წარმოდგენილი ორგანული კანონპროექტი არეგულირებს ადგილობრივი თვითმმართველობის ადმინისტრაციულ-ტერიტორიულ ორგანიზებასთან, მუნიციპალიტეტის უფლებამოსილებებთან და მის ორგანოებთან, დედაქალაქის სტატუსთან და მის უფლებამოსილებებთან დაკავშირებულ საკითხებს. ასევე, ითვალისწინებს მუნიციპალიტეტის ბიუჯეტთან და ეკონომიკურ საქმიანობასთან დაკავშირებულ პროცესებში მოქალაქეთა ჩართვას. უკვე რამდენიმე დღეა რაც კანონპროექტში შეტანილი ცვლილებების შემდეგ ცნობილი გახდა, რომ თვითმმართველი ქალაქების რიცხვი გახდება 12 და ახალი 7 თვითმმართველი ქალაქი უნდა გამოიყოს არჩევნებამდე, რათა ამ ქალაქებში ცალკე არჩევნები ჩატარდეს.
პარლამენტის მიერ თვთმმართველობის კოდექსის მიღებასთან დაკავშირებით კომენტარი გააკეთა “თავისუფალი საქართველოს” ლიდერმა კახა კუკავამ და განაცხადა, რომ მეორე და მესამე მოსმენამდე საჭიროა საპროტესტო ტალღა, რათა ამ ხელისუფლებამ არ შეძლოს ქვეყნისთვის საზიანო უკანასკნელი ნაბიჯების გადადგმა.
“პარლამენტმა პირველ მოსმენაზე გაიტანა კანონპროექტი თვითმმართველობის კოდექსის შესახებ, რომელსაც ყველა ოპოზიციური პარტია, ქართული ეკლესია და რაც მთავარია ქართული საზოგადოების უდიდესი ნაწილი პროტესტს უცხადებდა. მე მოვუწოდებ საქართველოს მოქალაქეებს, რომ ვიდრე მეორე და მესამე მოსმენა გაიმართება გავმართოთ ფართო მასშტაბიანი კამპანია ამ კოდექსის წინააღმდეგ”.
კუკავა შეეხო პრემიერ-მინისრტის მიერ გუბერნატორების დანიშვნის საკითხს და განაცხადა, რომ გუბერნატორებად პოლიციელების დანიშვნა არის პოლიციური მათრახი თვითმმართველობებისთვის.
“ახლად დანიშნული გუბერნატორები არიან ნიკანდრო ქირიას შთამომავალი პოლიცმეისტერები, რაც არის პოლიტიკური სახელმწიფოს პირდაპირი ატრიბუტი. თუ გუბერნატორებმა რეგიონების ეკონომიკური და სოციალური განვითარებისათვის უნდა იმუშავონ, მაშინ პოლიციელებს რაღატო ნიშნავენ ამ თანამდებობაზე, რომელთაც არც სამეურნეო და არც პოლიტიკური გამოცდილება არ აქვთ?!.საერთაშორისო საზოგადოებამ ყურადღება უნდა მიაქციოს ამ საკითხს, ეს არის სკანდალი”.
კუკავა აცხადებს, რომ დღეს მოქმედი ყველა გამგებელი შერჩეულია შსს-ს მიერ და მომავალშიც ქვეყანაში პოლიციური რეჟიმი იმეფებს.
“ლეიბორისტული პარტიის” წევრი გიორგი გუგავა მიიჩნევს, რომ ამ კანონპროექტის მიმღები დეპუტატები ქვეყანაში ფილიპე მახარაძის და სერგო ორჯონიკიძის საქმეს აგრძელებენ. მისი თქმით ეს კანონი ისედაც დაშლილ და დანაწევრებულ საქართველოს უფრო მეტ საფრთხეს შეუქმნის.
“სამწუხაროდ ქვეყანას დღეს ჰყავს 82 ფილიპე მახარაძე და სერგო ორჯონიკიძე. მიუხედავად პატრიარქის მოწოდებისა, მიუხედავად იმისა, რომ საზოგადოების ფართო ნაწილმა და არასაპარლამენტო ოპოზიციამ მკვეთრად უარყოფითი გამოკიდებულება გამოხატა თვითმმართველობის შემოგდებულ კოდექსთან დაკავშირებით, პარლამენტმა მაინც მიიღო ბიძინა ივანიშვილის მიერ წარმოდგენილი თვითმმართველობის კოდექსი. პროექტში პრაქტიკულად არაფერი შეცვლილა”.
გიორგი გუგავამ თავისი დამოკიდებულება გამოხატა ახლად დანიშნული გუბერნატორების მიმართ და განაცხადა, რომ ისინი არიან საოჯახო გუბერნატორები, რომლებიც არასდროს გააკეთებენ ხალხისთვის სასიკეთო საქმეს.
“ბიძინა ივანიშვილმა მოახდინა საქართველოს პრივატიზირება. მან დაგვინიშნა პრეზიდენტი, პრემიერი და ახლა უკვე შპს საქართველოს საოჯახო გუბერნატორები, რომლებიც მუდამ მოემსახურებიან მისი ინტერესების დაცვას და ძალაუფლების შენარჩუნებას. გუბერნატორის ინსტიტუტი საერთოდ მოსასპობია, ეს არის მეტასტაზი სახელმწიფოსთვის”.
გუგავა აცხადებს, რომ თვითმმართველობის კოდექსთან დაკავშირებით უნდა დაიწყოს ფართო სახალხო წინააღმდეგობრივი მოძრაობა, რომელიც შეიწირავს ამ ხელისუფლებას და არ მისცემს საშუალებას მიიღოს ქვეყნისთვის დამანგრეველი კანონი.
დეპუტატი გია ჟორჟოლიანი მიიჩნევს,რომ მყისეულად არაფერი არ ხდება. ის საკითხები კი, რომლებიც განხილვისთვის მეტ დროს ითხოვს, გადადებულია და ჩადებულია გარდამავალ დებულებაში.
“ჩვენ შევეცადეთ, რომ ისეთი საკითხები, რომლებიც მეტ დროს მოითხოვს, გადადებულიყო. მყისიერად არაფერი არ ხდება. ეს არის რეფორმა, რომელიც ბევრ ქვეყანაში ათწლეულების განმავლობაში მიმდინარეობდა. ჩვენთანაც იყო რაღაც ცვლილებები, მაგრამ სინამდვილეში, არ იყო ავტონომია და დემოკრატია, ეს იყო ცენტრალური ხელისუფლების დანამატის მოწყობის მცდელობა და არა რეალური ცვლილებები, რეალური მიმართულებით. არის საკითხები, მაგალითად 7 თვითმმართველი ქალაქის გარდა დარჩენილი ტერიტორიების დაყოფა, რომლის განსაზღვრის წესი ჩადებულია გარდამავალ დებულებაში”.
ჟორჟოლიანმა მიესალმება წარმოდგენილ გუბერნატორებს და იმედი გამოთქვამს, რომ ის თანამშრომლობა, რომელიც მთავრობასა და გუბერნატორებს შორის უნდა იყოს, ეფექტურად წარიმართება.
“ბოლო ერთი წლის განმავლობაში, ჩვენი მთავრობა და გუბერნატორები, რბილად რომ ვთქვათ, ვერ თანამშრომლობდნენ. მომავალში ეს პრობლემა მოხსნილი იქნება. რაც შეეხება იმ საკითხს, რაც დღეს პოლიტიკოსების ერთი ნაწილის მსჯელობის საგანი გახდა, რომ ამ ადმიანებს ძალოვან უწყებებში მუშაობის გარკვეული გამოცდილება აქვთ, ეს გარკვეული თვალსაზრისით ბუნებრივიცაა, ვინაიდან პრემიერიც ამ გამოცდილების ადამიანია. თუმცა, არ მგონია, რომ ეს კადრები შერჩეული იყვნენ იმის გამო, რომ მათ აქვთ ოპერატიული, ან ძალოვანი უწყებებისათვის დამახასიათებელი გამოცდილება, მე ვფიქრობ, რომ მათ აქვთ კარგი მენეჯერული და ორგანიზატორული თვისებები, რაც აუცილებებლია”.
ჟორჟოლიანის თქმით, დღეს ქვეყნის ეკონომიური განვითარებისა და რეგიონების მოწყობისთვის აუცილებელია ეფექტური გუბერნატორების არსებობა.
