ხორცი, თევზი, რძის პროდუქტები, ნაყინი… _ ეს მცირე ჩამონათვალია იმ მალფუჭებადი პროდუქტებისა, რომელთა შენახვა-რეალიზაციის პირობები ყველაზე ხშირად ირღვევა.
მზის გულზე დალაგებული პროდუქტი, გამორთულ მაცივრებში ჩალაგებული ნაყინი და ბუზების ჭარბი რაოდენობა, მომხმარებლის ჯანმრთელობას სულ უფრო მეტად აზარალებს.
ექსპერტები ვარაუდობენ, რომ საქართველოს სასურსათო სამომხმარებლო ბაზარზე დიდია ფალსიფიცირებული, უხარისხო პროდუქციის წილი. ხშირია სანიტარული ნორმების დარღვევა. თუმცა, მსგავსი შემთხვევების ზუსტი მაჩვენებელი უცნობია.
პროდუქციის ხარისხისა და უვნებლობის უგულებელყოფა, მძიმე სოციალური ფონი მეწარმეს ბაზარზე უფრო დაბალი ხარისხისა და საეჭვო შემადგენლობის პროდუქციის გამოტანისკენ უბიძგებს და არაჯანსაღ კონკურენციამდე მივყავართ, სადაც “ბრძოლისუნარიანი” მხოლოდ დაბალფასიანი პროდუქტია.
სპეციალისტების თქმით, მალფუჭებადი პროდუქტების შენახვის პირობებისა და ვადების დარღვევა პროდუქციაში არამარტო ლპობას იწვევს, არამედ პათოგენური მიკროორგანიზმების სწრაფ გამრავლებას. რაც, თავის მხრივ, მწვავე ნაწლავური დაავადებების მიზეზი შეიძლება გახდეს.
სურსათის უვნებლობის, ვეტერინარიისა და მცენარეთა დაცვის ეროვნულ სამსახურში აცხადებენ, რომ მონიტორინგს რეგულარულად აწარმოებენ და დარღვევის აღმოჩენის შემთხვევაში, ადეკვატურად რეაგირებენ.
მალფუჭებადი პროდუქციის მართებული შენახვა-რეალიზაციით ვერც გურია დაიკვეხნის. ბაზარში ხშირად ნახავთ მზის გულზე დალაგებულ თევზს, ხორცს, ყველს. გარდა იმისა, რომ ამ პროდუქტებს მაღალი ტემპერატურა აზიანებს, მათ მწერებიც დიდი მონდომებით ეტანებიან. ხშირად ნახავთ გამორთულ მაცივარში ჩალაგებულ პროდუქციას და გამყიდველის სანიავებლით დაფრთხობილ მწერებს. ამ პირობებში, ბუნებრივია, რომ საკვებით მოწამვლის შემთხვევები სულ უფრო იმატებს. თუმცა მომხმარებელი, დაზღვეული არც მაშინ არის, როცა მარკეტში იძენს პროდუქციას.
თავად გამყიდველები ამბობენ, რომ მწერები ყველგან არის და ეს პროდუქციას საფრთხეს არ უქმნის. თუმცა, ფაქტები სხვა რამეზე მიუთითებენ.
სურსათის ეროვნული სააგენტოს ბიუროს გურიის რეგიონული სამმართველოს სპეციალისტი, გენადი კვერენჩხილაძე “გურია ნიუსთან” საუბარში აცხადებს, რომ კონკრეტულად ოზურგეთის ტერიტორიაზე, სურსათის ეროვნულმა სააგენტომ და ზედამხედველობის სამსახურმა რეიდი რამდენიმე დღის წინ ჩაატარა და ყველა კანონდამრღვევს მიეცა სიტყვიერი გაფრთხილება.
თუმცა, არავინ აკონკრეტებს, ვინ დაჯარიმდა და კონკრეტულად, რა მოტივით. ფაქტი ის არის, რომ ოზურგეთში პროდუქციის დიდი ნაწილი დღემდე მზის გულზე იყიდება.
როგორც ცნობილია, მალფუჭებადი პროდუქციის შენახვა-რეალიზაციის საკითხს სურსათის უვნებლობისა და ხარისხის შესახებ კანონი არეგულირებს. აღნიშნული კანონის თანახმად, ბაზარზე მოხვედრილ პროდუქციაზე პასუხისმგებელი კონკრეტული მაღაზიის მეპატრონეა. რაც შეეხება სახელმწიფოს, მისი რეაგირება თავდაპირველად სიტყვიერი გაფრთხილებით შემოიფარგლება. ამის შემდეგ, მათ ეძლევათ ე.წ “გონივრული ვადა”, ანუ რაღაც პერიოდი, რომლის განმავლობაში მეპატრონემ პრობლემა უნდა მოაგვაროს. წინააღმდეგ შემთხვევაში, 400 ლარით, კიდევ ერთი დარღვევის შემდეგ კი _ 1200 ლარით დაჯარიმდება.
მომხმარებლები მიიჩნევენ, რომ მათი ჯანმრთელობა საფრთხეშია, კნინდება მათი უფლებებიც. სახელმწიფოს კი დიდი სპექტრის გასაკონტროლებლად ძალიან სუსტი ბერკეტები აქვს.
მომხმარებელთა უფლებების დაცვის საერთაშორისო ორგანიზაციას მიაჩნია, რომ ამ საკითხზე ყურადღება უნდა გაამახვილონ თავად მეწარმეებმაც და ისინიც უნდა იყვნენ დაინტერესებული, თუ რა პირობებში ინახება მათი პროდუქცია, რადგან ეს მათი კომპანიის რეპუტაციაზე აისახება. ამასთან, ორგანიზაცია ურჩევს მომხმარებლებს, დაიცვან საკუთარი უფლებები და პროდუქციის შეძენისას, ყურადღებით იყვნენ. მათი მოთხოვნაა, ბაზრობებსა და საბითუმო მაღაზიებში არსებული სანიტარული ნორმების დარღვევით დაინტერესდნენ სამართალდამცავი ორგანოები.
“ცხადია, რომ მხოლოდ სიტყვიერი გაფრთხილება პრობლემას ვერ აგვარებს, რეალური ქმედებები კი, ჯერჯერობით, არ ჩანს. ჩვენ კი რითი ვიკვებებით და რას ვსვამთ, დღემდე არ ვიცით”, _ გვითხრა 37 წლის დიასახლისმა, რომელიც პროდუქტების შესაძენად ერთ-ერთ მარკეტში შედიოდა.
როგორც მომხმარებელთა უფლებების დაცვის საერთაშორისო ორგანიზაციაში ამბობენ, მონიტორინგს საბითუმო ბაზრობებზე საქართველოს რეგიონებშიც განახორციელებენ.
