“დროა სიმართლე ითქვას” _ ვინ აფინანსებდა ლანჩხუთის “გურიას”

თავისი ავკარგიანობით ეს ჩემპიონატიც (პირველი ნაწილი) დასამახსოვრებელია. გამომდინარე არსებული მოვლენებიდან, ს/კ ლანჩხუთის “გურიას”, მართლაც, შეიძლება სეზონის აღმოჩენა ვუწოდოთ, რაზეც არაერთხელ დაიწერა და ითქვა ქვეყნის სხვადასხვა მედია საშუალებით.

_ უპრეცედენტო შემთხვევაა, როცა ასეთ პირობებში მყოფი საფეხბურთო კლუბი, ამ მომენტისთვის სატურნირო ცხრილში მესამე ადგილს იკავებს. მიზერული დაფინანსება (ვგულისხმობთ უმაღლეს ლიგაში მონაწილე ლანჩხუთის “გურიასთვის“ ადგილობრივი ბიუჯეტიდან გამოყოფილ თანხის რაოდენობას), არასათანადო ყურადღება და თანადგომა (ამ შემთხვევაში არ იგულისხმება მედია) და ჯერ კიდევ ბუნდოვანი პერსპექტივა და დაპირებები (არ იგულისხმება მუნიციპალიტეტის საკრებულოს თავმჯდომარის მიერ თბილისის “დინამოსთან“ გასვლითი მატჩის წინ გაცემული საგარანტიო წერილი ფეხბურთელების სახელფასო დავალიანებების გასტუმრებაზე), _ აღნიშნავენ “გურია ნიუსთან” საუბრისას ლანჩხუთის “გურიას” ხელმძღვანელები.

როგორც გვეუბნებიან, კლუბის დირექტორატი აუცილებლად შეისწავლის მინისტრის განცხადებას, რომლის თანახმადაც, ლანჩხუთის “გურიას” ფეხბურთის ფედერაციამ მილიონი ლარი გამოუყო:

_ უკანასკნელ დღეებში, მავანთა გულის გასახარად, ლანჩხუთის “გურიას“ ირგვლივ არასასიამოვნო და, შეიძლება ითქვას, შემზარავი თემა ტრიალებდა: გუნდი, ფაქტობრივად, დაშლის პირას იყო (ფეხბურთელებმა მათთვის კანონით გათვალისწინებული გაფიცვის უფლების გამოყენება დააპირეს), კლუბის დირექტორატი “დინამოსთან“ სათამაშოდ დუბლშემადგენლობას ამზადებდა, სფფ-ს აღმასკომის სხდომაზე განიხილეს კლუბში არსებული მდგომარეობა და ადგილობრივ ხელისუფლებას გამაფრთხილებელი წერილითაც მიმართეს ათი დღის ვადაში მდგომარეობის გამოსწორების მიზნით, რასაც საკრებულოს თავმჯდომარის მიერ ინტერნეტის საშუალებით გამოთქმული მოსაზრებები (“რკინის ქალამნების ჩაცმა” და ა.შ.) და სფფ-ს იურიდიული განყოფილების ხელმძღვანელის საპასუხო გამოხმაურება მოჰყვა. ამ ყველაფრის კულმინაციად კი საქართველოს სპორტისა და ახალგაზრდულ საქმეთა მინისტრის მიერ გაკეთებული კომენტარი გამოდგა, სადაც მინისტრმა ისაუბრა საქართველოს ფეხბურთის ფედერაციის მიერ კლუბისთვის გამოყოფილ ერთმილიონ ლარზე (?!). ამჟამად კლუბის დირექტორატი აღნიშნულ თემას მოიკვლევს და აპირებს მიმართოს შესაბამის სამსახურებს. ისიც არახალია, რომ კლუბის ხელმძღვანელობამ ამ დრომდე არსებული ყველა საპრემიო დავალიანება გაუსტუმრა ფეხბურთელებს. აქამდე საზოგადოების დიდი ნაწილისათვის ცნობილი არ იყო, თუ რა საშუალებებით და ვისი ფინანსური დახმარებით მოხერხდა პრემიალური თანხების გასტუმრება. საკითხისადმი სიცხადის მოფენის მიზნით ვიტყვით, რომ ამ ყველაფრის უკან დგას კლუბის დირექტორის, კობა მირზაშვილის და ქალბატონი მარინა თოთლაძე, რომლის უშუალო თანადგომითა და ფინანსური დახმარების შედეგად დღეს გუნდი ლიდერთა შორისაა, _ განმარტავენ ლანჩხუთის “გურიაში”.

მარინა თორთლაძე ჩვენთან საუბრისას ამბობს, რომ პრემიალური თანხა, რომელიც ფეხბურთელებმა აიღეს, პირადად გაცსა:

_ იმ დღიდან, რაც ჩემი ძმა, კობა მირზაშვილი დაინიშნა დირექტორად, არ შემიწყვეტია კლუბთან ურთიერთობა. ძმის, ლანჩხუთელებისა და “გურიას“ სიყვარულისა გამო არაერთხელ გამიწევია ფინანსური დახმარება. დღემდე ეს თემა დახურული იყო. დროა, ყველამ გაიგოს სიმართლე და ყველაფერი გაცხადდეს. ვიტყვი, რომ არ ყოფილა არც ერთი საკითხი (ფინანსური), რომლის გადაწყვეტაში მონაწილეობა არ მიმეღოს და დახმარება არ გამეწიოს. აქამდე ყველა პრემიალური თანხა, რომელიც ფეხბურთელებმა აიღეს, ისევ და ისევ ძმის, ლანჩხუთელებისა და “გურიას“ სიყვარულისა გამოა გასტუმრებული ჩემ მიერ. სეზონის პირველ თამაშამდე (ვიტ ჯორჯისთან მცხეთაში) გასასტუმრებელი სახელფასო დავალიანება (4 000 ლარი) გადავიხადე, წინააღმდეგ შემთხვევაში, გუნდი 10 აგვისტოს არ გავიდოდა სათამაშოდ, რასაც კლუბის დისკვალიფიკაცია და ფედერაციიდან სხვა სანქციებიც მოყვებოდა. მაშინ ჩემი ძმა მოვალეობის შემსრულებლად იყო დანიშნული და ეს, ბუნებრივია, მისთვისაც სერიოზული დარტყმა იქნებოდა. თბილისის დინამოსთან შეხვედრაში (პირველი წრეში თამაში ქობულეთის “ჩელე-არენაზე“), მიუხედავად იმ პირობებისა, რომელშიც ფეხბურთელებს უწევდათ ყოფნა, ბიჭებმა თავი არ დაზოგეს და გულშემატკივრებთან ერთად მეც ძალიან გამახარეს. იმდენად აღფრთოვანებული ვიყავი და ისე მოვიხიბლე ფეხბურთელების თამაშით (არადა, აქამდე ნაკლებად ვერკვეოდი საფეხბურთო ცხოვრებაში), რომ შეხვედრის დასრულების შემდეგ, ბიჭებს საჩუქრის სახით გადავეცი 10 000 ლარი. ამასთანავე, ყველა გატანილ გოლზე (პირველივე ტურიდან) ბიჭებს დავპირდი, რომ დამატებითი ვაჩუქებდი 200 აშშ დოლარს, რომელსაც ვასრულებ დღემდე (ამით მინდოდა, ჩემი მოკრძალებული წვლილი შემეტანა მათ წარმატებულ თამაშში). ყოველივე ამის ფონზე დასანანია, რომ მავანთა მხრიდან ერთხელაც არ გაჟღერებულა ჩემი სახელი. დასანანია ისიც, რომ როცა პრობლემის წინაშე აღმოჩნდა კლუბი, ხელისუფლებამ, “ხელების დამიბანიას” პრინციპით, კლუბის დირექტორისკენ გაიშვირა თითი, სხვის გაკეთებულ საქმეებზე კი საკუთარი თავის პიარს არ იგვიანებდნენ, _ განაცხადა ჩვენთან საუბრისას მარინა თორთლაძემ.

როგორც თორთლაძე ამბობს, ამ ხნის მანძილზე, გურიის გულშემატკივართა, რომელთაც დამსახურებულად უწოდებენ მე-12 მოთამაშეს, ტრანსპორტირების ხარჯებსაც თავად უზრუნველყოფა.

_ ეს მისი მხრიდან იყო საჩუქარი გურიას ქომაგებისათვის. ამას დავუმატოთ, დუბლებისა და ჭაბუკთა ლიგაზე მოასპარეზე გუნდებისთვის (სულ სამი გუნდი) გაწეული ქველმოქმედება. დინამოსთან თამაშის წინ (დეკემბრის დასაწყისში), კლუბში შექმნილი არასასიამოვნო სიტუაციის დასარეგულირებლად, პრემიალური დავალიანება ქალბატონმა მარინამ დაფარა, _ ამბობენ “გურია ნიუსთან” კლუბის წარმომადგენლები.

ჩვენი ინფორმაციით, მარინა თორთლაძე უახლოეს დღეებში გეგმავს ლანჩხუთში ჩამოსვლას და პრესკონფერენციის გამართვას.

ჩვენ შევეცადეთ, აღნიშნულის შესახებ კომენტარი სპორტისა და ახალგაზრდობის საქმეთა მინისტრისგან, ლევან ყიფიანისგან მიგვეღო, თუმცა მისი ტელეფონი გამორთული იყო.

პ.ს. აღსანიშნავია, რომ “გურიასთან” დაკავშირებით, ლანჩხუთის მუნიციპალიტეტის საკრებულოს თავმჯდომარის, ამირან გიგინეიშვილის განცხადებას, რომელმაც ფეხბურთის ფედერაციას “ჯადოსნური ჯოხი მოსთხოვა”, სფფ-ის იურიდიული განყოფილების ხელმძღვანელი კესო ჩხიკვაძე ფეისბუქითვე გამოეხმაურა:

_ ბატონო ამირან, ბრძანებთ, რომ ფეხბურთის ფედერაციას სასამართლო ფუნქცია არ აქვს, ძალიან ცუდია, რომ უმაღლესი ლიგის კლუბის დამფუძნებელმა არ იცის, რა ფუნქცია აქვს ფეხბურთის ფედერაციას. დიახ, ბატონო ამირან, როცა საქართველოს ფეხბურთის ფედერაციის სამართლებრივ სივრცეში შემავალი სუბიექტები (მათ შორის, ლანჩხუთის “გურია”) ვერ ასრულებს ან არ ასრულებს თავის ვალდებულებას, ფეხბურთის ფედერაციას აქვს “სასამართლოს“ ფუნქცია. თქვენთვის გასაგები რომ იყოს ფეხბურთის ფედერაციაში მოქმედებს დავის გადამწყვეტი ორგანოები, მათ შორის ტრიბუნალი, რომელიც განიხილავს დავებს, რომელიც შეეხება ფედერაციის სუბიექტებს, როგორც იურიდიულ ისე ფიზიკურ პირებს. ლანჩხუთის “გურიის” შემთხვევაში ფეხბურთის ფედერაციის აღმასრულებელმა კომიტეტმა მოგმართათ, რომ გაითვალისწინეთ კანონით გათვალისწინებული ნორმები, ამ ნორმების დარღვევის შემთხვევაში გამოყენებული იქნება დებულება… ეს რკინის ქალამანი რომ ჩაგიცვამთ, ძალიან კარგია, მაგრამ „დუნიაზე“ ვიარეთო, რომ ბრძანებთ, იმ დუნიაზე ფეხბურთის ფედერაცია არ იყო ალბათ, თორემ, დარწმუნებული ვარ, შეივლიდით და იქ შეგახსენებდნენ, რომ: 1) საქართველოს ფეხბურთის ფედერაციამ უმაღლესი ლიგის კლუბები გაათავისუფლა საწევრო გადასახადისგან, რომელიც შეადგენდა 40 000 ლარს; 2) ლანჩხუთის “გურია” ერთადერთი კლუბია, რომელსაც არ გადაუხდია დუბლების და ორი ასაკის საწევროს ფული 20 000 ლარი; 3) ლანჩხუთის “გურია” ერთადერთი კლუბია, რომელსაც ფეხბურთის ფედერაციის აღმასრულებელი ორგანოს გადაწყვეტილებით, ლიცენზიის გარეშე მიეცა უფლება გამხდარიყო უმაღლესი ლიგის კლუბი; 4) ფეხბურთის ფედერაციის მიერ ლანჩხუთის რაიონში სტადიონზე დაიგო მწვანე საფარი, რომლის ღირებულება წარმოადგენდა 745 055 ლარს… კიდევ რის დაძლევაში უნდა დაგეხმაროთ ფეხბურთის ფედერაცია? ბატონო ამირან, რომელი ჯგუფი ცდილობს, მოგატყუოთ ზღაპრებით ინვესტორის შესახებ, დარწმუნებული ვარ, ჩემზე კარგად იცით, ინვესტორი მაშინ არსებობს, როცა არსებობს ინვესტორთან გაფორმებული ხელშეკრულება. რაც შეეხება საგარანტიო წერილს ვალის დაფარვის შესახებ, ხომ ვერ ეტყოდით საზოგადოებას რა საგარანტიო წერილი გაქვთ და ვინ აიღო ვალდებულება ვალების გადახდის შესახებ მაშინ, როცა ლანჩხუთის მუნიციპალიტეტს ბიუჯეტი არ დაუმტკიცებია?! ბატონო ამირან, გურულებს იუმორი ძალიან გვიყვარს, თუმცა, მთლად სასაცილოდ ნამდვილად არ გვაქვს საქმე, მაგრამ მოკრძალებულად გთხოვთ, რომელ “დუნიაზე“ დადიხართ ხოლმე, ფეხბურთის ფედერაცია იქ რომ დაგახვედროთ? _ წერს ჩხიკვაძე, რომელიც “გურია ნიუსთან” საუბრისას განმარტავს, რომ გუნდში არსებული პრობლემების ფედერაციისთვის გადაბრალება არასწორია:

_ ფაქტია, რომ გუნდში სერიოზული პრობლემებია. მართალია, ძნელია გუნდის შენახვა, მაგრამ ფედერაციისთვის ამ პრობლემის გადაბრალება არასწორია. ლანჩხუთის “გურიას” ფედერაცია, რაც შეეძლო გვერდში დაუდგა. არც ერთი მათგანი კონტაქტზე არ გამოდის და ეგ ძალიან ცუდია. შეიძლება, ვინმე მართლა ჰპირდებოდა დაფინანსებას, ანუ სპონსორობას, მაგრამ ამ დაპირებას ხომ აქვს საზღვარი. თუ ხელშეკრულებას არ გიფორმებენ სპონსორობაზე, ესე იგი, არ არსებობს სპონსორი, _ გვითხრა კესო ჩხიკვაძემ.