_ 28-29 დეკემბერს “სოფლის სოციოლოგთა კლუბისა” და საინიციატივო ჯგუფის ხელმძღვანელობით, ვაქირში ღონისძიება _ “ახალი წელი სოფლად” ჩატარდა. ორგანიზატორებს იდეის სისრულეში მოსაყვანად მხარში დაუდგნენ “სამოქალაქო ინიციატივა”, “მწვანე აკადემია”, “საქართველოს მწვანეთა მოძრაობა”, “რეგიონალური კინოს ასოციაცია” და “თსუ ეკო კლუბი”.
ღონისძიების ფარგლებში ვაქირის ახალგაზრდებმა და ჩასულმა სტუმრებმა დაამზადეს ხელნაკეთი სათამაშოები, მოაწყვეს დასუფთავების აქცია, გაიმართა მუსიკალური საღამო და ფილმის ჩვენება ვასო გოძიაშვილის სახელობის სახლ-მუზეუმში.
ფილმის ჩვენების შემდეგ ორგანიზატორებმა დისკუსია მოაწყვეს. ორი დღის განმავლობაში ვაქირელებს და ჩასულ სტუმრებს შესაძლებლობა ჰქონდათ, ეხილათ ცეცხლის შოუ. მხატვრებმა პატარა კუთხე მოიწყვეს და მსურველებს სახეზე ხატვას სთავაზობდნენ.
ღონისძიებაში ჩართვა ნებისმიერ მსურველს შეეძლო საახალწლო სათამაშოების, ინვენტარის ან სხვა სახის მატერიალური რესურსის მიტანით. მოხალისეები ორგანიზატორებს კრეატიული იდეებითაც შეუერთდნენ.
ჩვენ პროექტის ერთ-ერთ ორგანიზატორს, თემურ გუგუშვილს დავუკავშირდით, რომელმაც აღნიშნა, რომ ამ ტიპის პროექტი პირველად განახორციელეს.
_ კლუბს მსგავსი პროექტი ადრე არ ჰქონია, თუმცა, რამდენიმე ორგანიზატორს აქვს ამ ტიპის ღონისძიებაში მონაწილეობის გამოცდილება. წელს ეს პირველია და გვინდა, ტრადიციად ვაქციოთ. სოფელ ვაქირში სოციალურ-კულტურული ცხოვრება არ არის აქტიური, ამიტომაც, ჩვენი ღონისძიებით შევავსეთ ეს სიცარიელე. შემიძლია ვთქვა, რომ ჩანაფიქრმა გაამართლა. ღონისძიებაში აქტიურად მონაწილეობდნენ ადგილობრივი ახალგაზრდები, რომლებიც დიდი ენთუზიაზმით მონაწილეობდნენ ყველა ღონისძიებაში.
_ რატომ მაინც და მაინც ვაქირი?
_ რაც შეეხება სოფელ ვაქირს, ჩვენმა მხარდამჭერმა ორგანიზაციამ შემოგვთავაზა ეს სოფელი, აქ არის ვასო გოძიაშვილის სახელობის სახლ-მუზეუმი, რომელიც არის თითქმის უფუნქციო, ალბათ, ამ სოფლის არჩევა ამ უკანასკნელმა ფაქტორმა გადაგვაწყვეტინა. აუცილებელია ჩვენმა თაობამ დააფასოს ისტორია, არ შეიძლება ამ მუზეუმის ასე მიტოვება, ჩვენ სწორედ იქ შევიკრიბეთ და პირველი ნაბიჯი გადავდგით მისთვის სიცოცხლის დასაბრუნებლად.
_ რამდენადაც ვიცი ღონისძიება საქველმოქმედო ხასიათის მატარებელია.
_ დიახ, ღონისძიების სტუმრებს უგემრიელესი ტკბილეულით გავუმასპინძლდით. შემოსული თანხით, ტკბილეულით და საკუთარი ხელებით დამზადებული სათამაშოებით ვეხმარებით სოციალურად დაუცველ ოჯახებს.
_ კიდევ თუ აპირებთ სხვაგან ამ პროექტის გახორციელებას?
_ როგორც გითხარით, პროექტმა ნამდვილად გაამართლა, ამიტომ გვინდა ტრადიციად ვაქციოთ. ყველაფერი ფინანსებზეა დამოკიდებული, იმედია მხარდამჭერები გამოჩნდებიან და მომავალშიც შევძლებთ ასეთი ლამაზი განწყობა შევუქმნათ სხვა სოფლების მაცხოვრებლებსაც.
ახალგაზრდებმა სოფელი მორთეს და საახალწლო განწყობა შეიტანეს, ვაქირელები ახალ წელს ელოდებიან.
