“ძვირფასო მეგობრებო,
ცხრამეტი წლის განმავლობაში მე სათავეში ვედექი საქართველოს ევანგელურ ბაპტისტურ ეკლესიას. ჩემთვის მძიმე, მაგრამ ძალიან საპატიო იყო ეს ჯვარი. მე მადლობას ვწირავ ღმერთს იმ წლებისათვის, რომელიც მე თქვენს გვერდში გავატარე. ეს იყო არა მარტო გაუთავებელი ბრძოლის, არამედ უზარმაზარი შემოქმედებითი საქმიანობის წლები.
ახლა მოვიდა იმის დრო, რომ ჩემი მსახურების ფარგლები შევკვეცო. ამიერიდან მე მინდა ჩემი დარჩენილი სიცოცხლის მეტი წილი დავუთმო: სამეცნიერო მუშაობას, საუნივერსიტეტო სწავლებას და სოციალურ მსახურებას.
რადგანაც ჩემი განსხვავებული დამოკიდებულება ჰომოსექსუალობასთან მიმართებაში ეკლესიის წინამძღოლისათვის შეუსაბამოდ მიიჩნია ჩვენი ეკლესიის მსახურთა უმეტესობამ, მე გამართლებულად არ მიმაჩნია, ვიყო ამ თემის წინამძღოლი.
მე მადლობას გიხდით ყველას წლების განმავლობაში ერთად გაწეული შრომისათვის და იმ მეგობრობისათვის, რომელსაც მე თქვენგან ვგრძნობდი.
მე ვტოვებ საქართველოს ევანგელურ ბაპტისტური ეკლესიის მთავარეპისკპოსის თანამდებობას და ქორეპისკოპოსს ვთხოვ შეასრულოს ეს მოვალეობა, ვიდრე მაისის თვეში არ გაიმართება ჩვენი ეკლესიის კრება, რომელიც აირჩევს ახალ მთავარეპისკოპოსს. პარალერულად, მე უარს ვამბობ სინოდის წევრობაზე. ასევე, თბილისის ეპარქიის წარმომადგენლებთან შეხვედრამდე, უარს ვამბობ ამ ეპარქიის მმართველობაზე.
ცხადია, მე უარს არ ვამბობ მხარში დაგიდგეთ ყველას ერთად და თითოეულს ცალკ-ცალკე, სადაც ეს საჭირო იქნება და შესაძლებელი. მე ვბრუნდები იქ, საიდანაც დავიწყე ჩემი საეკლესიო საქმიანობა. მე ვიმსახურებ იმ ეკლესიაში, სადაც დავიბადე და გავიზარდე – მშვიდობის კათედრალში, სადაც მე პასუხისმგებლობა მაქვს ნაკისრი, გავუძღვე მშვიდობის კათედრალის ცხოვრებისა და ლიტურგიის განახლების საქმეს.
ყველას გისურვებთ ბედნიერ შობას და დამდეგ ახალ წელს,” _ წერს განცხადებაში მალხაზ სონღულაშვილი.
ამასთან, როგორც იგი “გურია ნიუსთან” საუბრისას აღნიშნავს, მისი გადადგომა არამხოლოდ შიდ არამედ გარე ფაქტორებმაც განაპირობა.
“უნდა გადავდგე, რადგან შეუძლებელია მსახურება იმ ეკლესიაში, რომლის მსახურთა დიდი ნაწილი თვლის, რომ მიუღებელია ჩემი დამოკიდებულება ფობიების წინააღმდეგ ბრძოლის მიმართულებით. ეს არ არის მხოლოდ ერთი ფობია, ეს არის ფობიების კასკადი, რომელიც ჩვენი საზოგადოებისთვის არის დამახასიათებელი.
მე ვთვლი, რომ ქრისტიანობა არის სიყვარულის რელიგია. იქ, სადაც სიყვარულია, შეუძლებელია იყოს ფობია ნებისმიერი სახისა და ნებისმიერი ფორმის.
ამიტომ, ჩემი გადადგომაც არის ჩემი გადაწყვეტილების დასტური, რომ მე უნდა ვემსახურო იმ რელიგიას, სადაც სიყვარულია და არ შემიძლია კომფორმისტული დამოკიდებულება დავიკავო ამ შემთხვევაში, როდესაც საქმე ეხება ფუნდამენტალურ საკითხს – რელიგიაში ადამიანის მიღებისა ისეთის, როგორიც არის ის. ეს იყო საფუძველი ჩემი გადაწყვეტილებისა, რის გამოც მე გადავდექი.
გეტყვით, რომ ამ გადაწყვეტილებისაკენ მიბიძგა ორმა ფაქტორმა – შიდა და გარე ფაქტორებმა. ამ უკანასკნელის დეტალები დროთაგანმავლობაში უნდა დადგინდეს,” _ უთხრა სონღულაშილმა “გურია ნიუსს” და დასძინა, რომ იგი სამეცნიერო საქმიანობას თბილისის ერთ-ერთ უმაღლეს სასწავლებელში გააგრძელებს.
თანამდებობის ტოვებს ეპისკოპოსი რუსუდან გოცირიძეც, რომელიც სინოდის თავმჯდომარის პოზიციაზე უარის თქმის მიზეზად იმავეს ასახელებს, რასაც მთავარეპისკოპოსი სონღულაშვილი.
“მე გადავდექი სინოდის თავმჯდომარის თანამდებობიდან. ჯერ ერთი რომ ჩვენი საეკლესიო ცხოვრების ციკლის მიხედვით, ანუ ყოველ 4 წელიწადში ერთხელ ეკლესია ახალ გადაწყვეტილებებს იღებს როგორც ეკლესიის მეთაურთა, ისე სინოდის თავმჯდომარესთან მიმართებაშიც. ახლა სწორედ საეკლესიო კრებისთვის მოსამზადებელი ეტაპია. ამდენად, ჩემი გადადგომით რაღაც რადიკალური ცვლილება არ მომხდარა, რადგან გარკვეულ პერიოდში ეს საკითხი კენჭისყრაზე დადგებოდა,” _ აღნიშნავს რუსუდან გოცირიძე და დასძენს, რომ სინოდის თავმჯდომარის თანამდებობიდან ვადაზე ადრე გადადგომა მთავარეპისკოპოს მალხაზ სონღულაშვილის განცხადებამ გადააწყვეტინა.
“ჰომოსექსუალობასთან დაკავშირებული საკითხების გამო შეუთანხმებლობა ეკლესიის ღვთისმსახურებთან და იმის გამო, რომ ეკლესია შიდა თუ გარე პრობლემებისგან დაცული ყოფილიყო, მთავარეპისკოპოსმა ეს გადაწყვეტილება მიიღო და შესაბამისად, ლოგიკური იყო, რომ იმავე მიზეზის გამო, ჩემი ამ პოსტზე ყოფნა გაუმართლებელი იქნებოდა. ასე რომ, მე გადავდექი სინოდის თავმჯდომარის პოზოციიდან.
ნაბიჯი, რომელიც მთავარეპისკოპოსმა გადადგა არ იყო ადვილი, იმედია უკვალოდ არ ჩაივლის ის და სიმშვიდე დაივანებს,” _ უთხრა “გურია ნიუსს” რუსუდან გოცირიძემ.
