აქციის მონაწილეები ძირითადად ოზურგეთის მუნიციპალიტეტის დაბა ლაითურის მცხოვრებელები იყვნენ. ისინი წინა ხელისუფლების მიერ უკანონოდ გაყიდული მიწების მათ საკუთრებაში დაბრუნებას ითხოვენ.
ოზურგეთის მუნიციპალიტეტის სოფელ ლაითურის მკვიდრთა უმრავლესობა აპროტესტებს პრივატიზაციის პერიოდში უსამართლოდ გასხვისებული მიწების საკითხს. ისინი ამბობენ, რომ უცხოელმა ინვესტორმა ადგილობრივი მოხელეების და დაინტერესებული პირების ხელშეწყობით, უსამართლოდ იყიდა მიტაცებული მიწის 10 000 ჰექტარი და ითხოვენ კანონდარღვევით წართმეული მიწების უკან დაბრუნებას.
“მიუხედავად იმისა, რომ ჩვენ არაერთხელ მოვაწყვეთ აქცია მიწების უკანონო გასხვისებასთან დაკავშირებით, ვერც ერთი მთავრობისგან პასუხი ვერ მივიღეთ. თავის დროზე დაბაში არსებული ჩაის პლანტაციის ფართობების ნაწილი (940 ჰა) და 640 ჰა ფართობი ორ პიროვნებაზე გაიცა. ასევე მოხდა დაბის კუთვნილი შენობა-ნაგებობების, ჩაის ფაბრიკების და ავტოსატრაქტორო პარკის გაყიდვა. შემდეგ ეს პლანტაციები მიატოვეს, გატყიურდა და მთავრობამ, რომელსაც ამისთვის მეიჯარეებისთვის პასუხი უნდა მოეთხოვა, მათ საკუთრებაში დაუკანონა. ადგნენ მერე და სხვა ინვესტორს მიყიდეს. ახლა გვეუბნებიან, ჩვენ ვართ პატიოსანი გამყიდველი და მყიდველიო. გამოდის, რომ ჩვენ, ხალხი ვართ უნამუსო! ვითხოვთ სამართალს, დაგვიბრუნონ ჩვენი მიწები, თორემ აქ ძალიან ცუდი ამბები მოხდება,” _ ამბობენ აქციის მონაწილეები.
რამდენიმე წუთით ისინი თეატრალურ მოედანზე შეჩერდნენ და იქ გააჟღერეს თავიანთი მოთხოვნები, შემდეგ კი გურიის ადმინისტრაციის შენობისკენ წავიდნენ გურიის გუბერნატორისა და ოზურგეთის მუნიციპალიტეტის გამგებლის მოვალეობის შემრულებელ კოტე შარაშენიძესთან შესახვედრად.
ადგილობრივი ხელისუფლების წარმომადგენლები აქციის ორგანიზატორებსა და რამდენიმე მონაწილეს შეხვდნენ. შეხვდერა გურიის გუბერნიაში შედგა.
დაბა ლაითურის ერთ-ერთ მცხოვრებ ლევან დუმბაძის თქმით, ოზურგეთის მუნიციპალიტეტის გამგებლის მოვალეობის შემსრულებელი კონსტანტინე შარაშენიძე, წუხელ ღამის 11 საათზე დაბა ლაითურში იმყოფებოდა ერთ-ერთის ოჯახში და კატეგორიულად ითხოვდა, რომ შეეჩერებინა მოსახლეობა, რადგან არ ჩატარებულიყო დღევანდელი აქცია. ის ახდენდა ზეწოლას, რისი უფლებაც მას არ აქვს,” _თქვა დუმბაძემ.
აღნიშნულ ფაქტს კონსტანტინე შარაშენიძე ასე ხსნის:
_ წუხელ მე და გუბერნატორის მოადგილე ვიყავით ჩამოსულები ლაითურში და მართლაც გვქონდა საუბარი, გვინდოდა მოგვეწყო დღეს ადგილზე შეხვედრა, ჩამოვიყვანდით კომპეტენტურ სამსახურებს, წამოვიღებდით შესაბამის აპარატურას და პრობლემას გადავჭრიდით, ეს იყო და ეს.
დავით მამალძე: სამართლებრივი თვალსაზრისით ჩიხში ვართ მოქცეული, იმიტომ რომ არსებულ მიწებს ჰყავს კერძო მესაკუთრეები და სახელმწიფომ ეს მიწები გაანაწილა, მოძებნა კერძო ინვესტორები, მთავარი პრობლემა ახლა არის ის, რომ ეს კერძო ინვესტორი იხდის სახელმწიფოში თავის გადასახადს, მაგრამ არ ამუშავებს ამ მიწას, სოფლის მაცხოვრებლებს კი საარსებო მინიმუმზე ნაკლები აქვთ და იაფფასიან სამუშაოს ეწევიან მეზობელ ქვეყანაში ლუკმა-პურის გასატანად, ჩვენი მიწები კი არის გავერანებული და ეკალ-ბარდით სავსე. ჩვენ გვესმის, რომ ეს პრობლემა თქვენი ხელისუფლების პრობლემა არ არის, და იმ დანაშაულებრივი რეჟიმის ბრალია, მაგრამ სანამ ამ ფაქტს პოლიტიკური სარჩული დაედება, იქნებ დავეხმაროთ მოსახლეობას ამ საკითხის მოგვარებაში და მოგვაქციოთ ყურადღება ამ მხრივ.
“ჩვენ ამ მოთხოვნით არაერთი აქცია ჩავატარეთ, დღესაც შევიკრიბეთ. ჩვენ არავინ არაფერს არ გვეკითხება, ერთ დღესაც გავიღვიძეთ და გვატყობინებენ, რომ საკუთარი მიწები აღარ გვაქვს, 25 წელია ძარცვავენ ჩვენს სოფელს, არცერთი მთავრობა ჩვენთვის არ ყოფილა, არცერთ არჩევნებზე თავი არ შეგვირცხვენია არცერთი ხელისუფლების დროს, მე მეცოდება ჩემი სოფლის მოსახლეობა, სააკაშვილის რეჟიმის დროს იყო და ამდენი წლის განმავლობაში გვერეკებოდნენ არჩევნებზე ხმების მისაცემად, სამაგიეროდ ჩვენთვის არც გზა ყოფილა და არც წყალი. არ გვაკმარეს ეს და ერთ მშვენიერ დღეს საკუთარი მიწებიც წაგვართვეს. ხელისუფლების შეცვლა ჩვენი მოსახლეობისთვის ნეგატიურად მოქმედებს, პოზიტივი არაფერი არ ჩანს ახლაც. გადახვეწილია მთელი ლაითური მეზობელ ქვეყანაში სამუშაოდ, დიდი-პატარა ყველა იქაა, ოზურგეთის მუნიციპალიტეტის სოფელ ლაითურის მკვიდრთა უმრავლესობა აპროტესტებდა პრივატიზაციის პერიოდში უსამართლოდ გასხვისებული მიწების საკითხს. ისინი ამბობენ, რომ უცხოელმა ინვესტორმა ადგილობრივი მოხელეების და დაინტერესებული პირების ხელშეწყობით, უსამართლოდ იყიდა მიტაცებული მიწის 50 ჰექტარი. ისინი ითხოვენ კანონდარღვევით წართმეული მიწების უკან დაბრუნებას. როცა 940 ჰექტარის და ჩაის 2 დიდი პლანტაციების მქონე დაბაა, რატომ უნდა სჭირდებოდეს აქაურ მცხოვრებს იქ წასვლა? აქ ვერ უნდა ირჩენდეს თავს ჩვენს მიწაზე? ამას ვითხოვთ, დაგვიბრუნეთ ჩვენი მიწები, რომელიც ოლიგარქებისა და ფეოდალების ხელშია. საქმე 7 თვეა უკვე პროკურატურაშია, შეტანილი გვაქვს სარჩელი,” _ამბობდნენ შეხვედრაზე ლაითურლები.
გიორგი ჩხაიძე, გურიის გუბერნატორი: თქვენ რასაც ბრძანებთ, რომ ეს იყო 90 -იან წლებში, აბსოლუტურად უკვე ყველაფერი არის ხანდაზმული კანონმდებლობიდან გამომდინარე, ის რაც არის მიყიდული, სამწუხარო რეალობაა, მაშინ კონტრაქტში არ იდებოდა ის პასუხისმგებლობა რასაც თქვენ აცხადებთ. ჩვენ გვქონდა შეხვედრა ამ თემასთან დაკავშირებით, ამ თემის შესწავლა მიმდინარეობს, პროკურატურაში არის საქმე და მეც უკვე ველოდები მაგ დასკვნას, კონტრაქტის დეტალები არ ვიცოდი, ამ თემასაც გავივლი. ყველაფერს აქვს მისი პროცედურები.
კონსტანტინე შარაშენიძე: იურისტებთან გავივლით ამ საკითხს, დავაზუსტებთ რა თანხას მოითხოვენ კომპანიის წარმომადგენლები, როგორ გაყიდიან ამ მიწებს, ჩვენ შეწუხებულები ვართ ამ თემით, ჩამოვალთ ადგილზე იმ კონკრეტულ ფართობებში, წამოვიყვანთ შესაბამის კომისიას და თქვენთან ერთად გადავჭრით ამ პრობლემას. მე გთავაზობთ სწორ გეგმას. დაძრული გვაქვს ეს თემა, კარგად ვფლობ ინფორმაციას.
“ჩვენ სახელმწიფომ გაგვიყიდა მიწები, რომელიც ჩვენ არ ვიცოდით, ერთ თეთრსაც არ გადავიხდით, არცერთი ლაითურელი არცერთ მეტრ მიწაში, ჩვენ ეს გვეკუთვნის და დაგვიბრუნონ. რატომ გვატყუებს მთავრობა ჩვენ, თუ ხუთ დღეში პასუხი არ გვექნება, რომ როდის დაგვიბრუნებენ კუთვნილ მიწებს, მაშინ მივიღებთ სხვა ზომებს,” _ განაცხადა ერთერთმა ლაითურელმა შეხვედრის ბოლოს, რაზედაც გუბერნატორისგან ასეთი პასუხი მიიღო:
_ რადგან ულტიმატუმებზე გადახვედით, კი ბატონო, კანონიერი უფლება გაქვთ, მოიქცეთ ისე, როგორც გინდათ. მოხვედით ჩემთან და დააყენეთ საკითხი, ახლა მიყენებთ ულტიმატუმებს, არანაირ ხუთ დღეში ეს პრობლემა არ გადაწყდება და კი ბატონო, იმოქმედეთ ისე, როგორც გნებავთ.
