სოფლების უმრავლესობა სოფლებისა კვლავ უწყლობას უჩივის და მოსახლეობას შესრულებული სამუშაოები არ მოსწონს.
იცნობს თუ არა ოზურგეთის მუნიციპალიტეტში შესრულებულ სოფლის პროექტებს და ფლობს თუ არა ინფორმაციას, რამდენად ხარისხიანად არის შესრულებული სამუშაოები, ამასთან დაკავშირებით გუბერნატორი გიორგი ჩხაიძე “გურია ნიუსთან” საუბრობს.
_ ჯერ ჩვენთან უნდა შემოვიდეს დოკუმენტები _ მე ვეყრდნობი იურიდიულ დოკუმენტს. მხოლოდ ამის შემდეგ შემიძლია ვთქვა, რამდენად ხარისხიანად არის შესრულებული სოფლის პროექტები. არის ადამიანთა ჯგუფი, რომელიც პროექტებზე მიღება-ჩაბარების აქტებს აწერს ხელს, არსებობს შესაბამისი კომისიაც. წელი დასრულდა, აქედან გამომდინარე, გუბერნია მონიტორინგის თვალსაზრისით, გადაამოწმებს, რამდენად ხარისხიანად არის შესრულებული სამუშაოები, სად რა ხარვეზი შეიძლება გამოვლინდეს. რაც შეეხება სამომავლო პროექტებს, უფრო კარგი იქნება და მიზანშეწონილად მიმაჩნია, რომ პროექტები თავიანთ სოფლებში განახორციელონ იმ სოფლის მოსახლეობამ. იქ უნდა შეიკრიბოს ადამიანთა ჯგუფი, რომელიც იმ სამუშაოს, რაც სოფელს სჭირდება, იმ პროექტებს, რისი გაკეთებაც შეეძლება, თავად გააკეთოს.
_ ბატონო გიორგი, სოფელ ბახვში წყლის პროექტი დეკემბრის ბოლოს უნდა დასრულებულიყო, თუმცა, ჯერ კიდევ არ დამთავრებულა, მოსახლეობა წყალს ითხოვს _ 7 თვეა, მათ წყალი არ ჰქონიათ.
_ სამწუხაროდ, მაგასთან დაკავშირებით კომენტარს ვერ გავაკეთებ, რადგან არ ვფლობ ინფორმაციას. ეს საკითხი აუცილებლად დადგება დღის წესრიგში. მოვიკითხავ, თუ დარღვევები აღმოჩნდება, დამნაშავეს პასუხი მოეთხოვება. გასარკვევია, რა დაიხარჯა თანხა, რა გაკეთდა, როდის უნდა ჩაბარდეს პროექტი.
_ ბატონო გიორგი, აპირებთ თუ არა სოფლებში შესრულებული პროექტების მონიტორინგს?
_ სოფლებში გასვლას, მალე ბოლოდან დავიწყებ. აბსოლუტურად ყველა სოფელში მივალ და შევხვდები მოსახლეობას. გეგმაზე ვმუშაობ _ მაინტერესებს, რამდენად კმაყოფილია სოფლებში მოსახლეობა შესრულებული სამუშაოებით, რა სამომავლო გეგმები აქვთ, რა პრობლემები აწუხებთ, ემთხვევა თუ არა სოფლის მოსახლეობის მოსაზრება რწმუნებულის მიერ მოწოდებულ დოკუმენტაციას, _ გვითხრა ჩხაიძემ.
