“გწერთ ყველასგან დაჩაგრული და მიტოვებული რაიონიდან, აბაშიდან. ისევე, როგორც სხვა რაიონებსა თუ ქალაქებში, აქაც მიმდინარეობს წინა საახალწლო მზადება, თუმცა, სხვა რაიონებისგან განსხვავებით, წელს აბაშაში უფრო ნაკლებად იგრძნობა სადღესასწაულო განწყობა და ახალი წელიც ჩვენთვის ერთი დღით ადრე მოდის. გაკეთდა გარე განათება, მაგრამ ნახევარი გაფუჭებული და უმოქმედოა, რაც ჩვენს ვიდეო კადრებშიც კარგად ჩანს. აბაშაში 31 დეკემბრის ნაცვლად საახალწლო კონცერტი 30 დეკემბერს გაიმართება, რადგან, როგორც ადგილობრივი ხელიუფლების წარმომადგენლები ამბობენ, “ახალი წლის ღამეს გამართულმა გალა კონცერტებმა არასოდეს გაამართლა” თურმე. ჯერ დაანონსებულიც არ არის, მაგრამ ამბობენ, 30 დეკემბერს კონცერტი კულტურის სახლის დარბაზში ჩატარდებაო, რადგან როგორც აბაშის გამგებლის მოვალეობის შემსრულებელი აღნიშნავს, “ღია ცის ქვეშ კონცერტი გარკვეულ ხარჯებთან არის დაკავშირებული, რაც ბიუჯეტში არ მოიპოვება. “ღია ცის ქვეშ და დარბაზში ჩატარებულ კონცერტებს შორის განსხვავება სცენაშია, ქალაქში უნდა დამონტაჟდეს, კულტურის სახლში კი არის. თუ ამ თანხაზეა საუბარი, მაშინ აქვე იბადება კითხვა: სად წავიდა იმ სცენის აღჭურვილობა, რომელიც შანრშან იყო დამონტაჯებული? სხვა მხრივ ხომ იგივე თანხა დაიხარჯება დახურულ დარბაზში ჩატარებული ღონისძიებაშიც?!
ალბათ, არ იყო ნება, თორემ შესაძლებელი იყო ადგილობრივი ხელისუფლების წარმომადგენლებს გაეთვალიწინებინათ ახალგაზრდების მოსაზრება და 31 დეკემბერს ისევე როგორც სხვა ქალაქებსა თუ რაიონებში, აბაშაშიც გამართულიყო საახალწლო ღონისძიება. ხომ შეიძლებოდა ჩვენს ქალაქშიც დროულად მოსულიყო ახალი წელი!
აბაშელი ახალგაზრდები”
“გურია ნიუსი” აბაშის განათლების, კულტურისა და ძეგლთა დაცვის სამსახურის უფროს დინარი გვაზავას დაუკავშირდა.
_ როგორც ვიცით საახალწლო კონცერტი აბაშაში 30 დეკემბერს ტარდება.
_ დიახ, 30 დეკემბერს ტარდება ჩვეულებრივი საახალწლო ღონისძიება.
_ რატომ გადაწყდა, რომ 31 დეკემბერს არ ჩატარებულიყო კონცერტი და აღნიშნულიყო ახალი წლის შემოსვლა?
_ საახალწლო კონცერტის ჩატარება დოგმა არ არის და როცა გინდა მაშინ ჩაატარებ. კონცერტი 30 დეკემბერს კულტურის სახლში ტარდება.
_ ღია ცის ქვეშ რატომ არ ტარდება კონცერტი? წერილში ახალგაზრდებს გამგებლის კომენტარი აქვთ მოყვანილი – “ღია ცის ქვეშ კონცერტი გარკვეულ ხარჯებთან არის დაკავშირებული, რაც ბიუჯეტში არ მოიპოვება.“
_ მე არ ვიცი, ვინ რა თქვა, მაგრამ აგიხსნით მარტივად. როცა კონცერტი ღია ცის ქვეშ ტარდება, მას უნდა თავისი ხარჯები, სცენა, განათება და კიდევ ბევრი რამ. არც იმით შავდება არაფერი, რომ კონცერტი ტარდება კულტურის სახლის დარბაზში, იმიტომ, რომ ტრადიციულად შიგნით ტარდებოდა ბოლო გამონაკლისი წლების გარდა. მგონი არა აქვს პრინციპული მნიშვნელობა სად და როდის ჩატარდება, მთავარია აღინიშნება, შეიძლება მერე ჩატარდეს საშობაო კონცერტებიც. ასე რომ სადღესასწაულო დღეები გრძელდება.
_ კონცერტებისთვის თანხა ადგილობრივი ბიუჯეტიდან არის გამოყოფილი?
_ ღონისძიებებისთვის არანაირი თანხები არ არის გამოყოფილი, კულტურის სახლს უკვე წლის დასაწყისში აქვს გაწერილი ეს ღონისძიებები და მიზერული თანხებით ხდება მათი განხორციელება. ასე რომ, თანხები ბიუჯეტიდან ნამდვილად აღარ არის გამოყოფილი.
