გთავაზობთ ძველისძველ და ნაცად ხალხურ სამკურნალო რამდენიმე ხერხს მის წინააღმდეგ.
მკურნალობა ლიმონით
დაძინებამდე ფეხი ცივ წყალში ჩაყავით ხუთი-შვიდი წუთის განმავლობაში. შემდეგ საგულდაგულოდ გაიმშრალეთ ქუსლები, თითებშუა ადგილები. კოჟრებზე დაიდეთ ზომაზე გამოჭრილი ლიმონის ქერქი, რომელსაც ოდნავ რბილობიც უნდა ახლდეს. ლიმონის ნაჭერიც შეიძლება, საშუალო სისქის, კურკაგამოცლილი. შემდეგ შეიხვიეთ დოლბანდით ან რბილი, სუფთა ქსოვილით და დაწექით. დილით მოიხსენით. ასე გაიმეორეთ ხუთი დღის განმავლობაში. კოჟრები აუცილებლად მოგძვრებათ.
მკურნალობა ნივრითა და ძმრის ესენციით
ერთი კბილი ნიორი დანაყეთ ან წვრილად გახეხეთ. დაამატეთ ერთი ჩაის კოვზი ძმრის ესენცია და ცოტა პურის ფქვილი. მოზილეთ თხელი მასა. შემდეგ ცივ წყალში დაბანილ და გამშრალებულ ფეხზე, კოჟრების ადგილზე ლეიკოპლასტირი დავიდოთ, რომელიც ამოჭრილი იქნება მრგვალად იმ ადგილზე, სადაც კოჟრია. დავადოთ კოჟრს ეს მასა თხლად და ზემოდან ისევ ლეიკოპლასტირი დავაკრათ. შევიხვიოთ მსუბუქად და მეორე დილით მოვიხსნათ. ეს პროცედურა გავიმეოროთ ხუთი დღის განმავლობაში. შედეგს აუცილებლად მიიღებთ.
ფეხის ტერფებზე ნახეთქების მოსარჩენად
კოჟრებზე გაცილებით მტკივნეულია ქუსლებზე ნახეთქების არსებობა, სიწითლე და ბებერები. ხალხურ მედიცინაში ამის ერთ-ერთი კარგი საწინააღმდეგო საშუალებაა ჭინჭარი, რომელიც ჩვენს ეზოებსა თუ ტყის განაპირა ადგილებში უხვადაა და შემოდგომის მიწურულსაც შეიძლება მისი დაკრეფა. გამოიყენება როგორც ნედლი, ისე ხმელი სახით. გავითვალისწინოთ, რომ ფოთლებს თესლი არ შეჰყვეს.
ავიღოთ ორი სუფრის კოვზი, დაჭრილი და დაქუცმაცებული ჭინჭრის ფოთლები. დავასხათ ერთი ლიტრი ადუღებული წყალი. ცოტა ხანს გავაჩეროთ და შემდეგ, როცა ფეხი წყლის სიცხელეს გაუძლებს, ჩავდოთ შიგ, 20 წუთის განმავლობაში გავაჩეროთ. შემდეგ გავიმშრალოთ. მეორე დღეს კი ჭინჭრის ლოსიონით შევიზილოთ ფეხის ტერფები, რომელიც ასე მზადდება: ორი სუფრის კოვზ დაქუცმაცებულ და დაფქულ ჭინჭრის ფოთოლს წამოვადუღებთ ერთ ჩაის ჭიქა ზეითუნის ზეთთან. გავაცივოთ და შევიზილოთ მტკივან და გაუხეშებულ ადგილებში. ასე გავიმეოროთ მონაცვლეობით ხუთი დღის მანძილზე. ბებერები აუცილებლად მოგირჩებათ. რა შეეხება დოზას, თქვენს სურვილზეა დამოკიდებული. შეგიძლიათ, გაზარდოთ.
ფეხზე მყესის დაჭიმვის საწინააღმდეგო მკურნალობა
ხშირია მყესის დაჭიმვის შემთხვევა ფეხზე, ხან შრომის დროს, ხანაც _ უნებლიეთ. ამ დროს პირველი ქმედითი ხალხური საშუალებაა წვრილად დაჭრილ ხახვში არეული შაქრის ფხვნილი. ეს ნარევი სქელ ფენად დადეთ ოთხკუთხა ქსოვილზე, მერე დაიდეთ მტკივან ადგილზე და კარგად შეიხვიეთ დოლბანდით. ასე გაიმეორეთ სამ-ოთხი დღის განმავლობაში. თუ გაცილებით მძიმე ფორმაა, ექიმს უნდა მიმართოთ.
