საუბარია 51-ე მუხლზე, რომლის თანახმად პირდაპირი წესით არჩეული მერის ან გამგებლის გადაყენება,საკრებულოს უმრავლესობის გადასაწყვეტი იქნება. აღნიშნულ მუხლს უმცირესობა იწუნებს. გია თევდორაძე აღნიშნავს, რომ ეს მუხლი კანონპროექტიდან ამოსაღებია, რადგან მოსახლეობის მიერ არჩეული თანამდებობის პირების დამოუკიდებლობის საკითხი ეჭვქვეშ არ უნდა დადგეს.
უმცირესობა სამხარეო საკონსულტაციო საბჭოებში, ფრაქციების თავმჯდომარეების ჩართულობასაც მოითხოვს, რადგან ოპოზიციურ ძალებსაც მიეცეს საშუალება ჩაერიოს არსებული საბჭოს მუშაობაში.
“მინდა განვაცხადო, რომ ის თვითმმართველობის კოდექსი, რომელიც შემოგვთავაზა ხელისუფლებამ ძალიან ბევრ პასუხგაუცემელ კითხვებს შეიცავს. ჩვენ შევიტანეთ ალტერნატიული ვარიანტი, სადაც ვფიქრობთ რომ, პრიორიტეტული და ალტერნატიული საკითხებია, რომლის ნაკლოვანებასაც განიცდის შემოთავაზებული კანონპროექტი, შეძლებისდაგვარად დავაბალანსეთ.
ჩვენ მიგვაჩნია, რომ კანონში არსებული 51 მუხლი, რომელიც პირდაპირი წესით არჩეულ მერებისა და გამგებლების საკრებულოს მიერ გადაყენების საკითხს შეიცავს, უნდა ამოიღონ. პირდაპირი წესით არჩეული მერებისა და გამგებლების დამოუკიდებლობის ხარისხი უნდა იყოს შესაბამისად დაცული.
ჩვენს ალტერნატიულ ვარიანტში იყო ერთ-ერთი პუნქტი, რომელიც ფრაქციის თავმჯდომარის, როგორც თანამდებობის პირის ჩაწერას მოითხოვდა, ორგანულ კანონში, რაზეც გუშინ კონსესუსს მივაღწიეთ. ამიტომ, ჩვენ ეს მუხლი ამოვიღეთ ალტერნატიული ვარიანტიდან, მაგრამ გვრჩება მეორე ქვეპუნქტი, რასაც ჰქვია, სამხარეო საკონსულტაციო საბჭოში აი ამ ფრაქციის თავმჯდომარეების მუშაობაში მონაწილეობის მიღება, რადგან მიგვაჩნია რომ, მხოლოდ გამგებლების, საკრებულოს თავმჯდომარეებისა და მათი მოადგილეების დონეზე საკონსულტაციო საბჭოში შემადგენლობის განსაზღვრა მხოლოდ ხელისუფლების და მმართველო პარტიის მუშაობას უზრუნველყოფს და ოპოზიციას არ ექნება ჩართვის საშუალება ამ მნიშვნელოვან წარმომადგენლობით ორგანოში”, _ განაცხადა საპარლამენტო უმცირესობის წევრმა გია თევდორაძემ.
უმცირესობა ყურადღებას თვითმმართველი ქალაქების რაოდენობაზეც ამახვილებს და ალტერნატიულ პროექტში ავტორებს სთავაზობს, რომ იმ დასახლებულ პუნქტებს, სადაც მოსახლეობის რაოდენობა 10 000-ს აღემატება, თვითმმართველი ქალაქების სტატუსი მიენიჭოს, რის შედეგადაც მათ რიცხვს დაახლოებით კიდევ 28 ასეთივე სტატუსის მქონე ქალაქი დაემატება.
უმცირესობა ხელისუფლებას ასევე სოფლის რწმუნებულების პირდაპირი წესით არჩევას სთავაზობს, რადგან მიაჩნიათ, რომ ამ შემთხვევაში რწმუნებული მოსახლეობის ინტერესების გამტარებელი იქნება და არა გამგებლის.
“მესამე მოთხოვნა თვითმმართველო ქალაქების სტატუსის განსაზღვრას შეეხება, მოსახლეობის რაოდენობის მიხედვით. ჩვენ ვთვლით, რომ 10 000-ს ზემოთ, სადაც არის მოსახლეობა იმ დასახლებულ პუნქტებს მივანიჭოთ თვითმმართველო ქალაქების სტატუსი და ამ შემთხვევაში, 7 -ის ნაცვლად მეტი, დაახლოებით 28 თვითმმართველი ქალაქი დაემატა თვითმმართველო ქალაქების რიცხვს. მეოთხე მოთხოვნას რაც შეეხება, ეს არის სოფლის რწმუნებულების პირდაპირი წესით არჩევა. ჩვენ მიგვაჩნია, რომ სოფლის მოსახლეობას უნდა ჰქონდეს აღმასრულებელ რგოლში საკუთარი წარმომადგენლის არჩევის უფლება, რადგან რწმუნებული პირველ რიგში ვალდებული იქნება მისი ამომრჩევლის წინაშე და არ იქნება გამგებლის ინტერესების გამტარებელი. ეს არის ის ძირითადი პუნქტები, რომელიც ჩვენს მიერ შემოთავაზებულ ალტერნატიულ ვარიანტშია და იმედი გვაქვს უმრავლესობა ამას რაციონალურად და პრაქტიკულად მიუდგება. არსებული შემოთავაზებული კანონპროექტი კი ვერანაირ კრიტიკას ვერ უძლებს”, _ განაცხადა გია თევდორაძემ.
თვითმართველობის კოდექსის მუხლობრივი განხილვა საკანონმდებლო ორგანოში ამ წუთებშიც მიმდინარეობს.
