“ამ ეტაპზე გაგაცნობთ ვაკე–საბურთალოს რაიონის გამგეობაში ჩატარებული შემოწმების შედეგებს. საკვლევი პერიოდი მოიცავს 2012 წელს, რა პერიოდშიც გამოვლინდა შემდეგი სახის დარღვევები:
1. სადარბაზოებში მოძრაობის სენსორული სანათების დამონტაჟებისთვის გამოყოფილია 672 655 ლარი, საიდანაც დახარჯულია 617 790 ლარი. აღსანიშნავია, რომ ყველა ხელშეკრულება გაფორმებულია მხოლოდ ერთ მომსახურე ორგანიზაციასთან, შპს “თბილისი გრუპთან”.
ამ შემთხვევაში არსებობდა გამგეობის მიერ გამოცემული დადგენილების ძალადაკარგულად გამოცხადების საფუძველი, რადგან შემსრულებლის მიერ ფინანსური დოკუმენტაცია კანონით გათვალისწინებული ნორმების დარღვევით არის წარმოდგენილი.
2. სპორტული მოედნების კოორდინატორებთან არ არის გაფორმებული ხელშეკრულებები. შესაბამისად, კოორდინატორებს რაიმე ვალდებულებები არ უფიქსირდებათ, თუმცა მიუხედავად ამისა, მათი წახალისებისთვის გახარჯულია 51 000 ლარი. გარდა ამისა, გამოიკვეთა რამდენიმე შემთხვევა, როდესაც გამგეობის მიერ მომსახურების შესყიდვა განხორციელდა გადაუდებელი აუცილებლობიდან გამომდინარე, თუმცა რეალურად ეს აუცილებლობა არ არსებობდა.
ამასთანავე, ხელშეკრულების შესრულების კონტროლი და ინსპექტირება გამგეობის მხრიდან არ ხდება, თუმცა ეს მისი პირდაპირი ვალდებულებაა.
1. მაგალითად, სამშენებლო კომპანია “კოლხთან” გაფორმებული ხელშეკრულება შემსრულებელმა ვადაზე ადრე შეწყვიტა, თუმცა თებერვალში გაფორმებული ხელშეკრულების შეწყვეტის შესახებ გამგეობისთვის აგვისტოში გახდა ცნობილი, ისიც მხოლოდ შემსრულებელი კომპანიის მიერ გამგეობისთვის მიმართვის შემდეგ. ამის შემდეგ ვაკე–საბურთალოს გამგეობამ წერილობით მიმართა სადარღვევო კომპანია “ალდაგი ბისიაი”–ს (რომელიც შპს “კოლხის” გარანტორი იყო) და აღნიშნა, რომ შემსრულებელ ორგანიზაციას ხელშეკრულებით გათვალისწინებული სამუშაოები საერთოდ არ შეუსრულებია და შესაბამისად, ავანსად გაცემული თანხა (249 003 ლარი) მიმართულია არამიზნობრივად.
მეორე მხრივ, გამგეობამ მიმართა მერიას, რომ შპს “კოლხის” მიერ დაწყებული სამუშაოები უწყვეტად ყოფილიყო გაგრძელებული და ელექტრონულიტენდერისათვის საჭირო დროის და პროცედურების განმავლობაში არ მომხდარიყო რიგ მონაკვეთებზე უკვე განხორციელებული სამუშაოების განადგურება. ამავდროულად იგივე სამუშაოს შესრულებაზე გამგეობამ ერთ პირთან მოლაპარაკების გზით 1 000 000 ლარზე დადო ხელშეკრულება შპს “პარმასთან”.
2. ასევე გადაუდებელი აუცილებლობიდან გამომდინარე, აგვისტოში ერთ პირთან მოლაპარაკების გზით არის გაფორმებული ხელშეკრულება შპს “კომპანია ბლექ სი გრუპთან” (ხელშეკრულების ღირებულება 750 000 ლარი), თუმცა სამუშაოს შესრულების ვადა განსაზღვრულია 2012 წლის 31 დეკემბრამდე, რაც თავისთავად გამორიცხავს გადაუდებელი აუცილებლობის არსებობას. ამასთანავე, ხელშეკრულებაში არ არის მითითებული სამუშაოს შესრულების ზუსტი ადგილი, გაურკვეველია სად უნდა შესრულებულიყო სამუშაოები, მით უმეტეს, რომ აღნიშნული ხელშეკრულება დადებულია გადაუდებელი აუცილებლობის საფუძვლით. შესაბამისად, ხელშეკრულების დადების მომენტში შემსყიდველისათვის კონკრეტული მისამართები უნდა ყოფილიყო ცნობილი”, – განაცხადა მიხეილ ქავთარაძემ.
თბილისის საკრებულოს სარევიზიო კომისიის მიერ თბილისის რამდენიმე გამგეობის ფინანსური დოკუმენტაციის შემოწმების შედაგად გამოვლენილი კონკრეტული დარღვევების ამსახველი მასალები შემდგომი რეაგირებისთვის სამართალდამცავ უწყებებს გადაეგზავნება.
