯანის, მოლდოვისა და საქართველოსთვის წინ გადაგმული ნაბიჯია. ვიქტორ დოლიძემ ამ მიმართულებით სამომავლო გეგმებზეც ისაუბრა და განაცხადა, რომ “ევროინტეგრაციის პროცესი, პირველ რიგში ქვეყნის შიგნით ვითარდება და საქართველოს ჯერ კიდევ აქვს შესასრულებელი ე.წ. საშინაო დავალებები, რაც ქვეყნისათვის, მისი თითოეული მოქალაქისათვის სასიკეთოა და დემოკრატიის განვითარებას ემსახურება”.
ევროპული და ევროატლანტიკური ინტეგრაციის საკითხებში გამოცდილება გაუზიარა კოლეგებს ბალტიის ასამბლეის წარმომადგენელმა, ვაინო ლინდემ. პოლონეთ-საქართველოს მეგობრობის ჯგუფის ხელმძღვანელმა, მალგორჟატა გოშიევსკამ სუამ-ევროკავშირის თნამშრომლობის პერსპექტივებზე ისაუბრა.
წარმოდგენილ საკითხებთან დაკავშირებით დისკუსია გაიმართა კითხვა-პასუხის რეჟიმში.
სუამ-ის საპარლამენტო ასამბლეის მეორე სხდომას სუამ-ის გენერალური მდივანი, ვალერი ჩეჩელაშვილი უძღვებოდა. სხდომის მთავარი თემა იყო დარგობრივი თანამშრომლობის პერსპექტივები, გლობალური გამოწვევები და ერთობლივი ნაბიჯები. გამომსვლელებმა ისაუბრეს სუამ-ის ეკონომიკური პოტენციალისა და სუამ-ის თავისუფალი სავაჭრო სივრცის, საერთო ბაზრისა და სუამ-ის სატრანსპორტო კორიდორის პროექტების განხორციელების პერსპექტივებზე. სხდომაზე განსაკუთრებული ყურადღება გამახვილდა ენერგეტიკის საკითხში თანამშრომლობაზე და ამ სფეროში არსებულ შესაძლებლობებსა და ინიციატივებზე, განახლებადი ენერგიის განვითარებასა და მისი ბაზარზე დანერგვის პერსპექტივებზე.
გამომსვლელებმა ისაუბრეს გარემოსა და ბუნების დაცვის, ასევე ბუნებრივი რესურსების ათვისების ერთობლივ პროექტებზე. სხდომის მონაწილეებმა ერთმანეთს გამოცდილება გაუზიარეს კიბერ-უსაფრთხოებასთან და საერთაშორისო და ორგანიზებული დანაშაულის წინააღმდეგ ბრძოლასთან დაკავშირებით.
სუამ-ის საპარლამენტო ასამბლეა მუშაობას დღეს გააგრძელებს.
