როგორც მანდატურები აცხადებდნენ, მათი გათავისუფლების შესახებ ბრძანება მიიღეს და ამ გადაწყვეტილებასთან შეგუებას არ აპირებდნენ.
მანდატური მადონა ჯიოშვილი: ღშფოთებულები ვართ შექმნილი მდგომარეობით. ჩვენი მოთხოვნაა, იმ 1400 ადამიანის, ვინც დღეს დავრჩით ქუჩაში, მოგვეცეს მუშაობის საშუალება და ჩვენმა სამსახურმა გააგრძელოს ფუნქციონირება, როგორც ცალკე სტრუქტურულმა ერთეულმა. იმ ფუნქციით, როგორც იყო ადრე. მოვითხოვთ, შეგვხვდეს ლია გიგაური -მინისტრის მოადგილე, რომელიც ამბობს, რომ ჩვენი სამსახური არ უქმდება. ჩვენ აბსოლუტურად სხვა ინფორმაცია გვაქვს. მოგვცეს გარანტიები, რომ ჩვენ უმუშევრები არ დავრჩებით. ერთი თვეა ისედაც უმუშევრები ვართ, არ გავსულვართ სამსახურში. ხელშეკრულების ვადის ამოწურვის საფუძველზე, როგორც ვიცოდით დავექვემდებარებოდით სკოლებს.
მანდატური სოფიო გორგოძე: მოგვიწყვეს კონკურსი, 140 კაცმა გადავლახეთ ეს კონკურსი. ელექტრონულადაც შევავსეთ განაცხადი შტატში მოხვედრასთან დაკავშირებით. ეს მოხდა დეკემბერში. ველოდით სამსახურში დაძახებას, მაგრამ 6 იანვარს გამოგვიცხადეს, რომ ჩვენ ვიყავით დროებით შეჩერებული ფუნქციით და უნდა ვმსხდარიყავით სახლში. ბოლოს გაირკვა, რომ ბრძანებით ვიყავით გათავისუფლებული. ვითხოვთ, რომ შეცვალონ ის გადაწყვეტილება, რომლის მიხედვითაც ვიქნებით დირექტორის დაქვემდებარებაში. ერთი წელია კბილებით გვიჭირავს ეს სამსახური. ჩვენს უკან ოჯახები დგანან და ვითხოვთ, რომ გვქონდეთ სტაბილური სამსახურს.
მანდატურის სამსახურის უფროსის მოადგილის ლევან ზარდალიშვილის განცხადებით, ცვლილება, რომლის მიხედვითაც 2014 წლიდან მანდატურს სამსახურში ნიშნავს სკოლა, კანონში 2012 წლის 27 დეკემბერს შევიდა და მანდატურებმა ამის შესახებ უკვე იცოდნენ.
“ის, რომ მანდატურები გადადიან დირექტორის დაქვემდებარებაში, ეს ყველამ ვიცოდით, მანდატურებმაც იცოდნენ არაერთგზის ტრენინგის შედეგად. მე ვერ ვხედავ მიზეზს, რაზე ატეხეს აჟიოტაჟი. ხელფასი იგივე აქვს, ფუნქციები იგივე აქვთ. იცვლება მხოლოდ ის, რომ ახლა მანდატურს ნიშნავს დირექტორი. თუ კანონს მივყვებით, მათ ჩვენთან შეუჩერდათ უფლებამოსილება, ხოლო იმავდროულად მათ უნდა გაუფორმდეთ ხელშეკრულებები სკოლასთან. ახალ ხელშეკრულებებს დღეიდან გაუფორმებენ. ყველა სკოლამ მიიღო ინსტრუქცია. ბიუჯეტი, რომელიც ჩვენ გვქონდა, დაუბრუნდა განათლების სამინისტროს და სამინისტრო გადაუნაწილებს სკოლებს”.
ზარდალიშვილის თქმით, მოსაზრება, თითქოს დირექტორი აღარ აიყვანს სკოლაში მანდატურს, არ შეესაბამება სიმართლეს, ვინაიდან ამას კანონი არეგულირებს.
“არსებობს კანონის მუხლი, სადაც წერია, რომ ყველა საჯარო სკოლას, სადაც ბავშვთა რაოდენობა 100-ზე მეტია, უნდა ჰყავდეს მანდატური. ასე რომ დირექტორმა რომ არ დანიშნოს მანდატური, ეს შეუძლებელია, მაშინ ის კანონს შეეწინააღმდეგება. კანონზე მეტი გარანტია არ არსებობს. იქ წერია, რომ დირექტორმა უნდა დანიშნოს მხოლოდ სერტიფიცირებული მანდატური. მათ ყველას გააჩნიათ სერთიფიკატი. ჩვენ ახლა 1030 მანდატური გვყავს. 400 სკოლას ვწვდებით. რეალურად უფრო დიდია მოთხოვნა. ჩვენ არ გვყოფნის მანდატურების რაოდენობა. იგეგმება კიდევ კონკურსის გამოცხადება და მანდატურების გადამზადება. მე, მაგალითად, წელიწადნახევარია ამ რეფორმას ვაკეთებ. უამრავი ფული დაიხარჯა ტრენინგებში, უამრავი საერთაშორისო ორგანიზაცია დაგვეხმარა. ეს ხომ აბსურდია, ამდენი ფული და ამდენი შრომა წყალში გადავყაროთ”, _ აღნიშნა მანდატურის სამსახურის უფროსის მოადგილემ.
მანდატურების პროტესტზე კომენტარი გააკეთა განათლებისა და მეცნიერების სამინისტრომაც. მინისტრი თამარ სანიკიძე სამინისტროსთან აქციის გასამართად მისულ მანდატურებს შეხვდა და აუხსნა, რომ მათი განთავისუფლება არ იგეგმება.
“სამწუხაროდ, ჩემი მონაწილეობით დიდი ხანია მანდატურებთან შეხვედრა არ შემდგარა. დღეს მოვახერხეთ და შევხვდით. ჩვეულებრივად გრძელდება მუშაობა. ჩვენ ჩვენი საქმით ვართ დაკავებული და მანდატურები ხვალიდან სკოლებში თავის საქმიანობას გააგრძელებენ. მე ვფიქრობ, რომ შეკითხვები აღარ დარჩა, თუმცა თუ ვინმეს შეკითხვა გაუჩნდება, შეუძლია პასუხი მიიღოს შესაბამისი პირებისგან. ამ შემთხვევაში საქმე შეეხო კანონის აღსრულებას, რომლის მიხედვითაც, პროცედურული საკითხები იყო შესაცვლელი და, რომელიც შეიცვლება. სკოლა ვერ ეტყვის უარს მანდატურებს მუშაობაზე და არანაირი შემცირება არ იგეგმება, პირიქით მანდატურების ეს რაოდენობა არ არის საკმარისი და სელექცია იქნება კადრების დასამატებლად”, _ განაცხადა სანიკიძემ.
კანონის ცვლილებაზე, რომლის მიხედვითაც მანდატურების სკოლაში დანიშვნას წყვეტს დირექტორი, საქართველოს პედაგოგთა და მეცნიერთა თავისუფალი პროფკავშირის პრეზიდენტი მაია კობახიძე ფიქრობს, რომ არ გაამართლებს:
“2013 წლის 1-ლი იანვრიდან ზოგადი განათლების შესახებ საქართველოს კანონში შევიდა ცვლილებები. განათლებისა და მეცნიერების სამინისტროს ინიციატივით მანდატურის ფუნქციები შეიცვალა. ის მხოლოდ მოსწავლეს აკონტროლებს და მისი ფუქნცია დანაშაულის პრევენციაა. მანდატურის სამსახურის რეფორმა გრძელდება, რომლის მიხედვითაც მას შეეცვალა სახელი. ეს იქნება ბავშვთა დაცვის, მედიაციის და ფსიქოლოგიის სამსახური რაც ძალიან პოზიტიურია. სკოლაში დიმიტრი შაშკინის მიერ დამკვიდრებული პოლიციური რეჟიმი აღმოიფხვრა და დღეს უკვე საჭიროება დადგა იმის, რომ სწორად შეირჩეს კადრები და სამსახურის ფუნქციების ეფექტურად შესრულებისთვის მოხდეს მათი გადამზადება.
ამ პროცესში მიმდინარეობს საკანონმდებლო ცვლილებებზე მუშაობა, რომლის მიხედვითაც მანდატური უნდა დანიშნოს საჯარო სკოლის დირექტორმა. ეს, ვფიქრობთ რომ არ გაამართლებს, ვინაიდან სულ მცირე 2-3 წელი მაინცაა საჭირო ამ ახალი ცენტრის ჩამოყალიბებისთვის, რომ სამინისტროს ახალი კონცეფცია (ბავშვთა დაცვის, სკოლის უსაფრთხოებისა და ფსიქოლოგიის კუთხით) ამუშავდეს. ამიტომ მიგვაჩნია, რომ ამ ცენტრისთვის კადრები განათლებისა და მეცნიერების სამინისტრომ ცენტრალიზებული წესით უნდა შეარჩიოს. იმისთვის, რომ თანამშრომლებმა ფსიქოლოგის ფუნქცია უკეთ შეითავსონ უნდა მოხდეს მათი სერიოზული გადამზადება, ისინი ნამდვილად ძალიან ბევრ ტრეინინგს საჭიროებენ. მხოლოდ ამის შემდეგ იქნება შესაძლებელი დეცენტრალიზაცია ამ კადრების დასაქმების და მათი საჯარო სკოლის დირექტორების მიერ შერჩევისთვის”, _ აღნიშნავს კობახიძე.
განათლების და მეცნიერების მინისტრის ყოფილ მოადგილე დავით ზურაბიშვილი მიიჩნევს, რომ სწორი გადაწყვეტილებაა, როდესაც დირექტორი ნიშნავს მანდატურს:
“თავად სკოლამ უნდა გადაწყვიტოს სჭირდება თუ არა მანდატური. ზოგს სჭირდება, ზოგს – არა. ეს არის უსაფრთხოების საკითხებზე ზრუნვა. ეს ინსტიტუტი შექმნის დღიდან იყო კრიტიკის საგანი. მეც არაერთხელ გამიკრიტიკებია. სკოლა თავისთავად ფაქიზი ინსტიტუტია და მასწავლებელსა და მოსწავლეს შორის მესამე პირის, მით უმეტეს პოლიციური ტიპის ჩარევა, აბსოლუტურად გაუმართლებელია. ძალიან კარგია, რომ ეს ფუნქცია ჩამოშორდა მანდატურის სამსახურს. ახლა მთავარია ტექნიკურად სწორად შესრულდეს კანონის ცვლილება და დაცული იქნას ამ ადამიანების უფლებები”, _ აცხადებს ზურაბიშვილი.
რაც შეეხება მანდატურებს, მათ განათლების მინისტრთან შეხვედრის შემდეგ მიიღეს გადაწყვეტილება, რომ პროტესტს აღარ გააგრძელებენ.
