საკრებულოს სხდომა ხმაურის, ბრალდებების და დაპირისპირების ფონზე მიმდინარეობდა. საკონკურსო კომისიას საკრებულოს თავმჯდომარე თამაზ მარგველაშვილი ხელმძღვანელობდა, რომელმაც სხდომა აღნიშნულ საკითხზე კენჭისყრამდე დატოვა. კომისიის ახალი თავმჯდომარის არჩევაში არ ჩაერია და პროტესტის ნიშნად დარბაზი, ფრაქცია “საქართველოს პატრიოტთა ალიანსის” წევრებმაც დატოვეს. მათი განცხადებით, არ დაესწრებიან იმ ფარსს, რომელსაც “ნაციონალური მოძრაობა” და “ქართული ოცნება” ერთდროულად სთავაზობს საზოგადოებას.
“საქართველოს პატრიოტთა ალიანსი” საკრებულოს სხდომას ემიჯნება, რადგან ეს “ქართული ოცნების” და “ნაციონალური მოძრაობის” ერთობლივი მარშია. ასე იქნებიან სულ. საზოგადოებას ატყუებენ, თითქოს სხვადასხვა პოლიტიკური შეხედულებების არიან,” _ განაცხადა “საქართველოს პატრიოთტა ალიანსის” და საკრებულოს წევრმა კახა ნემსიწვერიძემ.
ანალოგიურ ბრალდებებს უყენებს ფრაქცია “ნაციონალური მოძრაობის” თავმჯდომარე გიორგი უკლება ოპონენტ პოლიტიკურ ფრაქციებს. მისი განცხადებით, “ქართული ოცნება” და “პატრიოტთა ალიანსი” მჭიდრო ფინანსურ კავშირში არიან, ხოლო “ალიანსი” საკრებულოში კოალიციის ინტერესების გამტარებელია.
“მინდა ვთქვა რომ “პატრიოტთა ალიანსმა” და მისმა თავმჯდომარემ, სამი მერი დაუნიშნა “ქართულ ოცნებას.” როგორც გახსოვთ, მერის მოვალეობის შემსრულებლები ყოველდღე იცვლებოდნენ. ამ ყველაფერს კი პატრიოტების ერთ-ერთი ლიდერი აკეთებდა. რაც შეეხება მათ გაერთიანებას, არავისთვის დასამალი არ არის, რომ ეს ორი პოლიტიკური ორგანიზაცია მჭიდრო ფინანსურ კავშირში არიან ერთმანეთთან,” _ განაცხადა ფრაქცია “ნაციონალური მოძრაობის თავმჯდომარემ გიორგი უკლებამ.
რაც შეეხება საკონკურსო საატეტსტაციო კომისიას ის უახლოეს დღეებში, 7 წევრით დაკომპლექტდება. რამდენად კანონიერი იყო ქუთაისის საკრებულოს მიერ დღევანდელ სხდომაზე მიღებული გადაწყვეტილება, დავით დვალი აღნიშნავს, რომ ყველაფერო კანონის სრული დაცვით მოხდა.
“კომისია უნდა იყოს ღირსეული, რომ შეძლოს იმ კადრების შერჩევა, რომელიც მნიშვნელოვანი იქნება ადგილობრივი თვითმართველობის ეფექტური მუშაობისთვის,” _ განაცხადა მუდმივმოქმედი კომისიის, ახლად არჩეულმა თავმჯდომარე დავით დვალმა.
შეგახსენებთ, რომ ქუთაისის მუდმივმოქმედ საკონკურსო საატესტაციო კომისიის, ყოფილ შემადგენლობას არასამთავრობო ორგანიზაციები და ადგილობრივი მოსახლეობა უნდობლობას უცხადებდა, რის გამოც აქციები კომისიის დაშლის მოთხოვნით პერმანენტულად იმართებოდა.
