ხშირად გამოვლენილი და განმეორებადი დარღვევა-ნაკლოვანებები, ხარვეზები მუნიციპალიტეტების საკუთრებაში არსებული ქონების განკარგვისას, შეწყვეტილი პროექტები, დაუსაბუთებელი წარმომადგენლობითი ხარჯები, ხარვეზები შეუსრულებელი სამუშაოების საექსპორტო გამოკვლევების პროცესში, მიწოდების ვადის გადაწევა სათანადო დასაბუთების გარეშე _ ეს ის საკითხებია, რომელთა შესახებაც 7 ივლისს სახელმწიფო აუდიტის წარმომადგენლებმა, ოზურგეთის დემოკრატიული ჩართულობის ცენტრში გურიის ოთხივე მუნიციპალიტეტის წარმომადგენლებთან საჯარო შეხვედრა გამართეს. შეხვედრას ესწრებოდა ოზურგეთის მუნიციპალიტეტის გამგებელი მერაბ ჭანუყვაძე.
სახელმწიფო აუდიტის დეპარტამენტის უფროსმა გიორგი მამრიკიშვილმა აღნიშნა, რომ გურიის რეგიონში მიმდინარე წელს აუდიტორული შემოწმება ტარდება მხოლოდ ლანჩხუთის მუნიციპალიტეტში, მომავალ წელს კი _ ოზურგეთში.
შეხვედრაზე აუდიტის სამსახურის წარმომადგენლებმა, საქართველოს მასშტაბით, მუნიციპალიტეტებში ჩატარებული აუდიტის შედეგად გამოვლენილი ხშირად განმეორებადი დარღვევა-ნაკლოვანებებსა და ძირითად ხარვეზებზე ისაუბრეს. გასცეს რეკომენდაციები:
გიორგი მამრიკიშვილის განცხადებით, 2016 წელს ადგილობრივ თვითმმართველ ერთეულებში გახორციელდა 17 აუდიტორული შემოწმება, აუდირებულმა თანხამ კი 2 მილიარდ 103 მილიონი ლარი შეადგინა.
როგორც მამრიკიშვილმა აღნიშნა, აუდიტორული შემოწმების შედეგად გამოვლინდა 380 მიგნება, რომლის საერთო ღირებულებაა 405 მილიონ 157 ათასი ლარია. დარღვევა-ნაკლოვანებები გამოვლენილი იქნა შემდეგ მიმართულებებში: საბიუჯეტო რესურსების მართვა, სახელმწიფო შესყიდვების მართვა, აქტივების მართვა, ფინანსური აღრიცხვა-ანგარიშგება, ასევე, ორგანიზაციული და პერსონალის მართვა.
სახელმწიფო აუდიტის მიერ გამოვლენილი დარღვევები და ხარვეზები ასეთია:
თვითმმართველი ერთეული არ ფლობს სრულყოფილ ინფორმაციას მის საკუთრებაში არსებული ქონების შესახებ და ხშირ შემთხვევაში, ვერ უზრუნველყოფს იჯარით გაცემული ქონებისგან მისაღები შემოსავლების სათანადო ადმინისტრირებას, ამის შედეგი კი ის არის, რომ არაუფლებამოსილი პირები იყენებენ მუნიციპალიტეტის საკუთრებაში არსებულ ქონებას კომერციული საქმიანობისთვის, რის გამოც, ვერ ხერხდება მისაღები შემოსავლების სრულად და დროულად მობილიზება ადგილობრივ ბიუჯეტში.
მუნიციპალიტეტები საბიუჯეტო სახსრებს ხარჯავენ ისეთ პროექტებზე, რომლებიც, საბოლოოდ, დასრულებული არ არის. აღნიშნული კი, ძირითადად, გამოწვეულია ისეთი ფაქტორებით, როგორებიცაა: საპროექტო სახარჯთაღრიცხვო დოკუმენტაციის უზუსტობა, შესრულების პერიოდის არასათანადო დაგეგმვა, მშენებლობის პროცესების არასათანადო კონტროლი, რის საბოლოო შედეგიც კი არის, ის რომ საბიუჯეტო სახსრები გადახდილია, რომლითაც მოსახლეობა ვერ სარგებლობს.
მუნიციპალიტეტების უმრავლესობაში არ ხდება გამარტივებული შესყიდვის დროს სამუშაო ღირებულებების ანაზღაურება ფაქტობრივი დანახარჯების მიხედვით, როგორც გათვალისწინებულია საქართველოს კანონმდებლობით. არ არის დაცული კანონმდებლობით განსაზღვრული გეგმური მოგებისა და ზედნადები ხარჯების ზღვრული ოდენობა. აღდგენილი წესის უგულებელყოფით მიმწოდებლისათვის თანხები, როგორც წესი, ზედმეტად ანაზღაურდება.
ხარვეზებია შესრულებული სამუშაოების საექსპორტო გამოკვლევის პროცესში. შემსრულებლები, ძირითად შემთხვევაში, თავად ახდენენ ექსპერტიზის განმახორციელებელი პირის შერჩევას. ექსპერტების მიერ ჩატარებული კვლევები მოიცავს მხოლოდ შესრულებული სამუშაოების მოცულობით ნაწილს და არ ტარდება ხარისხის გამოკვლევა. ხშირია შემთხვევა, როდესაც მიმწოდებელს წარმოდგენილი აქვს ექსპერტის დადებითი შეფასება, თუმცა, სამუშაოები შესრულებულია გარკვეული ხარვეზით, უხარისხოდ ან/და დაზიანებულია. არასათანადო ექსპერტიზის დასკვნის საფუძველზე სამუშაოების ჩაბარებამ შესაძლებელია განაპირობოს უხარისხოდ შესრულებელი სამუშაოების ექსპლუატაციაში მიღება და საბიუჯეტო სახსრების არარაციონალური ხარჯვა.
მუნიციპალიტეტები “საგარანტიო წერილის“ მოქმედების ვადის განმავლობაში არ სთხოვენ გარანტორს თანხის ჩარიცხვას საკუთარ ანგარიშზე. მუნიციპალიტეტები სახელშეკრულებო ვადის გაგრძელების პარალელურად არ ითხოვენ გარანტიების ვადების გაგრძელებას, ამის გამო კი მუნიციპალიტეტები კარგავენ საგარანტიო თანხის მიღების შესაძლებლობას.
ხშირია შემთხვევა, როდესაც მიმწოდებლები სამუშაოებს ვერ ასრულებენ ხელშეკრულებით განსაზღვრულ ვადებში. თუმცა, საჯარიმო სანქციებისგან თავის არიდების მიზნით, მიწოდების პერიოდი იზრდება მუნიციპალიტეტებსა და მიმწოდებლებს შორის გაფორმებული დანართ -შეთანხმების საფუძველზე. მიწოდების ვადების სათანადო დასაბუთების გარეშე გაზრდით კი, მუნიციპალიტეტები კარგავენ საჯარიმო სანქციებს.
კიდევ ერთი ხარვეზი, რომელზეც ასევე გაამახვილეს ყურადღება, არის მიღებების, ფურშეტების, წვეულებებისა და სარესტორნო მომსახურებაზე გაწეული წარმომადგენლობითი ხარჯების საჭიროების დაუსაბუთებლობა. არ არის იდენტიფიცირებული სტუმრების ვინაობა და რაოდენობა. თანხები დახარჯულია სახელმწიფო უწყებების სხვადასხვა თანამდებობის პირების კვების ორგანიზებისათვის.
ხარვეზებია შიდა აუდიტის სამსახურების საქმიანობაში, კერძოდ, კი შიდა აუდიტის სამსახურები არ ატარებენ მუნიციპალიტეტის კომპლექსურ -თემატურ აუდიტს და ძირითადად, ამოწმებენ მხოლოდ გამგეობის მიერ დაფუძნებულ იურიდიულ პირებს. აღნიშნული სამსახურები ვერ ახერხებენ დაწესებულებების საქმიანობის სრულყოფისა და ფინანსების მართვის გაუმჯობესებისათვის ტექნიკური და ფუნქციური ხარვეზების აღმოფხვრასა და პრევენციას და სხვა, _ აღნიშნეს აუდიტის წარმომადგენლებმა.
