“გურია ნიუსი” წალკის მუნიციპალიტეტში ჩასახლებული ადამიანების ბედით დაინტერესდა და ადგილზე ვითარების გასაცნობად წალკაში ჩავიდა. სანამ სოფელ ტბეთში ჩავიდოდით, გზად სოფელი იმერი გავიარეთ. სადაც, ადგილობრივი მოსახლეობა საკუთარი ხელით წყლის ავზს ამონტაჟებდა. როდესაც ადგილობრივებმა გაიგეს, ჟურნალისტი ვიყავი, სოფლის სკოლის საკითხით დაინტერესება გვთხოვეს და სკოლის შენობამდე მეგზურობაც თავად გაგვიწიეს.
მიტოვებული 2- სართულიანი სახლი ბოსელთან ერთად, ცელოფნის პარკით შეფუთული საკლასო ოთახი, ფანჯარა, სადაც შუშის მაგივრად ცელოფნის პარკია აკრული. ყველა ოთახში შეშის ღუმელი… ასეთი დახვდა “გურია ნიუსს” საქართველოს განათლებისა და მეცნიერების სამინისტროს წალკის მუნიციპალიტეტის სსიპ იმერის საჯარო სკოლა, სადაც 80 მოსწავლე გაუსაძლის პირობებში სწავლობს. მაშინ, როცა განათლების სამინისტრო თბილისის ზოგიერთ სკოლაში თანამედროვე ტექნოლოგიებით აღჭურვისთვის ათასობით ლარს იხდის.
მშობლები განათლების სამინისტროსგან არც თანამედროვე ტექნოლოგიებით აღჭურვას და არც სხვა ფუფუნების საგანს ითხოვენ. სოფელი ახალ სკოლას ითხოვს, რომელშიც ცელოფნის ნაცვლად, შუშა იქნება ჩასმული. შპალერის ჭერის ნაცვლად, როგორც სხვა დანარჩენ სკოლებშია მიღებული, სტანდარტული ჭერი იქნება.
“გურია ნიუსთან” სკოლის დირექტორი ჯუმბერ ხოზრევანიძე ამბობს, რომ სახლი ეთნიკურად ბერძენი მოქალაქის საკუთრებაა, რომელიც ამჟამად საქართველოში არ არის. თუმცა ეს სახლი სახელმწიფოს საკუთრებაშიც რომ იყოს, სასწავლო პროცესისთვის არ გამოდგება.
“საშუალო სკოლაში 80 ბავშვი სწავლობს. დაწყებითი კლასიდან მე- 12 კლასის ჩათვლით. ადგილობრივი პედაგოგები მუშაობენ. ჩვენი სკოლიდან გასულ წელს 5-მა ბავშვმა ჩააბარა უმაღლესს სასწავლებელში და სტუდენტი გახდა.
წერილით მივმართეთ ადგილობრივ ხელისუფლებას, განათლების სამინისტროს. სადაც ვითხოვთ ახალი სკოლის აშენებას. გვერდით დგას შენობა, რომელიც პატარაა, მხოლოდ დაწყებითი კლასისთვის თუ გამოდგება. თან ავარიული შენობაა. ახალი ხელისუფლების იმედი გვაქვს. დარწმუნებული ვარ, გაითვალისწინებენ ჩვენს გულისტკივილს და აგვიშენებენ სკოლის ახალ შენობას.
ეს სკოლა 2004 წელს გაიხსნა. ამის შემდეგ ვითხოვთ ხელისუფლებისგან ახლი სკოლის აშენებას. თუმცა, უშედეგოდ.
ვთხოვთ განათლების სამინისტროს ახალი სკოლის შენობას. აქ მუშაობა და სწავლის პროცესიც ჩატარება შეუძლებელია.”
“გურია ნიუსთან” ადგილობრივი მცხოვრები ბატონო ამირანი აცხადებს, რომ ჰყავს 2 შვილი.
“მინდა ჩემმა შვილებმა საბავშვო ბაღში იარონ, მაგრამ სოფელში ბაღი არაა. გადავწყვიტე წალკაში წამეყვანა ბავშვები, მაგრამ უარი მითხრეს, ჯერ ჩვენს ბავშვებს მივიღებთ, ადგილი თუ დაგვრჩა, შემდეგ მობრძანდითო. უკვე რამდენი ხანია ბავშვებისთვის საბავშვო ბაღში ადგილს ველოდებით, მაგრამ არ არის. მაინტერესებს, რატომ რ უნდა ისწავლოს ჩემმა შვილმა ბაღში? შეუძლია ვინმეს, გამცეს პასუხი?”
ადგილობრივი მცხოვრები ბატონი რეზო საუბრობს, რომ სოფელი იმერი 2003 წლიდან არსებობს. 10 წელია სოფელი სკოლის ახალ შენობას ითხოვს. მაგრამ, განათლების სამინისტრო ამ პრობლემით არ დაინტერესებულა.
“შვილებს განათლება რომ მივაღებინოთ, სკოლა არ გვაქვს. ეს სოფელი 2003 წლიდან ფუნქციონირებს. 80 კომლი ვართ სოფელში და ვითხოვთ სკოლის გახსნას. ყოველ შეხვედრაზე, დეპუტატი იქნება თუ ხელისუფლების წარმომადგენელი, დახმარებას ვთხოვთ. არც საბავშვო ბაღია
მივმართავთ ცენტრალურ ხელისუფლებას _ იქნებ, ჩვენი სურვილი გაითვალისწინონ და როგორმე ერთი ნორმალური სკოლის შენობა აგვიშენონ, როგორიც თბილისშია და თავიანთი “ბაღნები” რომ სწავლობენ, ჩვენმა “ბაღნებმაც” ისეთი განათლება მიიღონ. თუ ნორმალური პირობები იქნება, შეიძლება ისეთი სწავლული, განათლებული კაცი გამოვიდეს ამ სოფლიდან, რომ მთელი მსოფლიო იხსნას! ჩვენი პრობლემით განათლების სამინისტრო არ დაინტერესებულა. 2-ჯერ ტელევიზია იყო მოსული. მაგრამ, არაფერი. სხვა დანარჩენი, არავინ არ მოსულა.”
აპირებს თუ არა საქართველოს განათლებისა და მეცნიერების სამინისტრო წალკის მუნიციპალიტეტის სოფელ იმერში ახალი საჯარო სკოლის აშენებას და იქ არსებული მძიმე სიტუაციის მოგვარებას; “გურია ნიუსი” საქართველოს განათლებისა და მეცნიერების სამინისტროსთან არსებულ ინფრასტრუქტურის სააგენტოს პრესსამსახურის უფროსს თიკო ფეიქრიშვილს ესაუბრა. აღმოჩნდა, რომ განათლების სამინისტრო სოფელ იმერში ახალი სკოლის აშენებას 2014 წელში არ გეგმავს. როდემდე მოუწევთ ბავშვებს ცელოფანაკრულ საკლასო ოთახებში ყოფნა ჯერჯერობით უცნობია.
“საქართველოს მასშტაბით ბევრი რაიონია მძიმე სიტუაციაში. დეკემბერში 9 სკოლის მშენებლობა დაიწყო. შემდეგი ეტაპი კიდევ რამდენიმე სკოლა არის, რომლის მშენებლობაც დაიწყება. პარალელურად, მიდის რეაბილიტაცია. მაგალითად, ახლა რომ დავიწყეთ, მშენებლობა, იმ სკოლის მოსწავლეები 7 წლის განმავლობაში ბოსელში სწავლობდნენ. ყველგან უმძიმესი მდგომარეობაა. სადაც მშენებლობა დავიწყეთ, იქ სრულიად გაუსაძლისი პირობები იყო.
სამწუხაროდ, პრიორიტეტი უფრო უარესს აქვს მინიჭებული. ბოლომდე არ არის დადგენილი 2014 წელს რამდენი სკოლის მშენებლობა დაიწყება. ამ წუთისთვის შემიძლია გითხრათ, რომ ამ სკოლის მშენებლობა ბიუჯეტში არ არის ჩასმული”, _ განაცხადა ფეიქრიშვილმა.
