ახალი გუბერნატორი ამბობს, რომ ინტერნეტის უქონლობის გამო, ვებგვერდზე გამოქვეყნებულ მასალებს ჯერ ვერ გაეცნო, მაგრამ აუცილებლად გაეცნობა.
თუმცა, დოლიძის პერსონა მხოლოდ აღნიშნულ სტატიაში ჩამოთვლილ რამდენიმე ფაქტს არ უკავშირდება. ჟურნალისტებისთვის “თავზე პრო…..ის დამხობის” გარდა, იგი პოლიტიკურ სკანდალში არაერთხელ გაეხვია. 2012 წლის საპარლამენტო არჩევნებზე, მართალია გამგებელი აღარ იყო, მაგრამ “ნაციონალურ მოძრაობას’ უჭერდა მხარს და “ზონასაც” აკონტროლებდა. უფრო მეტიც, დოლიძის გვარი გახმაურებულ “დასაქმების საქმეშიც” ფიგურირებს. საქმეში, რომლის გამოც ყოფილი პრემიერ-მინისტრის ვანო მერაბიშვილი დღეს ციხეში ზის! (https://gurianews.com/home/2010-11-25-16-59-29/8135-2013-02-13-10-35-08.html).
მაშინ, როცა ეს საქმე გახმაურდა, “გურია ნიუსმა” არაერთი ვიდეო და ტექსტური მასალა შესთავაზა მკითხველს და მაყურებელს. ჩვენ ერთ-ერთი დაკითხვის ოქმიც მოვიპოვეთ, სადაც რწმუნებულის თანაშემწე ყოფილი გამგებლის და ახლა უკვე გუბერნატორის მოადგილეობის კანდიდატის სახელს და გვარს ახსენებს:
_ შერჩეულებიდან ორი, დაზუსტებით ვიცოდი, რომ “ქართული ოცნების” მხარდამჭერი იყო, თუმცა, რწმუნებულთან ერთად, შტაბთან შეთანხმებით მივიღეთ გადაწყვეტილება, რომ ისინიც გაგვეფორმებინა, რადგან სხვებთან თუ არ გაწევდნენ აგიტაციას, თავიანთ ხმას მაინც მისცემდნენ “ნაციონალურ მოძრაობას”. ამ ადამიანებს 240 ლარის სანაცვლოდ, პარტიულ შეკრებებზე სიარული ევალებოდათ. ჩვენ ზონას, ყოფილი გამგებელი მამუკა დოლიძე კურირებდა. ორჯერ თუ სამჯერ გამართა სოფელში შეხვედრა და ეს 6 კაცი დავახვედრეთ. ეს ადამიანები ბუკლეტების დარიგებაში, აგიტაციაში იღებდნენ ფულს, _ აღნიშნულია სოფელ ბუკისციხის რწმუნებულის თანაშემწის საბა კალანდაძის ჩვენებაში.
უცნობია დაიკითხა თუ არა ამ საკითხზე მამუკა დოლიძე, რადგან ამაზე კომენტარს არც შსს აკეთებს და არც პროკურატურა. თუმცა ცნობილია, რომ აქედან ერთ წელიწადში, დოლიძეს “ოცნების ნავში” უპრობლემოდ გადაჯდა.
როგორც მაშინ მამუკა დოლიძემ “გურია ნიუსს” უთხრა, მარგველაშვილის მხარდაჭერა ქვეყნის ინტერესებმა განაპირობა.
ჩვენს კითხვაზე უჭერდა თუ არა გასულ არჩევნებზე მხარს “ნაციონალურ მოძრაობას”, დოლიძე ასე პასუხობს: _ მერე რა?! რეალობა შეიცვალა; მარგველაშვილს მხარს იმიტომ ვუჭერ, რომ ასე ჯობია ქვეყნისთვის.
_ საინტერესოა, იქნებ გეშინოდათ “ნაციონალური მოძრაობის”?
– არა, რატომ? _ აღნიშნა დოლიძემ.
_ პროგრამის ფარგლებში გახორციელდება პროექტები გურიის მოსახლეობის სოციალურ-ეკონომიკური პრობლემების გადასაჭრელად, მოხდება თანამშრომლობა საერთაშორისო და ადგილობრივ დონორებთან, ჩატარდება ანალიტიკური კვლევები რეგიონის განვითარების დინამიკასა და პერსპექტივებთან დაკავშირებით, მოეწყობა გამოკითხვები დემოგრაფიულ და სოციალურ ეკონომიკურ საკითხებზე. მოხდება რეგიონის საინვესტიციო შესაძლებლობების ანალიზი, ინვესტიციების მოზიდვა და სხვა ღონისძიებები, _ ასე განმარტა 2012 წელს “გურიის განვითარების სააგენტოსთვის” ჩასმული ხარჯები საკრებულოს სხდომაზე გამგეობის საფინანსო სამსახურის უფროსმა ზურაბ ჩანტლაძემ.
აღსანიშნავია, რომ სხდომაზე მყოფი 23 დეპუტატიდან არც ერთს არ გასჩენია კითხვა, თუ რაში დახარჯა აღნიშნულმა სააგენტომ ბიუჯეტის თანხები. მით უმეტეს, რომ როცა ეს სააგენტო დააფუძნეს, სოციალურ საკითხთა კომისიის თავმჯდომარე, ზაურ ოსეფაიშვილი, რომელიც იმ დროს ჯერ კიდევ “ნაციონალი” იყო, საზოგადოებას პირობას აძლევდა, რომ სააგენტოს მუშაობას მკაცრად გააკონტროლებდა. თუმცა, როგორც ჩანს ეს პირობა არც მას და არც სხვებს, რომლებიც “ნაციონალებს” არჩევნებიდან ძალიან მალე გაემიჯნენ, აღარ ახსოვთ.
არადა, ე.წ. არასამთავრობო ორგანიზაციის ხელმძღვანელი, რომელსაც ცესკომ ორ თვეში 25 000 ლარით “მიუკერძოებლობისთვის” გრანტით დადააფინანსა, “გურია ნიუსთან” საუბრისას ამბობდა, რომ “გურიის განვითარების სააგენტო”… “სამთავრობო ორგანიზაციაა”! მისივე თქმით, სააგენტო იმას აკეთებს, რაც პროექტით არის გათვალისწინებული.
_ მერე რა, რომ საბიუჯეტო ორგანიზაცია ვარ? _ ასე პასუხობდა დოლიძე ჟურნალისტის კითხვას.
_ განაცხადში გარკვევით იყო მითითებული, რომ პროექტში მონაწილეობის მიღების უფლება არასამთავრობო ორგანიზაციას ჰქონდა…
_ ეგ არსად არ წერია (არადა, გარკვევით წერია. ავტ.) და გადახედეთ ჩემს დებულებას კარგად.
_ გადავხედეთ და ვიცით, რომ ოფიციალურად არასამთავრობო ორგანიზაცია ხართ, თუმცა, ასევე ოფიციალურად ხართ სამთავრობო და თქვენ ბიუჯეტი გაფინანსებთ.
_ იცით რას გეტყვით? თქვენ არ ხართ კომპეტენტური ამ საქმეში, გატყობთ.
_ ანუ?
_ ანუ ოფიციალურად მქვია, რომ არასამთავრობო ვარ,როგორია? დებულებაში წერია, რომ ეს არის არასამეწარმეო, არაკომერციული იურიდიული პირი. ეს ოფიციალურად არასამთავრობო არ არის. ეს არის ოფიციალურად სამსახური, _ დააზუსტა მაშინ დოლიძემ.
სამართლებრივი კუთხით, დაუზუსტებელი ბევრი რამ დარჩა; მათ შორის ბახმაროს სკანდალში მამუკა დოლიძის მონაწილეობაც. ჩოხატაურის მუნიციპალიტეტის ზედამხედველობის სამსახურის ყოფილი უფროსი, ვლადიმერ სიხარულიძე “გურია ნიუსის” ოფისში საგანგებოდ გამართულ პრესკონფერენციაზე ამბობდა, რომ არსებული კანონდარღვევის შესახებ დოლიძე ინფორმაციად პირადად მისგან ფლობდა. სიხარულიძე დოლიძის კაბინეტში შემდგარ საუბრის დეტალებსაც იხსენებდა და ამბობდა, რომ მის მიერ აღმოჩენილი კანონდარღვევების ხმამაღლა გახმაურების შემდეგ, სწორედ დოლიძის ხელმოწერით შევიდა საკრებულოში წერილი ზედამხედველობის სამსახურის გაუქმების შესახებ _ https://gurianews.com/home/2010-11-26-08-10-05/2170-qq———-.html.
“ბახმაროში ბევრჯერ ვცადე წასვლა, მაგრამ არ მიშვებდნენ _ არც ბენზინს მაძლევდნენ და არც მანქანას. მაღაზიაში ვსესხულობდი ფულს და ისე მივდიოდი. სანამ გამათავისუფლებდნენ, იმის გარკვევით ვიყავი დაკავებული, ვისი სახლები შენდებოდა შუაგულ რეკრეაციულ ზონაში. კარგად მახსოვს, პარასკევი იყო, ბახმაროდან ჩამოვედი და მაშინდელი გამგებლის მამუკა დოლიძის კაბინეტში შევედი. შემოვიდა ანტონ ხუნდაძეც. მამუკას ვუთხარი, პოლიციის უფროსის სახლის უკან, ტყეში, მიწაა გამოთხრილი და ვიღაც სახლის აშენებას აპირებს, რაც დაუშვებელია-მეთქი. ამ დროს, ანტონმა მითხრა, რა ვქნათ ძმაო, ეს მიწა ლელა თავართქილაძის (ყოფილი ვიცე-გუბერნატორი, ავტ.) და სამხარეო პოლიციის უფროსის სახლებისთვის გამზადდაო,” _ თქვა პრესკონფერენციაზე სიხარულიძემ.
იმდროინდელი სამხარეოს უფროსი, შოთა ჭანუყვაძე, ოფიციალურად სწორედ ბახმაროში უკანონოდ აშენებული სამი კოტეჯის გამო გაათავისუფლეს. ჭანუყვაძის კოტეჯებს კურორტის რეკრეაციული ზონის განადგურება მოჰყვა.
შოთა ჭანუყვაძე დღეს ანტიტერორისტული სამსახურის ერთ-ერთი მაღალჩინოსანია. მისი ძმა _ მერაბ ჭანუყვაძე კი გურიის ახალი გუბერნატორის მეორე მოადგილედ განიხილება.
“ლელა თავართქილაძე ჩემი მადლობელი იყოს, იქ რომ სახლის აშენება ვერ მოასწრო, თორემ დღეს სამსახურში არ იქნებოდა. მე არც თავართქილაძე მაინტერესებს და არც სხვა ვინმე, მე ჩოხატაურის ინტერესების დაცვას ვცდილობ. ამ საუბრიდან მეორე დღეს, შაბათს, ჩემი თანამშრომლები დაიბარეს და უთხრეს, რომ ან მე წავიდოდი სამსახურიდან, ან ისინი, ან კიდევ სამსახურს გააუქმებდნენ. როგორც კი ეს მითხრეს, დავწერე განცხადება, რომელსაც რიცხვი არ დავაწერე, გავატანე ჩემს თანამშრომელს და დავაბარე _ სამსახურიდან წავიდოდი იმ შემთხვევაში, თუ მექნებოდა გარანტია, რომ მათ სამსახურში დატოვებდნენ, იმ ადგილზე სახლი არ აშენდებოდა და სამსახურსაც არ გააუქმებდნენ. განცხადება უკან დამიბრუნეს. ამის შემდეგ, გამგეობას შეაქვს საკრებულოში დებულება, რომელშიც ზედამხედველობის სამსახური ამოღებულია. ეს ხდება 3 აგვისტოს. 17 აგვისტოს #33 დადგენილებით, საკრებულომ ადმინისტრაციულ წარმოებაში მიიღო ეს საკითხი. მაშინ ვუთხარი, რომ ამის უფლება არ ჰქონდათ, რადგან ეს არის დელეგირებული უფლებამოსილება, ამ სამსახურს აქვს სამშენებლო ზედამხედველობის ფუნქცია და გაუქმების უფლება თვითმმართველობას არ ჰქონდა. ჩოხატაურის გამგეობის ხელმძღვანელობა, რომელიც ტუალეტში ვერ გადის, თუ “ზემოდან” არ დართეს ნება, სამხარეოს მითითების გარეშე ამას ვერ გააკეთებდა. მაქვს დოკუმენტები, რომელიც ადასტურებს, რომ კომისიებმა უარი თქვეს სამსახურის გაუქმებაზე, რადგან ამის უფლებას კანონი არ აძლევდათ. ახლა მხოლოდ ერთი კომისიის გადაწყვეტილება არსებობს, სამი სადღაც გაქრა,” _ ამბობდა მაშინ სიხარულიძე.
თუმცა, ეს შემთხვევაც, სხვა მრავლის მსგავსად, გამოუძიებელი და უპასუხოა.
