ინტერვიუ გურიის ახალ გუბერნატორთან:”გვერდით არაპოლიტიკური ფიგურა მჭირდება”

ვისაც ეს ინტერესი არ აქვს, იმას უნდა გავუჩინოთ. მე მათ ხელს შევუწყობ. ეს არის 100%-ით პირდაპირი დავალება პრემიერისგან, თორემ სხვა შემთხვევაში არც წამოვიდოდი. ჩემს სხვა ფუნქციას ამ პოსტზე ვერ ვხედავ, მე ვიცი ეს ყველაზე ძალიან კარგად,” _ ასე დაიწყო ინტერვიუ”გურია ნიუსთან” გურიის ახლადდანიშნულმა გუბერნატორმა გიორგი ჩხაიძემ.

გიორგი ჩხაიძე 1978 წლის 10 დეკემბერს თბილისში დაიბადა, პროფესიით ეკონომისტია; 2001-2003 წლებში შპს”ორბელის” ფინანსურ დირექტორად, 2009-2013 წლებში სს “საქენერგორემონტის” სამეთვალყურეო საბჭოს თავმჯდომარედ მუშაობდა; ამავე პერიოდში, შპს “ორბელი 91-ის” და სს “საქართველოს სავაჭრო ცენტრის” სამეთვალყურეო საბჭოს თავმჯდომარეა; 2003-2013 წლებში სს “ორბელი ტრანსის” და სს “უნივერსალის” სამეთვალყურეო საბჭოს წევრია. ჰყავს სამი შვილი.

_ ჩვენ გვაქვს საოჯახო ბიზნესი, რომელიც მამაჩემმა შექმნა. მამაჩემი გახდა ავად და რამდენიმე წელია, ამ კომპანიებს სათავეში მე ჩავუდექი, გავაძლიერე და გავამსხვილე. წარმოვადგენ ნორმალურ კონცერნს; ჩემთან მუშაობს 700-დან 2000 კაცამდე. ახლა ვფლობ 7 კომპანიას საქართველოსა და ჩეხეთში, _ თქვა ჩხაიძემ.

“გურია ნიუსის” კითხვები შეეხებოდა საკითხებს, თუ კონკრეტულად რა გეგმებით ჩამოვიდა ბიზნესმენი გურიაში, აქვს თუ არა პირდაპირი მითითება პრემიერ-მინისტრისგან საკადრო ცვლილებებთან დაკავშირებით, იცნობს თუ არა თვითმმართველობისა და ზედამხედველობის კანონმდებლობას.

_ ბატონო გიორგი, უკვე გაქვთ თუ არა კონკრეტული გეგმა გასატარებელი ღონისძიებების შესახებ?

_ კონკრეტული გეგმები ასე, ნამდვილად არ არის… არის ერთი მიმართულება _ კონკრეტულად ბიზნესის მხრივ ხელშეწყობა, ხალხის დასაქმების მხრივ ყველაფრის გაკეთება, ინვესტორების მოძიება, დაინტერესება სხვადასხვა ბიზნესმენებით… ესაა მთავარი ამოცანა. მეორე მიმართულებაა, იმის შესწავლა, თუ ფიზიკურად რა პრობლემებია სოციალური კუთხით.

_ სამუშაო ადგილების შექმნის თვალსაზრისით, უკვე არსებობს გეგმა, სტრატეგია, ეკონომიკური ხედვა? გურიაში მთავარი პრობლემა ესაა… მოსახლეობა წლების განმავლობაში თურქეთში დადის ლუკმა-პურის საშოვნელად, რადგან არც წარმოებაა და შესაბამისად, არც სამუშაო ადგილები.

_ ჩემი საქმიანობაც ზუსტად ეს არის, რასაც ბიზნესსექტორი ჰქვია. ძალიან კარგად ვიცი რა და როგორ უნდა შევთავაზო ბიზნესმენებს, რომ დაინტერესება წამოვიდეს ბიზნესსექტორიდან ადგილზე კომპანიების გახსნის თვალსაზრისით. პირველი ამოსავალი წერტილი, რაც ბიზნესის გახორციელებისთვისაა საჭირო, სახელმწიფო მიდგომაა: თუ სახელმწიფოსგან არ არის სრული მხარდაჭერა, გამორიცხულია, ბიზნესმა დაინტერესება გამოხატოს; პირიქით, ქართველი ბიზნესმენები ტოვებდნენ საქართველოს და მიდიოდნენ ქვეყნიდან, მათ შორის, მეც 5 წლის განმავლობაში ვიყავი ქვეყნიდან წასული. ახლა უკვე პრეზიდენტის არჩევის შემდეგ, ხელისუფლება ჩამოყალიბებულია და დასრულდა პერიოდი, როცა ყველას ჰქონდა მოლოდინი, რა და როგორ მოხდებოდა. დასრულდა პერიოდი, როცა აღმასრულებელი და საკანონმდებლო რგოლები დაპირისპირებულნი იყვნენ. ამიტომაც, ქვეყანაში ბიზნესსექტორი გაჩერებული იყო.

_ ბატონო გიორგი, თქვენ თქვით, რომ ბევრ გურულ ბიზნესმენს იცნობთ. იქნებ გვითხრათ, კონკრეტულად ვის გულისხმობთ?

_ ვიცნობ, მაგალითად, ასკანელ ძმებს ჩხაიძეებს. მამაჩემი გაცილებით მეტს იცნობდა. ვაპირებ ყველა ბიზნესმენთან შეხვედრას რამდენიმე დღეში. რაღაცით უნდა დავიწყოთ, შემდეგ ავტომატურად თავისით ვითარდება.

_ ქვეყანაში გაცხოველებული მსჯელობაა, თუ როგორ უნდა აისახოს თვითმმართველობის სტრუქტურაში გუბერნატორის ინსტიტუტი, რა უფლებები და მოვალეობები უნდა ჰქონდეს მას, არჩევითი უნდა იყოს თუ არა ეს პოსტი… იცნობთ თუ არა თვითმმართველობის, სახელმწიფო ზედამხედველობის ძველ ან პროექტის სახით არსებულ კანონმდებლობას?

_ კი, ნაწილობრივ ვიცნობ, მაგრამ აწი უფრო უკეთ გავეცნობი; როგორც გითხარით, საერთოდ მოულოდნელი იყო ჩემი აქ წამოსვლა. აქედან გამომდინარე, ვიწყებ ყველაფრის საფუძვლიან გაცნობას პრობლემა არ იქნება.

_ თქვენს ძირითად მოვალეობას სამთავრობო პროგრამებისა და პროექტებზე სახელმწიფო ზედამხედველობა წარმოადგენს. იცით თუ არა რომელი სამთავრობო პროგრამები და პროექტები ხორციელდება ამჟამად გურიაში?

_ გუშინ მქონდა სოფლის მეურნეობის მინისტრთან შეხვედრა; ყველაზე დიდი პრობლემა ამ დროისთვის რაც დამხვდა, ციტრუსის თემაა. ჩემი ამოსავალი წერტილია, რომ მომავალ წელს ასეთი პრობლემა უკვე აღარ იყოს.

_ თქვენ თქვით, რომ გაარკვევთ მოსახლეობის განწყობებს და მხოლოდ შემდგომ იფიქრებთ მუნიციპალიტეტების გამგებლების შეცვლაზე. ფიქრობთ, რომ თქვენს ფუნქციებში გამგებლების გათავისუფლება, გადაყენება შედის?

_ არა, თავისთავად არ არის ჩემი ფუნქცია გამგებლის გადაყენება. საუბარია იმაზე, რომ ურთიერთობა მექნება ხალხთან, მოსახლეობის აზრს კი გავიგებ თქვენგან – მედიიდან, არასამთავრობო ორგანიზაციებიდან, მოსახლეობასთან შეხვედრებით. გამგებელს ნამდვილად არ დავუსვამ კითხვას, მოსწონს თუ არა ის მოსახლეობას. მოსახლეობამ თვითონ უნდა გადაწყვიტოს, ვინ უნდა ჰყავდეს საკრებულოში თუ გამგეობაში. საკრებულოს როლი ცოტა უნდა ამოიწიოს, რადგან ის წარმოადგენს მოსახლეობას. ზუსტად მას უნდა ედოს პულსზე ხელი და იცოდეს, რომელ სოფელში რა არის გასაკეთებელი, რა არ მოსწონს ან მოსწონს გამგებლის, რადგანაც საკრებულო ირჩევს გამგებელს.

_ გაქვთ თუ არა პირდაპირი დავალება პრემიერისგან, საკადრო ცვლილებების კუთხით გუბერნიაში, მუნიციპალიტეტებში?

_ არ მაქვს არანაირი დავალება პრემიერისგან ამ კუთხით. მე თუ რაიონს მისთვის მისაღები კადრი არ შევთავაზე, ისევ იქამდე მივალთ, სადაც ვიყავით. მე არაფერს გადავწყვეტ მხოლოდ ჩემით, პირდაპირ; მაგალითად, დაისვა კითხვა: რევაზ ჩიტიძე იქნება თუ არა გუბერნატორის მოადგილე? _ არ იქნება, რეზო არის ჩემი მეგობარი. მოადგილე უნდა იყოს ისეთი, რომ ჩემთან ერთად წარმოადგენდეს რაიონს და იცავდეს მის ინტერესს. გუბერნატორის მოადგილე უნდა იყოს ყველასთვის მისაღები.

_ შესთავაზებთ თუ არა”ქართული ოცნების” ადგილობრივ ლიდერებს ვიცე-გუბერნატორების თანამდებობებს?

_ მე არ ვარ რომელიმე პოლიტიკური პარტიის წევრი და წარმომადგენელი მხარეში _ ვარ აღმასრულებელი ხელისუფლების წარმომადგენელი. შერჩეული იქნებიან ღირსეული ადამიანები.

_ ბატონო გიორგი, იქნებ, უფრო კონკრეტული პასუხი გამცეთ კითხვაზე: აპირებთ თუ არა”ქართული ოცნების” ოზურგეთელი ლიდერებიდან რომელიმეს ვიცე-გუბერნატორად დანიშვნას?

_ სავარაუდოდ არა. უფრო _ არა. მე არაპოლიტიკური ფიგურა მჭირდება გვერდით.

_ ბატონო გიორგი, გახდებით თუ არა პარტია” ქართული ოცნება _ დემოკრატიული საქართველოს” წევრი?

_ არა, არ ვაპირებ გავხდე პოლიტიკური ფიგურა. ჩემი ფუნქცია ერთია _ დავალაგო გურიაში სიტუაცია.

_ უკვე იცით, ვინ იქნებიან თქვენი მოადგილეები?

_ მართლა არ ვიცი ჯერ.

_ აპირებთ თუ არა საკადრო ცვლილებების გახორციელებას გუბერნატორის ადმინისტრაციაში?

_ ჯერ ვერც მოვასწარი თანამშრომლებთან შეხვედრა; ისე მოხდა, რომ პირველად თქვენ შეგხვდით… სანამ არ გავეცნობი მათ საქმიანობას, ვერაფერს გეტყვით.

_ ბატონო გიორგი, შესაძლებელია, რომ ვიცე-გუბერნატორებიდან რომელიმემ პოსტი შეინარჩუნოს?

_ არა, სავარაუდოდ არ დარჩებიან. თუმცა, მაინც უნდა გავიცნო და დაველაპარაკო მათ.

_ თქვენი აზრით, კოჰაბიტაცია დასრულდა?

_ კი, დასრულდა. როგორც ვიცი, იანვრიდან ყველა გამგებელს გასდის ვადა. ახალი თვითმმართველობები იქნება ამ პროცესის საბოლოო წერტილი.