წყალმომარაგების სფეროს საკვანძო პრობლემები

რომელიც მიზნად ისახავდა ქალაქში წყლის მიმწოდებელი ორგანიზაციის _ შპს “საქართველოს გაერთიანებული წყალმომარაგების კომპანიის” საქმიანობის შესწავლას, მისი მომსახურებით წყლის მომხმარებელთა კმაყოფილების დონის შეფასებასა და აღნიშნული კომპანიის მიერ კანონმდებლობით ნაკისრი ვალდებულებების შესრულების შედარებას ფაქტობრივად არსებულ სიტუაციასთან.

ანკეტური გამოკითხვის შედეგების პრეზენტაცია “საქართველოს დემოკრატიული განვითარების კავშირის” აღმასრულებელმა დირექტორმა, ლევან ხინთიბიძემ წარმოადგინა.
გამოკითხვის შედეგად, გამოვლენილი იქნა ქ. ოზურგეთის მოსახლეობის წყალმომარაგების სფეროში არსებული ყველაზე უფრო არსებითი და საკვანძო პრობლემები: 1) უმეტეს შემთხვევებში დაუდგენელია და აბონენტებისთვის უცნობია წყლის მიწოდების გრაფიკი; 2) პრობლემატურია აბონენტებისთვის მიწოდებული წყლის დაწნევა, განსაკუთრებით მრავალსართულიან საცხოვრებელ სახლებში (ოზურგეთელი აბონენტები წყლის მისაღებად ინტენსიურად იყენებენ დაწნევის გამაძლიერებელ სპეციალურ ტუმბოებს, რაც, ბუნებრივია, ზრდის მათ ყოველთვიურ კომუნალურ ხარჯებს); 3) ძალზე მწვავედ დგას წყლის ხარისხის საკითხი, რომელიც, გამოკითხული აბონენტების აბსოლუტური უმრავლესობის აზრით, არ არის უსაფრთხო ჯანმრთელობისთვის; 4) მოხმარებული წყლის საფასური არ არის წყალმომარაგების კომპანიის მიერ საკუთარი აბონენტებისთვის შეთავაზებული სერვისის ადეკვატური და თანაზომიერი; 5) არ არსებობს სასმელი წყლის მიმწოდებელსა და მომხმარებლებს შორის ურთიერთობის სახელშეკრულებო წესით მოწესრიგების პრაქტიკა, სადაც გაწერილი იქნება თითოეული მხარის უფლებები და ვალდებულებები… ქ. ოზურგეთის წყალმომარაგება ხორციელდება 24-საათიანი რეჟიმით 3 სატუმბი სადგურის და ერთი თვითდენითი ე. წ. “შემოქმედის” სათავიდან. კლიმატური პირობების გაუარესების შემთხვევაში, “შემოქმედის” სათავის ამღვრევისას, წყალმომარაგება ხორციელდება მხოლოდ სატუმბი სადგურების საშუალებით, 8-საათიანი გრაფიკით.
მოსახლეობის მიერ არსებული წყლის არამიზნობრივი და უყაირათო ხარჯვა, სისტემის მოუწესრიგებლობასთან ერთად, იწვევს ქსელში დაბალ წნევას.
შეხვედრის დასასრულს, “გურია ნიუსი” ამ თემასთან დაკავშირებით რამდენიმე რესპონდენტს ესაუბრა.
ავთო ინწკირველი: _ მხოლოდ ერთ რამ შემიძლია გითხრათ, რომ წყალი სასმელად არ ვარგა.
გურამ ხარაზიშვილი: _ მდგომარეობა უცვლელია _ მოდის ხრეშიანი წყალი, რამდენჯერმე გამოყვა წყალს წურბელა, ჭიაყელა. ეს კი სისტემის ბრალია _ წყალი ძველ მილებში არ შეიძლება რომ გადიოდეს და ამის გამო ხდება ეს ყველაფერი. გამგეობაში მივიტანე ეს ხრეშიანი წყალი, მაგრამ არანაირი რეაგირება ამას არ მოყოლია. 78 წლის ვარ და იძულებული ვარ წყალი ამოვიტანო მეზობლის კარმიდამოდან.
ნელი ლაგაზაშვილი: _ რამდენჯერმე ვიყავი წყალკანალში. განცხადება მივიტანე _ გამსახურდიას ქუჩაზე სავალალო მდგომარეობაა. წყლით შვილი და მეუღლე მომეწამლა 2010 წელს. პატარა ბავშვისთვის ვადუღებთ წყალს და ისე ვასმევთ. უფრო მეტად, სოფლიდან დაგვაქვს წყალი.
“საქართველოს დემოკრატიული განვითარების კავშირის” გამოკითხვის შედეგებზე “საქართველოს გაერთიანებული წყალმომარაგების კომპანიის” პრესსამსახურში შემდეგი სახის პასუხი მივიღეთ;
“კომპანია სისტემატურად აკონტროლებს სასმელი წყლის ხარისხს. 2013 წელს ოზურგეთის სერვისცენტრის ლაბორატორია აღიჭურვა თანამედროვე აპარატურით, რომელიც დადგენილი ნორმების მიხედვით სისტემატურად აწარმოებს სასმელი წყლის ქიმიურ და ბაქტერიოლოგიურ ანალიზს. სასმელი წყალი აბსოლუტურად უსაფრთხოა და მისი ხარისხი აკმაყოფილებს მოქმედ რეგლამენტს. მოსახლეობას, გარკვეული ეჭვის შემთხვევაში, შეუძლია მიმართოს ოზურგეთის სერვისცენტრს, სადაც შეუძლიათ მიიღონ ინფორმაცია სასმელი წყლის ხარისხის შესახებ, ხოლო საჭიროების შემთხვევაში, მოხდეს სასმელი წყლის ხარისხის დამატებითი შემოწმება.
სასმელი წყლის ტარიფის დადგენა არ არის კომპანიის პრეროგატივა _ მას ადგენს ეროვნული მარეგულირებელი კომისია (“სემეკი”), თუმცა, უნდა აღინიშნოს, რომ მოსახლეობისთვის დაწესებული ტარიფი უფრო სიმბოლური ხასიათისაა და იგი სრულად არ ასახავს სერვისის თვითღირებულებას, რის გამოც, მთავრობა ახორციელებს კომპანიის სუბსიდირებას.
მომხმარებლის უფლებები დაცულია მოქმედი ნორმატიული აქტების და მათ შორის “სემეკ”-ის სპეციალური დადგენილებით.
უნდა აღინიშნოს, რომ ამჟამად ქ. ოზურგეთში მიმდინარეობს წყალსადენის სისტემის სარეაბილიტაციო სამუშაოები, რომელიც ითვალისწინებს სატუმბი და საქლორატორო სადგურების სრულ განახლებას, მონტაჟდება თანამედროვე წყლის გაუსნებოვნების აპარატურა და ტუმბო-აგრეგატები. ასევე, დაწყებულია მიწისქვეშა დრენაჟების დამცავი დამბის მშენებლობა. სამუშაოები დამთავრების სტადიაშია და მათი დასრულების შემდეგ, ქ. ოზურგეთის წყალმომარაგება გახდება უფრო სტაბილური.
ევროპის საინვესტიციო ბანკის დაფინანსებით, 28 ქალაქის წყალსადენის სისტემების რეაბილიტაციის პროგრამაში გათვალისწინებულია ქ. ოზურგეთის წყალსადენის ქსელების და სისტემების რეაბილიტაცია. დამუშავებულია პროექტი, რომლის საორიენტაციო ღირებულება 3.8 მლნ. ლარია. სამუშაოების დაწყება გათვალისწინებულია მიმდინარე წელს.”