პარლამენტის თავმჯდომარის პირველი მოადგილე, ხაზინადართა საბჭოს თავმჯდომარე მანანა კობახიძე “გურია ნიუსთან” საუბრისას აცხადებს, რომ დაზოგვა მოხდა სხვადასხვა კატეგორიაში: შრომის ანაზღაურებაში, კაპიტალურ და არაფინანსურ ხარჯებში, საწავავისა და სატელეფონო ლიმიტის შემცირებით.
“რაც შეეხება პრემიას, არცერთ დეპუტატს არ აუღია. პრემიები დაურიგდათ აპარატის თანამშრომლებს, მაგრამ არა ყველას, მხოლოდ დამსახურების მიხედვით. ეს არის ბიუჯეტის თანხა და რადგან ნაშთი დარჩა, იმას არ ნიშნავს, რომ უნდა გაგვეყო და ჯიბეში ჩაგვედო.
2013 წლის ბოლოს გარკვეული ნაშთი დარჩა აუთვისებელი ბიუჯეტში, მაგალითად ბარათებზე გადასვლამ გარკვეული ეკონომია გაწია საწვავის ხარჯვის თვალსაზრისით. ასევე, გადავედით საბარათე სისტემაზე მობილური ტელეფონის სარგებლობისას და აქაც დაიზოგა თანხა.
ზოგადად, საკანონმდებლო ორგანო უნდა იყოს მაგალითის მიმცემი ნებისმიერი ორგანოსთვის, ეს იქნება აღმასრულებელი სტრუქტურა თუ სხვა. ბიუჯეტის თანხებს უნდა მივუდგეთ ძალიან ყაირათიანად და ნებისმიერი თეთრი მიზნობრივად გამოვიყენოთ. არანაირი ფუფუნების უფლება ხელისუფლებას არ აქვს, როდესაც საზოგადოებაში ძალიან სერიოზული პრობლემები ჯერ კიდევ გადაუჭრელია. ვგულისხმობ სოციალურად დაუცველ ოჯახებს, იგივე ჩვენს დევნილებს, რომელთაც დახმარება გაეზარდათ, მაგრამ რა თქმა უნდა, არ არის საკმარისი.
ამ ფონზე, როდესაც ეკონომიკური მდგომარეობა არასახარბიელოა, ჩვენ არ უნდა მივცეთ თავს იმის უფლება, რომ ძვირადღირებული ავტომობილებით ვიაროთ, ან გადაჭარბებული ხარჯები გვქონდეს. შეიძლება ბიუჯეტში რაღაც ხარჯი არის, მაგრამ მისი გაწევა თუ სავალდებულო არაა, ის ბიუჯეტს უნდა დაუბრუნდეს და ისევ ხალხს მოხმარდეს.
_ მოხდა თუ არა ამ ხარჯების ეკონომია პრემიების ხარჯზე?
_ მე გეტყვით, რომ ის მავნე პრაქტიკა, რაც წლების განმავლობაში იყო, როდესაც დეპუტატები მუდმივად იღებდნენ პრემიებს, აღარ არსებობს. 2013 წელი, ალბათ პირველი წელია, როდესაც მე-13 ხელფასი და პრემია არ გაცემულა და არცერთ დეპუტატს მიუღია. რა თქმა უნდა, აპარატთან დაკავშირებით სხვა მიდგომა იყო, ამ შემთხვევაში გავეცით პრემია, მაგრამ ინდივიდუალური, იმის მიხედვით, ვინ რამდენად იმსახურებდა. არიან თანამშრომლები, რომლებზეც არ გაიცა ეს პრემიები.
კანონის დონეზე უნდა არსებობდეს ძალიან მკაცრი რეგულაციები. ეს არის ბიუჯეტის ფული და თუ არ არის საჭირო მისი გახარჯვა, უნდა დაუბრუნდეს ხაზინას. პრემიებზე გაცილებით მეტი საჭიროება არსებობს ამ ქვეყანაში, ამიტომ არ შეიძლება, საზოგადოების და მედიის კრიტიკას ადექვატურად არ ვუპასუხოთ.
მე პირადად, როდესაც საარჩევნო კამპანიას ვაწარმოებდი და მოსახლეობას ვხვდებოდი, მათ სერიოზული პრეტენზია ჰქონდათ იმაზე, რატომ იღებდნენ თვითონ 30 ლარიან დახმარებას და რატომ ირიგებდნენ ათასობით ლარის პრემიებს პარლამენტსა და სამინისტროებში.
ჩემი პირადი დაპირება იყო, რომ ეს აღარ მოხდებოდა და ახლაც ვაცხადებ, რომ არ უნდა ხდებოდეს. არავინაა იმის წინააღმდეგი, რომ ადამიანს ჰქონდეს ნორმალური ანაზღაურება, მაგრამ როცა ამხელა დისბალანსია და ერთის მხრივ 60 ლარს ვაძლევთ სოციალურად დაუცველებს და მეორეს მხრივ, ათასობით ლარის პრემიებზეა საუბარია, ეს კატეგორიულად მიუღებელია ჩემთვის. დარწმუნებული ვარ, მთავრობა ამ საკითხს გადახედავს.
_ პრემიერმა და ვიცე-პრემიერმა ამის შესახებ უკვე გააკეთეს განცხადება, მათ შორის ძვირადღირებულ შავ ჯიპებზეც…
_ ვიცი, რომ პრემიერის დონეზე ამ საკითხის შესწავლა მიმდინარეობს და ეს ყველაფერი საკანონმდებლო დონეზე გაიწერება. წერტილი უნდა დაესვას ამ მრავალათასიანი პრემიების გაცემას. ზოგჯერ აქვთ ხოლმე პრეტენზია და ამბობენ, ვმუშაობთ და ამიტომ ვიღებ ამ პრემიასო. გასაგებია, მაგრამ იმიტომ მოდიხარ ხელისუფლებაში, რომ იმუშავო. დასასვენებლად არავის ავურჩევივართ. ყველას გააზრებული გვქონდა, რომ ეს უმძიმესი საქმე იქნებოდა. თუ მხართეძოზე წამოწოლა გვინდოდა, ნუ ჩავერთვებოდით ამ საქმეში. ზოგი დახატავდა, ზოგი სცენაზე იდგებოდა, ზოგიც ფეხბურთს ითამაშებდა და მე პროცესებზე ვივლიდი. რადგან ეს გზა ავირჩიეთ, მაშინ აღარ უნდა ვიწუწუნოთ და ისე ვაკეთოთ საქმე. იგივეს ვურჩევ ყველა მინისტრს და ყველა თანამდებობის პირს.
