“გურია ნიუსი” არაერთ გლეხს, მანდარინით მოვაჭრე კერძო პირს თუ ხელისუფლების წარმომადგენელს შეხვდა, თუმცა, საქმეს არც თუ კარგი პირი უჩანს. ხალხი გაღიზიანებული და გაბრაზებულია, ზოგი პირდაპირ ბიძინა ივანიშვილისკენ იშვერს ხელს, არაფერს ვავალდებულებთ, მაგრამ ციტრუსოვანთა გასაღების თაობაზე რასაც გვპირდებოდა, იმის ნახევარი მაინც შეასრულოსო.
ოზურგეთის ცენტრში, აბაშიძის ქუჩაზე ყოველდღიურად ხდება ციტრუსოვანთა ნაყოფის ჩაბარება კერძო პირთა მიერ. აქ სოფლებიდან ხალხს ჩამოაქვს მანდარინი, ზოგს ტომრებით, ზოგს ყუთებით და ცდილობენ, როგორმე რამდენიმე თეთრით მეტი ფასით ჩააბარონ საკუთარი მოსავალი.
“რა გითხრათ, ვერ ხედავთ, რა დღეში ვართ? კონჭკათიდან ძლივს ჩამოვათრიეთ ეს ტომრები. შავ დღეში ვართ, ეს მანდარინიც გაშავდა ჩემი ცოდვით. 30 თეთრად კილოგრამი მანდარინის ჩაბარება, გადაყრაზე უკეთესი რითია? ლიმონი კიდევ 35 თეთრი ღირს კილოგრამი. ხალხს მკრეფავების ფულის გადახდაც გაუჭირდება. ვინაა პატრონი? რომელ მთავრობაზე მესაუბრებით? მოიყვანეთ და გვიპატრონონ, ჩაგვაბარებინონ ეს მანდარინი. წელს ყველაზე საშინელი მდგომარეობაა, რაც ბოლო წლების მანძილზე გვინახავს,” _ ამბობს “გურია ნიუსთან” სოფელ კონჭკათის მკვიდრი ქეთევან ქუტიძე და კოკისპირულ წვიმაში შორი გზიდან ჩამოტანილ მანდარინით სავსე ტომრებზე მიგვითითებს.
სოფელ ჭანიეთის მკვიდრი კუკური თავაძე უკვე მოკრეფილი და ჯერ კიდევ გასაყიდ 16 ტონა მანდარინზე დარდობს.
“16 ტონა მოვკრიფე და შინ მაქვს. ჯერ ვერავინ ვნახე გამსაღებელი. ერთი ამდენი კიდევ მოსაკრეფი მაქვს. რას შვება მთავრობა? ხომ გვპირდებოდნენ, გზა გაიხსნებაო, ჩაბარება იქნებაო, ფასი აიწევსო… სადაა ეს შეპირებები? ბიძინა ივანიშვილზე უკეთ ვინ იცის ბიზნესის საქმე. ხომ გვპირდებოდა, გზას გავხსნით, ფასს ავწევთო. კი არ ვავალდებულებთ, მაგრამ რაც შეგვპირდა, ნაწილობრივ მაინც შეგვისრულოს, ცოდოა ხალხი,”_ ამბობს კუკური თავაძე.
“საკვირველი ისაა, რომ ამბობენ, გურიის გუბერნატორობისთვის დარჩია და ფერსაშვილი ერთმანეთს ლამის დუელში იწვევენო. ახლა თბილისში წასულან, არა მე დამნიშნე და არა – მეო. ჩვენთვის გაიქეცით, თქვე მამაცხონებულებო, მაგ თბილისში და გაგვასაღებინეთ ეს მანდარინი, შარშანდელივით კიდევ ღელეები ავავსოთ და წელში გავწყდეთ ამის გადაყრით?” _ აცხადებენ “გურია ნიუსთან” საუბრისას ნატანებელი, კონჭკათელი და მერიელი მეციტრუსეები, რომლებიც ოზურგეთის ცენტრალურ ქუჩაზე თითქმის ყოველდღღე დგანან და მყიდველს ეძებენ.
განსაკუთრებით აშფოთებთ ძლივს ნაპოვნი ჩამბარებლისგან შეთავაზებული კილოგრამი მანდარინისა თუ ლიმონის ფასი, რომელიც ძალიან კარგი ხარისხის შემთხვევაშიც, 30-35 თეთრს არ სცილდება. ამას დაემატა უამინდობაც, 3 დეკემბერს გურიაში, კონკრეტულად ოზურგეთში მოსულმა სეტყვამ მოუკრეფავი მანდარინი საგრძნობლად დააზიანა და ხალხი ახლა კომპენსაციაზეც ალაპარაკდა, თუ კახეთში ყველა თავს ევლება დაზარალებულ გლეხს, ჩვენ რომ ტონობით მანდარინი ხშირად გადასაყრელი გვიხდება, რატომ არავინ არაფრად აგდებს ჩვენს გასაჭირსო.
“გურია ნიუსს” ესაუბრა სოფელ მერიის საკრედიტო კავშირის თავმჯდომარე, ამავე სოფლის მკვიდრი ვახტანგ ბაქანიძე, რომელსაც ათეულობით ტონა მანდარინი უკვე მოკრეფილი აქვს, თუმცა, მყიდველი არავინაა.
“1500 ლარი მარტო მომხმარე მუშა ხელისთვის მაქვს მისაცემი. დანარჩენი ხარჯი სხვაა. ჯერ არავინაა, არც ჩამბარებელი, არც მყიდველი. გასულ წელსაც ცუდი მდგომარეობა იყო, თუმცა, წელს უარესია,” _ ამბობს ვახტანგ ბაქანიძე.
სოფლის მეურნეობის სამინისტროს ოზურგეთის საინფორმაციო-საკონსულტაციო სამსახურის წარმომადგენელი ომარ ჩხარტიშვილი გვეუბნება, რომ ციტრუსოვანი ნაყოფის მიმღები პუნქტი უკვე გაიხსნა და ორ დღეში მიღება დაიწყება ნატანების უბანზე. აქ შესაძლებელი იქნება ორი ათასი ტონა მანდარინის მიღება. აქვე იქნება 300 ტონა მანდარინის ტევადობის საცავი, სადაც ნაყოფს პარაფირება ჩაუტარდება. ასევე იხსნება მიმღები პუნქტები სოფლებში: შრომასა და მერიაში, დაბა ურეკში, საიდანაც შესაძლებელი იქნება რუსეთში გატანა. ასევე, სოფელ ლიხაურშიც უკვე მზადაა და გაიხსნება მიმღები პუნქტი.
ის ფაქტი, რომ ზოგადად ძალიან დაბალია ციტრუსოვანთა ფასი, ყველა აღიარებს და ამბობენ, რომ საბაზრო ღირებულებაა დაბალი და ამას ვერავინ შველის. უნდა იაქტიუროს კერძო სექტორმაც.
საინფორმაციო-საკონსულტაციო სამსახურის უფროსი კახა ჭყონია “გურია ნიუსთან” ამბობს, რომ აღნიშნულ პრობლემასთან დაკავშირებით, 5 დეკემბერს სოფლის მეურნეობის სამინისტროში შეხვედრა აქვს და ინფორმაციას მოგიანებით მოგვაწვდის.
კითხვაზე, მოხდება თუ არა ხელისუფლების მხრიდან სუბსიდირება როგორც სტანდარტულ, ისე არასტანდარტულ მანდარინზე, იგი აცხადებს, რომ ამ თემაზე არის საუბარი, თუმცა ორიოდ დღეში უკვე ზუსტი ინფორმაცია ეცოდინება.
“ორი ათას ტონა მანდარინს ნატანების პავილიონი ჩაიბარებს, 1500 ტონას _ მერიის, 300 ტონას – ურეკის. სოფელ შრომაშიც გაიხსნება მიმღები პუნქტი. ვიცით, რომ რთული ვითარებაა, ხალხის უკმაყოფილებაც რომ დიდია, ესეც ვიცით და ვცდილობთ პრობლემის მოგვარებას. ფასი რომ დაბალია, ამ საკითხზე ვერაფერს გეტყვით, რადგან საბაზრო ღირებულებაა დაბალი და კერძო სექტორმაც უნდა იაქტიუროს. ახლა პრობლემას კიდევ პრობლემა დაემატა, მოვიდა სეტყვა და ბუნებრივია, დაუკრეფავ ბაღებში ზარალი მოიმატებს, რაზეც გლეხი სამართლიანად მოითხოვს კომპენსაციას. ვცდილობთ, როგორმე მაქსიმალურად მოვაგვაროთ ეს პრობლემა. თბილისიდან დაბრუნებისთანავე გიპასუხებთ სასურველ კითხვებზე,” _ უთხრა “გურია ნიუსს” ჭყონიამ.
