სწორედ ამ თემას გამოეხმაურა ექსპერტი ხათუნა ლაგაზიძე და აღნიშნა, რომ კითხვების გაჩენა გამოიწვია კონკურსთან დაკავშირებული ინფორმაციის ნაკლებობამ. მისი თქმით, ეს ყველაფერი იწვევს განცდას, რომ პარლამენტი ხელისუფლებისადმი ლოიალურად განწობილი პირებით ცდილობს დააკომპლექტოს საზოგადოებრივი მაუწყებლის ბორდი.
“საზოგადოებრივი მაუწყებლის ბორდის კონკურსის გაშუქება მიმალულად მოხდა. ამ კონკურსის საინფორმაციო უზრუნველყოფა და გაშუქება უნდა ყოფილიყო გაცილებით უფრო სრულყოფილი, ვიდრე ეს იყო ამ დღეების განმავლობაში. დაიბადა კითხვები, რომ საკანონდებლო ორგანოში წარმოდგენილ მმართველ პოლიტიკურ პარტიებს, ხომ არ აქვთ პოლიტიკური ინტერესი, რომ საკუთარი ზრახვებისთვის გამოიყენოს საზოგადოებრივი მაუწყებელი და ბორდი დააკომპლექტოს მათდამი ლოიალურად განწობილი შემადგენლობით. ამ ტიპის კითხვები რომ არ გაჩენილიყო, ეს ამბავი ყველა საინფორმაციო გამოშვებით უნდა გადაცემულიყო”.
ექსპერტის აცხადებს, რომ შექმნილი ვითარებიდან და კიდევ უფრო მეტი კითხვის გაჩენის თავიდან ასაცილებლად ერთადერთი გამოსავალი იქნება კონკურსის ვადების გახანგრძლივება.
საზოგადოებრივი მაუწყებლის ბორდის თაობაზე ისაუბრა ჟურნალისტებთან უმრავლესობის წევრმა ვახტანგ ხმალაძემ. ის ამბობს, რომ ბორდის წევრები საზოგადოებისთვის კარგად ნაცნობი და პატივსაცემი ადამიანები უნდა იყვნენ. ხმალაძის განცხადებით, მისთვის უცნობია კანდიდატების ვინაობა, თუმცა, აუცილებლად კარგად გაეცნობა ამ საკითხს, როცა განსახილველად პარლამენტში გადავა.
“საზოგადოებრივი მაუწყებლის სამეურვეო საბჭო როგორი იქნება, ეს ძალზედ მნიშვნელოვანია ჩვენი საზოგადოებისთვის, რადგან სწორედ მან უნდა განსაზღვროს საზოგადოებრივი მაუწყებლის პოლიტიკა, პოლიტიკა კი უნდა იყოს ისეთი, რომ შეესაბამებოდეს საზოგადოების ინტერესებს. ვიცი, რომ კანდიდატურების წარდგენაში სრული თავისუფლებაა, თუმცა, მე არ ვიცი ვინ არიან ეს პიროვნებები. ამ კანდიდატურებიდან ის კომისია შეადგენს კანდიდატთა სიას, რომელიც დაამტკიცა პარლამენტმა, აი, როცა ეს საკითხი პარლამენტში გადმოვა, აუცილებლად კარგად გავეცნობი ამ საკითხს. ერთი, რაც ჩემი აზრით ყველაზე მნიშვნელოვანია, სამეურვეო საბჭოში უნდა იყვნენ საზოგადოებისთვის ცნობილი და პატივსაცემი სახეები. ვფიქრობ, კომისია კომპეტენტური პირებით არის დაკომპლექტებული და ნამდვილად საზოგადოებისთვის მისაღებ კანდიდატურებს შემოგვთავაზებენ”.
შეგახსენებთ, რომ პარლამენტმა 83 ხმით 0-ის წინააღმდეგ GPB-ის მეურვეობის კანდიდატების შესარჩევი კომისიის წევრები დაამტკიცა.
აღნიშნული კომისიის შემადგენლობაში არიან: ჟურნალისტი და სამოქალაქო განვითარების ინსტიტუტის ხელმძღვანელი ია ანთაძე, ჟურნალისტი ნინო ბექიშვილი, სამოქალაქო განვითარების სააგენტოს (სიდა) აღმასრულებელი დირექტორი ზვიად დევდარიანი, “ახალგაზრდა იურისტთა ასოციაციის” გამგეობის წევრი ნათია კაპანაძე, რეგიონულ მაუწყებელთა ასოციაციის თავმჯდომარე ნათია კუპრაშვილი, “მრავალეროვანი საქართველოს” თავმჯდომარე არნოლდ სტეფანიანი, პროფესორი ზაზა შათირიშვილი, ჟურნალისტი და საქართველოს ჟურნალისტური ეთიკის ქარტიის საბჭოს წევრი ზვიად ქორიძე და პროფესორი თამაზ ჯოლოგუა. კომისია კონკურსის შედეგად პარლამენტს 28 კანდიდატს წარუდგენს.
შეგახსენებთ წარდგენის წესსაც: კონკურსის შემდეგ კომისია შეარჩევს 28 კანდიდატს, საიდანაც მოხდება სუბიექტებისგან მათ მიერ წარსადგენი კანდიდატების დასახელება პარლამენტის წინაშე. კერძოდ, 2 წევრს ასახელებს სახალხო დამცველი, ერთს – აჭარის უმაღლესი საბჭო, 3-ს – საპარლამენტო უმრავლესობა და 3-ს – საპარლამენტო უმცირესობა.
