ამ შეხვედრას ოზურგეთის გამგებელი, საკრებულოს თავმჯდომარე და გურიის სამივე რაიონის სოფლის მეურნეობის საინფორმაციო-საკონსულტაციო სამსახურების უფროსები ესწრებოდნენ. დავით ნატროშვილმა ფერმერებს განუცხადა, რომ მთავრობა ინფორმირებულია მანდარინის ძალიან ცუდი სარეალიზაციო პირობების გამო, რასაც სტიქიური უბედურებაც დაემატა _ მოვიდა თოვლი, რასაც ყინვაც დაერთო და ამ დროს მანდარინის მფლობელთა 70%-ს ნაყოფო მოუკრეფავი დარჩა.
“მთავრობამ სუბსიდიის სახით გამოყო 12 მილიონი ლარი. დადგენილება ძალაშია ამ წლის 6 დეკემბრიდან. აღნიშნული თანხის მეშვეობით, იმპორტირებული მანდარინის თითოეულ კილოგრამს დაემატება 15 თეთრი,“ _ თქვა მან.
ფერმერთა გარკვეულ ნაწილს ეს თანხა ეცოტავა, თუმცა ნატროშვილმა განაცხადა, რომ კეთდება მაქსიმუმი, რისი საშუალებაც სახელმწიფოს აქვს და კვლავ იმსჯელებენ პირობების გასაუმჯობესებლად.
უმთავრესი კითხვა, რა ეშველება იმ ფერმერებს, ვინც საერთოდ ვერ მოკრიფა და ფაქტობრივად იზარალა მანდარინი, ამის შესახებ ოზურგეთის საკრებულოს თავმჯდომარე ავთანდილ სურგულაძემ ასეთი აზრი გამოთქვა:
“რაკი მთავრობა სუბსიდირების სახით 15 თეთრს უმატებს ერთ კილოგრამ იმპორტირებულ მანდარინზე, შედგეს კომისია, რომელიც ზარალს დაითვლის და კომპენსაციის სახით 15 თეთრი მაინც მიეცეს გლეხს კილოგრამ მანდარინში.“
დავით ნატროშვილმა განაცხადა, რომ თუ გლეხი მოკრეფს და გამოიყენებს ამ მანდარინს და გაყიდის, ამას არავინ დაუთვლის და უანგარიშებს. მას 15 თეთრი მაინც მიეცემა.
აღნიშნული მოსაზრება ჯერ მხოლოდ სიტყვიერი შეთანხმებაა. თუმცა, ნატროშვილმა განაცხადა, რომ ამ საკითხზე ხელისუფლება მაქსიმალურად გაატარებს ღონისძიებას და ალბათ, საკითხი დადებითად გადაწყდება.
შეხვედრაზე არაერთი მწვავე კითხვა დაისვა მანდარინის რეალიზაციასთან დაკავშირებით, თუმცა, საბოლოოდ, ასე თუ ისე, ფერმერები და ხელისუფლების წარმომადგენლები სუბსიდირებისა და საკომპენსაციო თანხებზე შეთანხმდნენ.
ნატანებში უკვე ამოქმედებული მანდარინის მიმღები პავილიონის მფლობელი დავით სიხარულიძე ფერმერებს შეპირდა, რომ 1000 ტონა მანდარინს აუცილებლად ჩაიბარებს, კილოგრამს 35 თეთრად.
