“რომელმა სულელმა თქვა, ჭანიეთში გაზიფიცირება დასრულდაო?”

გასული წლის გაზაფხულზე, ოზურგეთის მუნიციპალიტეტის სოფელ ჭანიეთში გაზის შეყვანა დაიწყო, თუმცა, მაგისტრალის მშენებლობა სოფლის ცენტრში შეჩერდა. მაშინ მოსახლეობას შეჰპირდნენ, რომ მომავალი წლის გაზაფხულზე, ცენტრალური მილი სოფელ ქაქუთის (იგი ჭანიეთის თემს ეკუთვნის) ბოლო წერტილამდე მივიდოდა. გაზაფხული გავიდა და ზაფხულიც მალე მიიწურება, თუმცა, დღესდღეობით, ჭანიეთში მხოლოდ 11 ოჯახში აინთო ცისფერი ალი. ჩვენი წყაროს ინფორმაციით, მანამ არ გაგრძელდება სამშენებლო სამუშაოები, სანამ აქამდე არსებული უბანი არ დაიტვირთება. ასე რომ, დაპირება დაპირებად დარჩა, რის გამოც, მოსახლეობა სამართლიან საყვედურს გამოთქვამს.

ამასობაში კი, 20 ივლისს საქართველოს ენერგეტიკისა და ბუნებრივი რესურსების სამინისტროს ოფიციალურ ვებგვერდზე განთავსდა ინფორმაცია, რომ საპრეზიდენტო პროგრამის _ “გაზი ყველა სოფელში” _ ფარგლებში, კომპანია “იტერა-საქართველომ” სოფელ ჭანიეთში გაზიფიცირება დაასრულა.

“გურია ნიუსი”კომპანია “იტერა-გაზის” დაქვემდებარებაში მყოფ შპს “სამტრედია გაზის” უბნის უფროსს, გია ჩხატარაშვილს შეხვდა და ჭანიეთში გაზის შეყვანასთან დაკავშირებულ საკითხებზე ესაუბრა:

_ ბატონო გია, ჭანიეთელები შეჩერებული სამუშაოების გამო პასუხს ითხოვენ, ენერგეტიკის სამინისტროს ვებგვერდზე კი განთავსდა ინფორმაცია, რომ ჭანიეთში გაზიფიცირება დასრულებულა.

_ ვინ თქვა ასეთი სისულელე? რა შეკითხვაა ეს? ოზურგეთში არ დასრულებულა ჯერ გაზიფიცირება და ჭანიეთში როგორ დამთავრდებოდა? ერთი ოჯახიც რომ დარჩეს გაზის გარეშე, დასრულებულად არ ითვლება, ჭანიეთში ჯერ 11-მა ოჯახმა მიიღო გაზი და აწი უნდა მოხდეს სრული გაზიფიკაცია.

_ ესე იგი, ასეთ ინფორმაციას თქვენ სიცრუედ მიიჩნევთ?

_ რა სისულელეა, სად არის დოკუმენტაცია? ვინ თქვა? ზღაპარია ეგ.

_ ჭანიეთის დასაწყისიდან ცენტრამდე, მხოლოდ ნახევარი კილომეტრია. ამ მონაკვეთზე შეყვანილ გაზის მილსადენზე მხოლოდ 11 ოჯახია. რატომ უნდა დაისაჯონ სხვები?

_ თუ არ დაიტვირთა არსებული ქსელი, კომპანია თავს შეიკავებს გაზის გაყვანისგან. მოსახლეობამ უნდა გამოამჟღავნოს აქტიური სურვილი, რომ სურს გაზი. ეს არის ბიზნესი და წაგებაზე არავინ იმუშავებს.

_ მოსახლეობა მიიჩნევს, რომ “სოკარი” უფრო უკეთესი პრაქტიკული ფორმით მუშაობს _ თითოეული ეზოს წინ გაჰყავს მილი, “იტერა” კი ერთ წერტილთან რამდენიმე მოსახლის მიერთებას ითხოვს, ანუ ხარჯი გაცილებით მეტია.

_ არანაირი წინ და უკან გაყვანა არ ხდება. ახლა ზოგს ძველი დრო ჰგონია _ დაიძახა ბრიგადირმა და მორჩა, გაზი შემოგივა სახლში! ასე არ იქნება.

_ ხალხს ძალიან უნდა, გაზი ჰქონდეს. რა ქნან ახლა, როცა მშენებლობა სოფლის ცენტრში შეჩერდა?

_ მოვიდნენ ჩვენთან, შემოიტანონ განცხადება და დავიწყებთ მუშაობას. ავტობუსში და “შუკაში” ვინ რას ლაპარაკობს, არ ვიცი, ოფიციალურად მოგვმართონ.

_ ხალხი ამბობს, რომ ძალიან ძვირი ჯდება ერთ ოჯახში გაზის შეყვანა _ დაახლოებით, 700 -დან 1000 ლარამდე.

_ არასწორი ინფორმაცია გაქვთ _ ამდენი არ ჯდება. გააჩნია პროექტს _ რამდენი წერტილის დამონტაჟება სურს აბონენტს.

_ რამდენ ხანს უნდა ველოდოთ ჭანიეთში გაზს?

_ არ ვიცი, ვერ გეტყვით. ოზურგეთში გრძელდება, აგერ, რამდენი ხანია და არ დასრულებულა. ჩვენ მზად ვართ, როცა მოსახლეობა მოგვმართავს, მოვემსახუროთ.

“გურია ნიუსი” სოფელ ჭანიეთის მაჟორიტარ დეპუტატს, ავთანდილ სურგულაძეს ესაუბრა.

_ ბატონო ავთო, თქვენ აქტიურად ხართ ჩართული სოფელში გაზის შემოყვანის საქმეში. რამდენად სწორად მიგაჩნიათ ენერგეტიკის სამინისტროს მიერ გავრცელებული ინფორმაცია ჭანიეთში გაზიფიცირების სამუშაოების დასრულების შესახებ?

_ არ ვიცი, ასეთი ინფორმაცია ვინ გადასცა. ჭანიეთში ახლა იწყება გაზის შემოყვანა. მე შევხვდი “სამტრედია გაზის” დირექტორს ბადრი ტატუნაშვილს, რომელიც შემპირდა, რომ მაქსიმალურად ეცდება, დაასრულოს გაზიფიცირება. მჯერა, რომ ბადრი ტატუნაშვილი, ჭანიეთელთა აქტიურობის შესაბამისად, ნათქვამ სიტყვას შეასრულებს და სოფელში წლის ბოლომდე ბევრ ოჯახში აინთება ცისფერი ალი. ყველა ღონეს ვიხმარ, რომ ეს ასე მოხდეს.