შეგახსენებთ, 2012 წლის საპარლამენტო არჩევნების შემდეგ, როცა კოალიცია “ქართულმა ოცნებამ” გაიმარჯვა, ბიძინა ივანიშვილი პრემიერ-მინისტრი გახდა. თუმცა 1 წლის შემდეგ, 2013 წლის მიწურულს, მან თანამდებობა დატოვა და განაცხადა, რომ სამოქალაქო სექტორში გადადის.
მანამ, ყოფილ პრემიერს არაერთხელ დაუანონსებია მისი პოლიტიკიდან წასვლა.
გუშინ კი ცნობილი გახდა, რომ ყოფილმა პრემიერ-მინისტრმა ბიძინა ივანიშვილმა არასამთავრობო ორგანიზაცია “მოქალაქე” დააფუძნა, რომელსაც თავად უხელმძღვანელებს.
“არასამთავრობო ორგანიზაციის მიზანი ქვეყანაში სამოქალაქო საზოგადოების განმტკიცებაა,” _ ნათქვამია ორგანიზაციის პრესსამსახურის მიერ გავრცელებულ განცხადებაში.
ორგანიზაციის ხედვისა და მიზნების შესახებ მისი დამფუძნებელი დაწვრილებით 28 იანვარს, ქართული და საერთაშორისო მედიის წარმომადგენლებთან შეხვედრისას ისაუბრებს.
როგორც ორგანიზაციის შესახებ განთავსებულ ინფორმაციაშია ნათქვამი, დასახული მიზნის მისაღწევად ორგანიზაცია ხელს შეუწყობს ქვეყნის დემოკრატიულ, ეკონომიკურ, სოციალურ საგანმანათლებლო და კულტურულ განვითარებას, იზრუნებს საქართველოს დამოუკიდებელი და პასუხისმგებელიანი მედიის განვითარებისათვის, იღვაწებს, ქვეყანაში ადამიანის უფლებებისა და თავისუფლებების დაცვისა და განმტკიცებისათვის, ხელს შეუწყობს სახელმწიფოში სამართლის უზენაესობის პრინციპების დამკვიდრებას, შეიმუშავებს საქართველოს ტერიტორიული მთლიანობის მშვიდობიანი აღდგენის კონცეფციას, რისთვისაც გამოიყენებს, ხალხთა და კულტურათა დაახლოების ტრადიციულ და კანონიერ მეთოდებს, გამოკვეთს საქართველოს როლს და შესაძლებლობებს მიმდინარე გლობალურ და რეგიონალურ პროცესებში და განსაზღვრავს მათ გავლენას საქართველოზე და რეგიონზე.
“მოქალაქე” ორგანიზებას გაუკეთებს ბეჭდვით გამოცემას, შექმნის ვებ-გვერდს, გამოსცემს ორგანიზაციის საქმიანობის გზამკვლევს, გაავრცელებს ინფორმაციას მასობრივი საშუალებებით.
ორგანიზაცია აპირებს, რომ იზრუნოს ეროვნული მეურნეობის აღდგენასა და განვითარებაზე, ხელი შეუწყოს ქვეყნის რეგიონებისა და სხვა ტერიტორიული ერთეულების თანაბარ და მდგრად განვითარებას.
“ორგანიზაცია ქვეყნის განვითარებისა და დემოკრატიული გარდაქმნის პროცესში ჩართავს უცხოეთში მცხოვრებ ქართველებს და გამოიყენებს, მათ მიერ დაგროვილ ცოდნასა და გამოცდილებას, თავს მოუყრის ინოვაციურ იდეებსა და პროგრესულ ინიციატივებს, რათა ხელი შეუწყოს და შექმნას ქვეყნის დემოკრატიული, ეკონომიკური და კულტურული განვითარების მექანიზმები და ინსტიტუტები; სახელმწიფო და საზოგადოებრივი აქტივობის სხვადასხვა სფეროში, განახორციელებს კვლევით საქმიანობას, როგორც უშუალოდ ასევე გარეშე პირების მეშვეობით; გააერთიანებს ღირსეულ და შესაბამისი დარგის პროფესიონალებს, რომელთა მეშვეობითაც ორგანიზაცია შეისწავლის ქვეყნის წინაშე მდგარ გამოწვევებს, შეიმუშავებს მათი გამკლავების გზებს და თავის დასკვნებს გააცნობს სახელმწიფოსა და საზოგადოებას”, _ ნათქვამია ორგანიზაცია “მოქალაქის” მიერ დეკლარირებულ მიზნებსა და ამოცანებში.
2012-დან 2013 წლის განმავლობაში, არაერთი კვლევის შედეგები გამოქვეყნდა, სადაც ივანიშვილის რეიტინგზე იყო საუბარი. 2012 წელს გამოკითხულთა 80%-ს მოსწონდა, 2013 წელს კი მისი მოწონების რეიტინგი 5%-ით შემცირდა, რასაც სპეციალისტები და პოლიტიკოსები კოალიციის მიერ წინასაარჩევნოდ გაცემული პირობების ნაწილის შეუსრულებლობას უკავშირებდნენ.
შეძლებს თუ არა ყოფილი პრემიერი მისი რეიტინგის შენარჩუნებას, ან თუნდაც გაზრდას, მას შემდეგ, რაც პოლიტიკიდან სამოქალაქო სექტორში გადაინაცვლა და რამდენად პოზიტიური იქნება ახალი იმიჯით მისი საზოგადოებაში ადაპტაცია?
საზოგადოებასთან ურთიერთობებისა და მარკეტინგული კომუნიკაციების სპეციალისტი ელდარ პირმისაშვილი “გურია ნიუსთან” ამბობს, რომ “ეს კარგად იმუშავებს მის იმიჯზე”.
“ბიძინა ივანიშვილი მოვიდა იქიდან, სადაც დაბრუნდა, ვგულისხმობ ქველმოქმედებას. ეს არის პოზიტიური ნაბიჯი, რადგან ფონდი, როგორც ვხედავთ არამარტო საქველმოქმედო მიმართულებებზე, არამედ იმ ნაწილზე იქნება ორიენტირებული, რასაც სამოქალაქო საზოგადოება ჰქვია და ფაქტია, რომ სამოქალაქო საზოგადოება ყველა პრობლემის სათავეა.
ფონდი, სამოქალაქო საზოგადოების შექნის სტიმულირებას მოახდენს, რაც მნიშვნელოვანია. ეს ნიშა აქამდე დუკავებელი იყო, თუ არ ჩავთვლით რამდენიმე ფონდს, რომელსაც შეზღუდული შესაძლებლობები ჰქონდა.
მან აირჩია უფრო რთული გზა ვიდრე პოლიტიკაა, სადაც გადაწყვეტილებების მიღება სწრაფად ხდება. აქ კი მოუწევს პრობლემების არსს უფრო ღრმად ჩაწვდეს და ზედაპირულად არ მოაგვაროს ეს თუ ის საკითხი.
ვფიქრობ, ეს ნაბიჯი კარგად იმუშავებს მის იმიჯზე”, _ ამბობს “გურია ნიუსთან” პირმისაშვილი.
“მოქალაქის” შექმნის დადებით ფაქტორებზე საუბრობს საზოგადოებრივი კომუნიკაციების მართვის სპეციალისტი არჩილ გამზარდიაც.
“არასამთავრობო სივრცე დღეს საქართველოში არის სავალალო მდგომარეობაში, მიუხედავად იმისა რომ ყველაზე წინა პლანზე არიან წამოწეულები. ყოფილ პრემიერს აქვს შანსი შექმნას ორგანიზაცია, რომელიც რეალურად სამოქალაქო სექტორის ინტერესებზე იქნება აგებული”, _ უთხრა “გურია ნიუსს” გამზარდიამ.
სპეციალისტი მიიჩნევს, რომ აღნიშნული ორგანიზაციის მიმართ დადებითი მოლოდინები შეიძლება გვქონდეს, რადგან ივანიშვილი არ იქნება იძულებული არაადეკვატური უკუკავშირი ჰქონდეს, განსხვავებით პოლიტიკაში ყოფნისა, როცა “კუთხეში მოქცევის დროს, არაადეკვატურ ქცევებს გამოხატავდა”.
“მოლოდინები შეიძლება გვქონდეს საკმაოდ დადებითი, რადგან მას პრემირ-მინისტრობისგან განსხვავებით ვერავინ მიაქცევს კუთხეში, მას არ ექნება თავდაცვითი ფორმები, არ იქნება იძულებული არაადეკვატური უკუკავშირი ჰქონდეს, რადგან ხელისუფლებაში ყოფნის დროს, როცა ნებისმიერ პირს კუთხეში მოაქცევენ, ის თავდაცვის არაადეკვატურ ქცევებს გამოხატავს.
ვფიქრობ, წინაპირობის სახით ეს იქნება შედეგიანი, რადგან პიროვნება ერიდება საკუთარი თავის არაშედეგობრივ გამოხატულებას. ავიღოთ თუნდაც ის ფაქტი, რომ ის არ დარჩა პრემიერ-მინისტრის თანამდებობაზე, რადგან რეალურად შესაძლოა მას ისეთი შედეგები არა ჰქონოდა, როგორსაც მისი რეიტინგი და ავტორიტეტი შეენარჩუნებინა. აქ მას ბევრად უფრო საქმიანად შეუძლია წარსდგეს, ესაა თავისი სივრცე, სადაც თავს უფრო “ლაღად” იგრძნობს
არასამთავრობო სივრცე არ არის გადაწყვეტილების მიმღები, პასუხისმგებლობის ამღები სივრცე, პოლიტიკისგან განსხვავებით. ამიტომ, ბევრად უფრო კომფორტულად იქნება აქ. თუ გავითვალისწინებთ მის ავტორიტეტს, ფინანსურ რესურსებს, მისი მოღვაწეობა სავსებით ეფექტური და მრავალწახნაგოვანიც შეიძლება იყოს”, _ განმარტავს “გურია ნიუსთან” გამზარდია და დასძენს, რომ ივანიშვილი არ ბრუნდება, რადგან ის არსად წასულა.
“მიმაჩნია, რომ ის არსად წასულა. უბრალოდ რადგან ეს პიროვნება გახდა ხილვადი, ამას უნდა ჰქონოდა გარკვეული ტერმინი. გახდა ხილვადი იმ ფორმით, სადაც მას სრული გარანტიები აქვს, რომ უკონტროლოდ და ეფექტურად იმუშაოს.”
