უმრავლესობის წევრი ზვიად ძიძუგური ამბობს, რომ პატრიარქთან შეხვედრაზე იმყოფებოდა პარლამენტის თავმჯდომარე, მაგრამ შეხვედრისას თვითმმართველობის კოდექსზე საუბარი არ ყოფილა და აქვე დასძენს, რომ სეპარატიზმის საფრთხის დაბრალება ამ კოდექსზე, დიდი უსამართლობაა.
“საპატრიარქოში შეხვედრა, საქართველოს ხელისუფლების მხრიდან, პარლამენტის თავმჯდომარემ დავით უსუფაშვილმა გამართა. მართალია მე არ ვყოფილვარ საპატრიარქოში, მაგრამ ვიცი, რომ თვითმმართველობის რეფორმაზე საუბარი არ ჰქონიათ. სეპარატიზმის საფრთხის დაბრალება ამ კოდექსისთვის არის უსამართლობა და თუ რომელიმე ორგანო ხედავს ამ საფრთხეს, მზად ვართ გავიაროთ კონსულტაციები”.
“თავისუფალი საქართველოს” ლიდერი კახა კუკავა სესიაშვილს მიმართავს და აცხადებს, რომ კარგი იქნება თუ სესიაშვილი დააკონკრეტებს რას გულისხმობს თავის განცხადებაში. კუკავა ასევე აღნიშნავს, რომ მმართველი კოალიციის ექვსი სუბიექტიდან სამი – “თავისუფალი დემოკრატები”, “ეროვნული ფორუმი” და “მრეწველთა პარტია” ეწინააღმდეგება ამ კანონპროექტს.
“კარგი იქნებოდა ბატონ სესიაშვილს დაეკონკრეტებინა რას გულისხმობს. მთავარი დებულება რასაც აპროტესტებს ეკლესია, ქართული საზოგადოება და ოპოზიციური პარტიები ეს არის რეგიონალური ავტონომიების შექმნა. ჩემთვის ცნობილია, რომ იმ საუბარის შემდეგ, რომელიც შედგა უსუფაშვილსა და პრემიერ-მინისტრს შორის, “რესპუბლიკური პარტია” თანახმაა ყველა შენიშვნის გათვალისწინებაზე, გარდა რეგიონალური ავტონომიების ამოღებისა. სხვა დებულებები და შენიშვნებიც მნიშვნელოვანია, მაგრამ თუ არ იქნა ამოღებული მე-7 კარი, მაშინ სხვა შენიშვნებს გაითვალისწინებს თუ არა “ქართული ოცნება” ნაკლებად მნიშვნელოვანია. მთავარი საფრთხე, რომელიც ემუქრება საქართველოს არის იმ 9 ავტონომიის შექმნა, რომელსაც აპირებენ ამ კოდექსით. თუ სესიაშვილი მზად არის, რომ ამ საკითხზე გაგვცეს პასუხი, კარგი იქნება”.
ადგილობრივი თვითმმართველობის კოდექსის თემა იყო დღეს “ლეიბორისტული პარტიის” წევრ გიორგი გუგავას ბრიფინგის თემაც, სადაც გუგავამ აღნიშნა, რომ თვითმმართველობის კოდექსის გატანას ცდილობს “სოროსული ჯგუფი”, რომელთა შორისაა დავით ნარმანია და ეს ყველაფერი ნოყიერ ნიადაგს შექმნის ქვეყანაში სეპარატისტული ჯგუფების გაძლიერებისთვის.
“ეს პროექტი თავის დროზე მომზადებულია ანტისახელმწიფოებრივ, ანტიმართლმადიდებლურ ორგანიზაციაში, როგორიცაა “თავისუფლების ინსტიტუტი”. ამ კანონპროექტის გატანა დაავალეს “სოროსულ ჯგუფს”, მათ შორისაა ნარმანია, რომელიც მოდის სოროსის ბუდიდან და გაზრდილია სოროსის ფონდებში. ადგილობრივი თვითმმართველობის კანონპროექტი ითვალისწინებს ქვეყნის რეგიონალიზაციას, რაც წააქეზებს სეპარატისტულ მოძრაობებს საქართველოში. ამან შეიძლება გამოიწვიოს ქვეყნის დანაწევრება”.
ოპოზიციის წევრების ამ განცხადებებს გამოეხმაურა უმრავლესობის წევრი თამარ კორძაია, რომელმაც აღნიშნა, რომ ვერაფრით დაეთანხმება ამ კანონის ქვეყნისთვის დამღუპველობას.
“ვერ გავიზიარებ პოზიციას იმასთან დაკავშირებით, რომ ეს კანონი დაიწერა და განიხილა ხალხისგან ფარულად, მე დარწმუნებით შემიძლია გითხრათ, რომ კანონპროექტის ავტორები დადიოდნენ რეგიონებში და ატარებდნენ შეხვედრებს, სადაც სწორედ საზოგადოების ჩართულობით ხდებოდა ამ კოდესქის განხილვა, დღესაც მიმდინარეობს ეს პროცესი. ვერ გავიზიარებ იმ პოზიციასაც, როდესაც ყოველგვარი დასაბუთების გარეშე საზოდაგოებას აწვდიან შემაშფოთებელ ინფორმაციას, თითქოს ეს კანონი გამოიწვევს ქვეყნის დაშლას. ამასთან დაკავშირებით მე არ მომისმენია არც ერთი სერიოზულა არგუმენტი, არც ერთი საქმიანი რეკომენდაცია და სწორედ ამიტომ მაქვს პროტესტის გრძნობა, როცა მესმის, რომ ეს კანონი შეიძლება იყოს დამღყპველი ქვეყნისთვის”.
კორძაიამ აღნიშნა, რომ დღევანდელი ხელისუფლების ერთ-ერთი დაპირება იყო თვითმმართველობის სისტემას საფუძვლიანად გადახედავდა და შეცვლა, რაც აასრულა კიდეც და თვითმმართველობის კოდექსით მნიშვნელოვანი რეფორმების გატარება დაიწყო, რისთვისაც ენდო და აირჩია ხალხმა. კორძაიამ ასევე ისაუბრა ოპოზიციისათვის მიუღებელ მე-7 კარზე და მიმართა ოპონენტებს, რომ ჭეშმარიტებაზე დაფუძნებული არგუმენტებით ისაუბრონ.
“დღევანდელი ხელისუფლება იმიტომ აირჩია ხალხმა, რომ მათგან ელოდებიან მნიშვნელოვან რეფორმებს და ეს არის სწორედ ერთ-ერთი მნიშვნელოვანი რეფორმა. მე მაინტერესებს რომელ კონკრეტულ მუხლში ხედავენ სეპარატიზმის გაღვივების შესაძლებლობას. საუბარია მე-7 კარზე, რომელიც გაერთიანებების საკითხზე საუბრობს, მე-7 კარი ეხება ცენტრალური ხელისუფლების მმართველობის ნაწილს და რას ნიშნავს ეს-რწმუნებული და გუბერნატორი არის ადგილობრივ თვითმმართველობაში ცენტრალური ხელისუფლების წარმომადგენელი, ამ სუბიექტთან იარსებებს გაერთიანებებიც, შესაძლებებია ამ გაერთიანების ფორმა შეიცვალოს და მას მხოლოდ საკონსულტაციო სახე ჰქონდეს. ცენტრალური ხელისუფლება უნდა იყოს თანამშრომლობით კავშირზე ადგილობრივ თვითმმართველობასთან, ცენტრალურ ხელისუფლებას აქვს თავისი ინტერესები რეგიონებში, ადგილობრივ ხელისუფლებას აქვს თავისი ინტერესები. ყველას ახსოვს როგორ მუშაობდა გუბერნატორის ინსტიტუტი, ის ერთპიროვნულად მართავდა ყველაფერს, ადგილობრივი ხელისუფლება ბუნებაში არ არსებობდა, რადგან გუბერნატორები იყვნენ ცენტრალური ხელისუფლებისაგან ხელდასმულები და მათი გადაწყვეტილების გარეშე ვერავითარი გადაწყვეტილება ვერ მიიღებოდა. ამ კანონპროექტით კი გუბერნატორი საკონსულტაციო საბჭოსთან ერთად იქნება თვითმმართველობის ინტერესების წარმომადგენელი ცენტრალურ ხელისუფლებაში და ამ უკანასკნელის ინტერესების გამტარებელი ადგილობრივ თვითმმართველობაში, ეს არის მონაწილეობითი პროცესი, ეს არის ინტერესთა გაშუალების შესაძლებლობა და თუ ეს ითვლება საფრთხის მომცველად და სეპარატიზმის გამღვივებლად, მაშინ ვინც ასე ფიქრობს მათგან დაველოდები არგუმენტებს”.
კორძაია აღნიშნავს, რომ ცვლილება შეიძლება განხორციელდეს ნებისმიერი გონივრული აზრის მოსმენის შემდეგ, მაგრამ ჯერ-ჯერობით ვერც ერთი დასაბუთება ვერ მოისმინა.
სწორედ თამარ კორძაიას გუშინდელ განცხადებას მოჰყვა დღეს “უფლებადამცველთა გაერთიანების” თავმჯდომარე ნიკოლოზ მჟავანაძის გამოხმაურება. მჟავანაძე მიმართავს კოალიციის წევრებს, რომ თუ თამარ კორზაია პატრიარქსა და საპატრიარქოს ბოდიშს არ მოუხდის, ის უნდა გაირიცხოს კოალიციიდან.
“გაუგებარია ადამიანის უფლებების დამცველისგან მსგავსი განცხადება, თუმცაღა თამარ კორძაიასგან ეს გასაკვირი არ არის, რადგან მსგავსი ტიპის გამოსვლები მას არაერთხელ გაუკეთებია და სწორედ ეს იყო მიზეზი, როდესაც საზოგადოების ნაწილი ბიძინა ივანიშვილს სთხოვდა არ წამოეყენებინა მისი კანდიდატურა საპარლამენტო არჩევნებში კოალიციის სახელით. სანამ ბიძინა ივანიშვილი პოლიტიკაში იყო, ის თავს იკავაბდა ეკლესიის შეურაცხოფისაგან, მაგრამ ივანიშვილის აქტიური პოლიტიკიდან წასვლის შემდეგ კორძაია ჩვეულ ამპლუაში მოევლინა საზოგადოებას. თუ ის ბოდიშს არ მოიხდის პატრიარქისა და საპატრიარქოს წინაშე, მაშინ მოვითხოვთ კოალიციისგან დაყენებული იქნეს მისი გარიცხვის საკითხი”.
მკითხველს შევახსენებთ, რომ თამარ კორძაიამ კომენტარი გააკეთა პატრიარქის განცხადებაზე თვითმმართველობის კოდექსთან დაკავშირებით და განაცხადა, რომ საპატრიარქო ზედმეტად ერევა სახელისუფლებო სააქმიანობაში და რომ პატრიარქს მსგავსი განცხადებების უფლება არ აქვს. ამასთან აღნიშნა რომ, ხომ არ აჯობებდა ერთი საპარლამენტო მანდატი საქართველოს პატრიარქისთვისაც გადაგვეცაო.
