მინისტრმა შეხვედრის მონაწილეებს 2013 წელს განხორციელებულ პროექტებს და 2014 წლის გეგმები გააცნო.
დავით ნარმანიამ სამინისტროს საქვეუწყებო დაწესებულებების წარმომადგენლებთან ერთად დაწვრილებით ისაუბრა სამინისტროს სამომავლო გეგმებზე და უწყების მიერ არჩეულ პრიორიტეტებზე. შეხვედრის დასასრულს კი მედიის წარმომადგენელთა შეკითხვებს უპასუხა.
“რეგიონულ მედიასთან ჩვენი შეხვედრა მიზნად ისახავს იმას, რომ რეგიონებში მცხოვრებ მოქალაქეებს მივაწოდოთ ინფორმაცია, თუ რა გავაკეთეთ გასული წლის განმავლობაში და რა გვაქვს დაგეგმილი 2014 წელს. ძალიან მნიშვნელოვანია ანგარიშის ჩაბარება ერთი მხრივ, ღიაობისა და გამჭვირვალობის კუთხით, მეორე მხრივ, მოსახლეობის ინფორმირებულობის,” _ განაცხადა დავით ნარმანიამ.
მინისტრის მიერ წარმოდგენილი ანგარიშის მიხედვით, 2013 წელს სამინისტროს ბიუჯეტი 901 მილიონ ლარს შეადგენდა, 2012 წელს კი სამინისტროს შესრულება 655 მილიონი ლარი იყო, ანუ 2013 წელთან შედარებით 90 მილიონით ნაკლები. 2014 წელს კი რეგიონული განვითარებისა და ინფრასტრუქტურის სამინისტროს ბიუჯეტი 875 მილიონ ლარს შეადგენს. აქედან საგზაო ინფრასტრუქტურაზე 501 მილიონი ლარი დაიხარჯება, რეგიონული და მუნიციპალური ინფრასტრუქტურის რეაბილიტაციისთის – 187 მილიონი ლარი, წყალმომარაგების ინფრასტრუქტურის აღდგენა-რეაბილიტაციისთის კი – 131 მილიონი ლარი, იძულებით გადაადგილებული პირების მხარდაჭერისთვის – 50 მილიონი ლარი. რეგიონებისა და ინფრასრტრუქტურის განვითარების პოლიტიკის შემუშავებისა და მართვისთვის – 5 მილიონი ლარი.
გარდა ამისა, მინისტრის ინფორმაციით, გაერთიანებული წყალმომარაგების კომპანიას 16 მილიონი ლარი გამოეყო, “თეთნულდი დეველოპმენტს” 10, 6 მილიონი ლარი, მყარი ნარჩენების მართვის კომპანიას კი – 10 მილიონი.
ჯამში კი სამინისტრო 2014 წელს 911 მილიონ ლარზე მეტს დახარჯავს.
“სამინისტროს დაფინანსების 2/3 დონორი ორგანიზაციებიდან ფინანსდება, 1/3 კი საბიუჯეტო დაფინანსებით. წინა წელს 783 მილიონი ლარი დაიხარჯა სამინისტროს მიერ გაწერილ პრიორიტეტულ საკითხებზე, 2014 წელს კი რეგიონული განვითარების და ინფრასტრუქტურის საკითხებზე მუშაობას გაცილებით ადრე ვიწყებთ, ამიტომ შესაძლებლობა გვექნება პრობლემების გადასაჭრელად 900 მილიონ ლარზე ეტი დავხარჯოთ. აქედან კი ყველაზე მეტი დაფინანსება გზების დეპარტამენტზე მოდის. ასევე აღებული გვაქვს რამდენიმე პრიორიტეტი, რაზეც წინა წელთან შედარებით მეტი თანხის დახარჯვას და პრობლემის მოგვარებას ვაპირებთ. მათ შორის არის არა მარტო გზების და ინფრასტრუქტურის მოწყობა, არამედ ახალი ამბულატორიების მშენებლობა, წყლის სისტემების მოგვარება, ნაგავსაყრელების და ნარჩეების გადამამუშავებელი ინფრასტრუქტურის მოწყობა და ა.შ. ვგეგავთ 81 ახალი ამბულატორიის და ერთი გადაუდებელი ცენტრის მშენებლობას, რაზეც ჯამში 2 მილიონ 400 ათასი ლარი გამოიყოფა. გარდა ამისა, რეგიონებში დამტკიცებულია 430 პროექტი, რისთვისაც უკვე გამოყოფილია 135 მილიონი ლარი,” _ განაცხადა მინისტრმა.
შეხვედრისას იგი სოფლის განვითარების პროგრამებსაც შეეხო და აღნიშნა, რომ მოქალაქეთა ინდეფერენტულობის გამო, ხშირ შემთხვევაში ვერ ხერხდებოდა აღნიშნული პროექტით მათი საჭიროებების გადაწყვეტა.
“გვაქვს კვლევა ჩატარებული სოფლის განვითარების პროგრამებზე და როგორც აღმოჩნდა, ხშირ შემთხვევაში, ვერ ხერხდებოდა მოსახლეობის საჭიროებების მიხედვით პრობლემის მოგვარება. ეს კი ჩართულობის პრობლემის და ისევ მოსახლეობის ინდეფერენტულობის გამო ხდებოდა. გასაგებია, რომ ხალხს ეზარება კრებებზე მისვლა და პრიორიტეტების დასახვა. დამოკიდებულება აქვთ, რომ რაც არ უნდა თქვან, ადგილობრივი ხელისუფლება მაინც თავისი შეხედულებისამებრ გადაწყვეტს რა დააფინანსოს. ახლა ვაპირებთ გავაკონტროლოთ კრებები სოფლებში, რომ ეს ინდეფერენტულობა მოვხსნათ და მოსახლეობა მათი საჭიროებების გადაწყვეტაში მაქსიმალურად ჩავრთოთ,” _ განაცხადა ნარმანიამ.
