განათლებისა და მეცნიერების მინისტრი, დიმიტრი შაშკინი “გურია ნიუსთან” საუბრისას ამბობს, რომ წელს აბიტურიენტთა მომზადების დონე, წინა წლებთან შედარებით, გაცილებით მაღალი იყო: _ ეს უნარებში გამოცდის შედეგებმა აჩვენა. მაღალი შედეგები კი, სკოლებში სწავლების ხარისხის გაზრდამ და ახალი პროექტების ამოქმედებამ განაპირობა. გაიზარდა აბიტურიენტთა რაოდენობა საბუნებისმეტყველო მიმართულებებით, სადაც ყველაზე მაღალი კონკურსია. მაღალი კონკურსი დაფიქსირდა უმაღლეს პროფესიულ პროგრამებზეც.
მინისტრის თქმით, გურიაში მოსწავლეებმა ცოდნის საკმაოდ კარგი შედეგი დააფიქსირეს: _ ოზურგეთის, ჩოხატაურისა და ლანჩხუთის სკოლების კურსდამთავრებულთა შორის, 22 ოქროსა და 30 ვერცხლის მედალოსანია. რეგიონის ყველა სკოლის მოსწავლემ წარმატებით გაართვა თავი საატესტატო გამოცდებს, მათ შორის რამდენიმე, შედეგების რეიტინგული სიის პირველ ასეულშია. გურიის რეგიონიდან აბიტურიენტთა 70%ა-მა უნარების შედეგების მიხედვით მაღალი შეფასება დაიმსახურა, _ ამბობს გაზეთთან საუბარში დიმიტრი შაშკინი.
მიუხედავად ამისა, განათლებისა და მეცნიერების სამინისტროს პირველი პირი მიიჩნევს, რომ დირექტორები, რომლებსაც თანამდებობები იმის გამო დაატოვებინეს, რომ მოსწავლეებმა საატესტატო გამოცდებში დაბალი ქულები მიიღეს, ამას იმსახურებდნენ:
_ სასწავლო პროცესის გამართულად წარმართვაზე პასუხისმგებელია სკოლის ადმინისტრაცია. ზოგადი განათლების შესახებ საქართველოს კანონის 35-ე მუხლი _ “პასუხისმგებლობა და სტრუქტურა”, განმარტავს: “საჯარო სკოლის მიერ ეროვნული სასწავლო გეგმის, ზოგადი განათლების სფეროში საქართველოს კანონმდებლობისა და საქართველოს განათლებისა და მეცნიერების სამინისტროს ინდივიდუალური ადმინისტრაციულ-სამართლებრივი” აქტების შესრულებაზე, სასწავლო-სააღმზრდელო პროცესსა და ფინანსების მიზნობრივ ხარჯვაზე, თავისი კომპეტენციის ფარგლებში, პასუხისმგებელია დაწესებულების დირექტორი, შესაბამისი სტრუქტურული ერთეული ან/და სტრუქტურული ერთეულის წევრი”. შესაბამისად, ზემოაღნიშნულ სკოლებში კანონის ეს მუხლი დარღვეულია, ასევე, დარღვეულია ყველა მოსწავლის უფლება, მიიღოს სრულყოფილი საშუალო განათლება. მე, როგორც მინისტრი, ვალდებული ვარ დავიცვა ყველა ბავშვის უფლება, მიიღონ სრულყოფილი განათლება, _ გვითხრა მინისტრმა.
შაშკინი არ აკონკრეტებს უნდა აგონ თუ არა პასუხი იმ პედაგოგებმა, რომლებმაც ვერ შეძლეს მოსწავლეებისთვის სრულფასოვანი განათლება მიეცათ (ვრცელ ინტერვიუს მინისტრთან ჩვენ უახლოეს ნომერში შემოგთავაზებთ).
არსებობს ინფორმაცია, რომ დირექტორების გათავისუფლების მიზეზი, მხოლოდ მოსწავლეთა დაბალი ქულები არ ყოფილა. წყაროს ინფორმაციით, თანამდებობები იმ დირექტორებს დაატოვებინეს, რომლებიც გასულ არჩევნებზე მმართველ პარტიას ჯეროვნად ვერ დაეხმარნენ და ოპოზიციურ აზროვნებაში “იყვნენ შემჩნეულები”. ამ ინფორმაციას განათლებისა და მეცნიერების მინისტრი აბსურდულს უწოდებს, თუმცა, წყარო ამტკიცებს, რომ ვაკანტურ ადგილებს “მგზნებარე ნაციონალისტები” დაიკავებენ.
“თავისუფლების ინსტიტუტის” წევრი, თეა თუთბერიძე, რომელიც წლებია განათლების სფეროში მუშაობს, “გურია ნიუსთან” საუბრისას ამბობს, რომ დირექტორების გათავისუფლება უკანონოდ მოხდა და ისინი შაშკინის ამბიციებს შეეწირნენ: _ დირექტორების გათავისუფლება გამართლებული კი არა, სისულელეა. რეალური, ფაქტობრივი მდგომარეობიდან გამომდინარე, დირექტორი არ იყო პასუხისმგებელი სკოლის ვითარებაზე. ანუ, სკოლების ინსტიტუციური დამოუკიდებულება დღეს საქართველოში პრაქტიკულად არ არსებობს. ისინი მეტისმეტად დამოკიდებულები გახდნენ განათლების სამინისტროზე იმ პოლიტიკის შედეგად, რომელსაც 2007 წლის შემდეგ ეს უწყება ახორციელებს და შესაბამისად, ეს ქმნის პრობლემას _ რეალურად, ამ ადამიანებს არ ეძლეოდათ საშუალება, მოეწვიათ ის პედაგოგები, რომლებსაც უკეთესი შედეგის მიღწევა შეეძლოთ. არ შეეძლოთ სკოლიდან დაეთხოვათ ის კადრები, რომლებიც ვერ ასრულებდნენ მასზე დაკისრებულ მოვალეობას და ა.შ. აქედან გამომდინარე, იმაზე საუბარი, რომ მოსწავლეთა დაბალ ქულებზე ადმინისტრაციაა პასუხისმგებელი, აბსურდია. დირექტორი რომ ყოფილიყო გადაწყვეტილების პროცესში თავისუფალი, მაშინ შეიძლებოდა მოგვეთხოვა მათი გათავისუფლება.
_ არსებული ინფორმაციით, თუ მედალოსნებმა შესაბამისი შედეგები ვერ აჩვენეს ეროვნულ გამოცდებში, დირექტორების გათავისუფლება ისევ მოსალოდნელია…
_ მე პირდაპირ გეტყვით, რომ შაშკინის ინტერესია, რაც შეიძლება მეტი დირექტორი გაუშვას და დანიშნოს თვითონ. ამ ადამიანს აქვს მანია და ჰგონია, რომ თავად არის საუკეთესო. პრინციპში, არ ჰგონია _ ჩემი აზრით ეს არის პირდაპირ კავშირში კორუფციასთან და ნეპოტიზმთან. საუბარია იმაზე, რომ ამ ადამიანს უნდა, ყველგან თავისი კადრი ჰყავდეს და არ აინტერესებს, დღევანდელი კადრები არიან თუ არა წარმატებულები და კვალიფიციურები.
_ გავრცელებული ინფორმაციით, დაბალი ქულები მხოლოდ მიზეზი იყო…
_ რა თქმა უნდა. ეს შაშკინის მისწრაფებების შეფუთვაა; თავიდან, მინისტრად რომ დაინიშნა, თავისი რეალური განზრახვა დავით პაიჭაძის გადაცემაში გაამჟღავნა და განაცხადა, რომ, თურმე, ვერ გაამართლა სამეურვეო საბჭოებმა და რომ, თურმე, სამეურვეო საბჭოებს არ შეუძლიათ კარგი დირექტორების არჩევა, რაც სრული სისულელე იყო. ამაზე მიიღო კიდეც პასუხი იმ ადამიანებისგან, ვისაც ესმის განათლების რეფორმა. მოსვლისთანავე, ტელეეთერით განაცხადა, რომ აპირებს გაუშვას ყველა სკოლის დირექტორი და თავად დანიშნოს. ვინაიდან ამის გაკეთების შესაძლებლობა არ მისცეს და არ მიეცა, ახლა სხვა ფორმით ახორციელებს ამ ყველაფერს. პირველი _ ჯერ სკოლებში შეიყვანა მანდატურები. რეალურად, შეიძლება ძალიან კარგია მანდატური და უსაფრთხო სკოლის იდეა, მაგრამ ეს იდეა დაამახინჯა იმ ფორმით, რა ფორმითაც დღეს ჩვენ მანდატურის ინსტიტუტი მივიღეთ და მეორე _ შაშკინი დირექტორებს კანონის დარღვევით და აბსურდული საფუძვლებით უშვებს.
_ შაშკინს ოპოზიციურად განწყობილი დირექტორები არ მოსწონს?
_ არა მხოლოდ ოპოზიციურად. შეიძლება განათლების მინისტრი შედიოდეს სკოლაში ყოველგვარი გაფრთხილების გარეშე, ხტებოდეს მანქანიდან, არბოდეს სართულებზე, ათვალიერებდეს სკოლას, ჩამორბოდეს 5 წუთში, ჯდებოდეს მანქანაში და მეორე დღეს იმ სკოლის დირექტორი იხსნებოდეს?! ეს არის დღევანდელი განათლების მინისტრის სახე.
თუთბერიძე ამბობს, რომ იმ დირექტორებს, რომლებიც მის ორგანიზაციას მიმართავენ, სამართლებრივ დახმარებას გაუწევენ: _ თუ უშუალოდ ეს დირექტორები არ მოგვმართვენ, შეუძლებელია მათ ნაცვლად ჩვენ რაიმე გავაკეთოთ. მათი სარჩელები, რომლებმაც უკვე მოგვმართეს დახმარებისთვის, განხილვის სტადიაშია, _ აღნიშნა თუთბერიძემ.
