შეგახსნებეთ, რომ მთავარი პროკურორის ოთარ ფარცხალაძის ნასამართლეობაზე განცხადება, თბილისის ყოფილმა მერმა გიგი უგულავამ გუშინ გააკეთა.
როგორც მთავარ პროკურატურაში, ასევე მთავრობაში აცხადებენ, რომ ინფორმაცია შეთხზულია და ის გარკვეული მოვლენების გადაფარვას ემსახურება.
თუმცა სასჯელაღსრულების, პრობაციისა და იურიდიული დახმარების საკითხთა მინისტრი სოზარ სუბარი აცხადებს, რომ ოპოზიცია ამ თემების გადაფარვას ვერ შეძლებს.
“მთავარი პროკურორი ალბათ თვითონ გააკეთებს განცხადებას, მაგრამ დარწმუნებული იყავით, ყველა გამოძიება მივა ბოლომდე. თუ ოთარ ფარცხალაძე ნასამართლევი იყო, გიგი უგულავას, თუ სხვა ადამიანებს უნდა სცოდნოდათ გაცილებით ადრე, ვინაიდან მას წარსულშიც ძალიან მაღალი თანამდებობები ეკავა. თუ მაშინ შესაძლებელი იყო, ემუშავა, ე.ი დღესაც შესაძლებელია, იმუშაოს. თუ მოგონილია, მაშინ ახლა რატომ მოიგონეს და თუ აქამდეც იცოდნენ, ახლა რატომ დაიწყეს ამის გამჟღავნება. ეს ყველაფერი არის პოლიტიკური თამაშები, რომ გაექცნენ კონკრეტულ ბრალდებებს”, _ აცხადებს სუბარი.
მთავარი პროკურორის ოთარ ფარცხალაძის მიმართ ნასამართლეობის შესახებ გამოთქმულ ბრალდებებს შეთხზულს უწოდებს საგარეო საქმეთა მინისტრი მაია ფანჯიკიძეც.
“გერმანიაში ჩემი დიდი ხნის მუშაობის გამოცდილებიდან შემიძლია გითხრათ, რომ პერსონალური მონაცემების მოპოვება ძალიან რთულია. ვერ წარმომიდგენია, რომელიმე ქვეყნის სასამართლოს ჰქონდეს უფლება, სხვა ქვეყნის მოქალაქეს აუკრძალოს არჩევნებში მონაწილეობის მიღება და თანამდებობის დაკავება ასეთი ხანგრძლივი ვადით. აქედან გამომდინარე, მიმაჩნია, რომ მთელი ეს ამბავი შეთხზულს ჰგავს”, _ განაცხადა ფანჯიკიძემ.
ანტიკორუფციული პალატის თავმჯდომარე პაატა შავაძე “გურია ნიუსთან” საუბრისას ამბობს, რომ მიუხედავად იმისა, გაქარწყლებულია თუ არა მთავრი პროკურორის ნასამართლეობა, მან თანამდებობა მაინც უნდა დატოვოს.
“რას ნიშნავს ნასამართლეობა გაქარწყლებულია? მთავარი პროკურორი ნასამართლევი შეიძლება იყოს? არათუ მთავარი პროკურორი, პროკურორიც კი არ შეიძლება ერქვას ყაჩაღობაში ბრალდებულ ადამიანს. მორალური საკითხია სამართლებრივს რომ თავი დავანებოთ. როგორია, როცა ვიცით, რომ ჩვენი ქვეყნის მთავარ პროკურორს ბრალი მიუძღვოდა ყაჩაღობაში და ნასამართლევიც ყოფილა. ვერანაირ კრიტიკას ეს საკითხი ვერ უძლებს. ნასამართლეობის გაქარწყლებას რაც შეეხება დანაშაულის სიმძიმის მიხედვით არის კონკრეტული ვადები დადგენილი. მიუხედავად იმისა, გაქარწყლებულია თუ არა ეს ნასამართლეობა, როგორც იურისტს მიმაჩნია, რომ არ არის მიზანშეწონილი, რომ მას პროკურორის პოსტი ეკავოს. რა უნდა მასწავლოს და როგორ უნდა მომიწოდოს მან წესრიგის და დისციპლინიკენ, როცა თვითონ მონაწილეობდა განსაკუთრებით მძიმე დანაშაულის ჩადენაში 2001 წელს?! თავმოყვარე ადამიანი დღეს თანამდებობაზე არ იქნებოდა. უამრავი საკითხი აგორდა მის მიმართ, მერიის მაღალჩინოსნების საქმიდან დაწყებული, მისი განათლების თუ ნასამართლეობის შესახებ, ამიტომ უნდა გადადგეს. საზოგადოებისთვის როცა მიუღებელი ხარ, ეს იმას ნიშნავს, რომ უნდა წახვიდე”, _ აცხადებს შავაძე.
მისივე თქმით, ის ეჭვი, რომ ფარცხალაძეს ვიღაც მფარველობს, საფუძველს მოკლებული არ არის.
“ვინმე რომ არ მფარველობდეს მას, მხარს არ უჭერდეს და ვინმეს პროტეჟე არ იყოს, ის მთავარი პროკურორის პოსტზე ვერ მოხვდებოდა, არ თქვას ფარცხალაძემ ის, რომ კონკურსის წესით დაინიშნა მთავარ პროკურორად. ვინც მას რეკომენდაცია გაუწია მთავარი პროკურორის პოსტზე ის არის მისი მფარველიც და მამაზეციერიც. ამიტომ ამ პიროვნებამ კეთილი ინებოს საკითხი მოიკვლიოს და დაგვარწმუნოს, რომ მთავარი პროკურორი კარგი ბიჭია”, _ უთხრა შავაძემ “გური ნიუსს”.
უპასუხებს თუ არა მთავარი პროკურორი ბრალდებებს, ან რა გადაწყვეტილებას მიიღებს, ჯერჯერობით უცნობია. მთავარი პროკურატურის განცხადებაში აღნიშნულია, რომ “სასჯელაღსრულების დაწესებულებაში მოთავსებულ პატიმარ ივანე მერაბიშვილთან შეხვედრაში დადანაშაულების შემდეგ, ოთარ ფარცხალაძის ყაჩაღად შერაცხვა ემსახურება ერთადერთ მიზანს, მთავარი პროკურორი ნებისმიერი ხერხით ჩამოაცილონ დაკავებულ თანამდებობას და პროკურატურის გამართულ საქმიანობაში დისონანსი შეიტანონ”.
საპარლამენტო უმცირესობის წევრ გივი თარგამაძის განცხადებით, მთავარი პროკურორი ოთარ ფარცხალაძე თავის დროზე საქართველოში ექსტრადირებული იყო.
ამის შესახებ თარგამაძემ ჟურნალისტებს, ფარცხალაძის ირგვლივ ატეხილი აჟიოტაჟის კომენტირებისას განუცხადა.
“არის კონკრეტული მონაცემები, ეს მონაცემები ჩვენ მოგვაწოდეს ძალიან ავტორიტეტულმა საერთაშორისო ორგანიზაციებმა, რომლებიც შეშფოთდნენ მთავარი პროკურორის ბოლოდოინდელი თავზე ხელაღებული ქმედებებით. მათ კონკრეტული ფაქტები მოგვაწოდეს, რომელთა გადამოწმებაც ძალიან ადვილია. გარდა ამისა, ეს ადამიანი იყო ექსტრადირებული საქართველოში ამ დანაშაულის ჩადენის შემდეგ. მან გარკვეული სასჯელი მოიხადა გერმანიაში და შემდეგ მოხდა მისი ექსტრადაცია სამშობლოში. რა თქმა უნდა, ეს საინტერესო მომენტია, რადგან ზოგადად, ექსტრადირების საფუძველს წარმოადგენს თავის ქვეყანაში ძებნა, ამიტომ საინტერესოა იმის გარკვევა, იყო თუ არა ის ძებნილი საკუთარ ქვეყანაში და ამის გამო მოხდა თუ არა ექსტრადირება და თუ ასე იყო, მაშინ სად გაქრა მისი ძებნის მასალები?”, _ განაცხადა თარგამაძემ.
ამასთან, მთავარი პროკურორის ნასამართლეობის შესახებ ინფორმირებული იყო მედიის ნაწილიც. ჟურნალისტ ნინო ზურიაშვილის თქმით, სტუდია “მონიტორი” ოთარ ფარცხალაძის ნასამართლეობის შესახებ ჯერ კიდევ ოქტომბერში იყო ინფორმირებული. მაშინ ფარცხალაძე ფინანსთა სამინსტროს საგამოძიებო სამსახურს ხელმძღვანელობდა.
“გურია ნიუსი” საკითხის გასარკვევად მთავარი პროკურატურის პრესსამსახურთან დაკავშირებას ცდილობდა, თუმცა, ამ დრომდე მათგან კომენტარი ვერ მივიღეთ.
