ევროკავშირის პრიზი ჟურნალისტიკაში – საქართველოში ევროკავშირის წარმომადგენლობის ახალი ინიციატივაა. ის მიზნად ისახავს ქართულ მედიაში იმ ნაშრომების წარმოჩენასა და აღიარებას, რომლებიც პროფესიონალურ ჟურნალისტურ ეთიკასა და პრინციპებს იზიარებენ.
ქართველი და ევროპელი წევრებისგან შემდგარმა ჟიურიმ საკონკურსოდ 2012 წლის 1 ოქტომბრიდან 2013 წლის 30 ოქტომბრამდე გამოქვეყნებული ნაშრომები განიხილა.
საუკეთესო საგამომძიებლო სტატია, ან ნარკვევისთვის ბეჭდვით, ან ონლაინ მედიაში გაზეთ “რეზონანსის” ჟურნალისტი მარიამ ოთარაშვილი დაჯილოვდა.
“ომის შემდეგ პირველი რეპორტაჟი ცხინვალიდან” , – ეს იყო ჩემი სტატია, რომელიც გასული წლის ოქტომბრის ბოლოს დავწერე. პირველი ჟურნალისტი ვიყავი, ვინც ომის შემდეგ ცხინვალში ჩავიდა და იქაურ სიტუაციაზე დაწერა. ანუ ის რეალური მდგომარეობა, რაც იყო ცხინვალში, აისახა ჩემს რეპორტაჟში. ახალგორიდან ვარ და არ გამჭირვებია ცხინვალში ჩასვლა, მაგრამ ამას შემდეგ მოჰყვა რეაქციები. იყო მუქარები ოსური მხარის მიერ: “როგორ გაბედა და ჟურნალისტი შევიდა იქ”. ახლობლებმა მირჩიეს, ცოტა ხნით კონფლიქტის ზონაში ჩასვლისაგან თავი შემეკავებინა, შემდეგ კი ჩაწყნარდა სიტუაცია. სიმართლე გითხრათ, არ ველოდი გამარჯვებას და ძალიან მიხარია, ევროკავშირის პრიზი რომ დავიმსახურე,” _ უთხრა მარიამ ოთარაშვილმა “გურია ნიუსს”.
საუკეთესო ტელე და რადიო რეპორტაჟისთვის განკუთვნილი პრიზი სტუდია “მონიტორის” წარმომადგენელმა, გიორგი მგელაძემ მიიღო, ჟურნალისტური გამოძიებისთვის – “აგენტი პროვოკატორი ხელისუფლების სამსახურში”.
საუკეთესო ვებგვერდი/ბლოგი/სოციალური ქსელის პროფილისთვის განკუთვნილი პრიზი გიორგი კიკონიშვილს გადაეცა ჟურნალ “ლიბერალში” გამოქვეყნებული ბლოგისთვის – “ადამიანი, შე ჩემა”.
“შარშანაც გავიმარჯვე ამ ნომინაციაში. ეს ჩემთვის ორმაგად სასიხარულო ამბავია. წელს გამარჯვებულ ბლოგში ადამიანური ენით ვყვები ადამიანებზე, იმაზე, რომ დღესდღეობით ქართულ საზოგადოებაში ადამიანი არ არის მთავარი ღირებულება. ბევრი ბარბაროსული ფაქტების შემსწრენი ვხვდებით ჩვენ გარშემო. ვისურვებდი, იმ დონემდე მივიდეთ, რომ ადამიანი იყოს ჩვენთვის უმაღლესი ღირებულება,” _ აღნიშნა გიორგი კიკონიშვილმა.
ევროკავშირის რჩეული ყველაზე ინფორმატიული ონლაინ გაზეთი, ან საინფორმაციო სააგენტოს ნომინაციაში “ნეტგაზეთი” გახდა.
“ძალიან გაგვიხარდა ეს პრიზი. ძალიან დიდ ენერგიას როცა ხარჯავ და ამას დააფასებენ, ეს ნიშნავს, რომ კარგად აკეთებ რაღაცეებს და ეს არის სტიმული არამარტო ჩემთვის, არამედ “ნეტგაზეთის” ყველა თანამშრომლისთვის,” _ განაცხადა სააგენტოს დამფუძვნებელმა ნესტამ ცეცხლაძემ.
წელს პირველად ევროკავშირის სადამკვირვებლო მისიამ (EUMM) მშვიდობის ჟურნალისტიკაში სპეციალური პრიზი დააწესა. პრიზის მიზანია, აღიაროს და დააჯილდოვოს კონფლიქტის მიმართ სენსიტიური ჟურნალისტური ნამუშევრები და სტიმული მისცეს ჟურნალისტებს, კონფლიქტური სიტუაციები კონსტრუქციულად გააშუქონ.
აღნიშნული პრიზი “რადიო თავისუფლების” ჟურნალისტს ოლესია ვართანიანს გადაეცა სტატიისთვის – “იმედი აძლებინებს ნათესავებს”.
“ჩემთვის ძალიან დიდი სურპრიზი იყო ამ ნომინაციაში გამარჯვება. რომ მოვდიოდი ნამდვილად არ ვფიქრობდი, რაღაც პრიზს თუ ავიღებდი. სამი ადამიანი ვიყავით “რადიო თავისუფლებიდან” წარდგენილი და ნამდვილად სასიხარულოა, მე რომ ამირჩიეს. რაც შეეხება გამარჯვებულ სტატიას, მე ის აფხაზეთში უგზო-უკვლოდ დაკარგულებზე დავწერე. ოთხი წელია აფხაზეთში დავდივარ, ვაშუქებ მოვლენებს და გადავწვიტე იმ ადამიანებზე გამეკეთებინა მასალა, რომლებმაც 20 წლის გასვლის შემდეგაც არაფერი იციან თავისიანების შესახებ,” _ უთხრა “გურია ნიუსს” ოლესია ვართანიანმა.
გამარჯვებულებს პრიზები გადასცეს პარლამენტის ვიცე სპიკერმა მანანა კობახიძემ, ევროკავშირის მისიის ხელმძღვანელმა ტოივო კლარმა, ევროკავშირის საქართველოს წარმომადგენლობის ელჩის მოადგილე ბორის იაროშევიჩმა, კონკურსის ჟიურის წევრებმა ზვიად ქორიძემ და თამარ რუხაძემ.
პრიზების გადაცემის შემდეგ კონსერვატორიის მცირე დარბაზში ბაროკოს მუსიკის კონცერტი გაიმართა. კონცერტი პროექტ “ევროკავშირის კულტურის ქარხანა – მუსიკალური ფესტივალის” ფარგლებში ჩატარდა. კონცეტრში მონაწილეობა მიიღეს საქართველოს სიმფონიეტამ, თბილისის სახელმწიფო კამერული მუსიკის ორკესტრი კრისტოფ მაიერის დირიჟორობით, ასევე მაგდა უგულავამ (კლავესინი, ფორტეპიანო).
