ასეთი შეხვედრა ჟურნალისტებთან ტრადიციულ ხასიათს მიიღებს და იგი ყოველი თვის დასაწყისში ჩატარდება. უჩა ნანუაშვილმა შეხვედრა ენერგეტიკის მინისტრის კახი კალაძისა და სახალხო დამცველს შორის მომხდარი გაუგებრობის ახსნით დაიწყო. რაშიც ენერგეტიკის სამინისტროს პრესსამსახური დაადანაშაულა. თუმცა აღნიშნა, რომ მიუხედავად გაუგებრობისა, მთავარია ხაიშელების მოთხოვნა დაკმაყოფილდა. იგი მიესალმება ენერგეტიკის მინისტრის კახი კალაძის მიერ მიღებულ გადაწყვეტილებას ხაიშში აზომვითი სამუშაოების შეჩერებასთან დაკავშირებით.
“ჩვენ ორი დღის წინ საუბარი გვქონდა ხაიშის მოსახლეობასთან, მოვისმინეთ პრობლემები, კითხვები და მათი თხოვნა გადავეცით როგორც ინვესტორ კომპანიას, ასევე ენერგეტიკის სამინისტროს. მოსახლეობის თხოვნა იყო გამართულიყო შეხვედრა სამინისტროსა და ინვესტორ კომპანიასთან. ასევე მეორე თხოვნა მდგომარეობდა იმაში, რომ უფრო მეტი დრო ყოფილიყო გამოყოფილი ე.წ. ყრილობის ორგანიზებისთვის, რომელიც დაანონსებული იყო.
ყრილობის თემა უკვე გადადებულია…”
_ ბატონო უჩა, მიუხედავად იმ გაუგებრობისა, რომელიც თქვენსა და ენერგეტიკის მინისტრს შორის მოხდა, განაცხადეთ რომ აუცილებლად უნდა შედგეს დებატები. რა დებატებზე საუბრობთ?
_ ჩვენ ვსაუბრობთ დებატებზე, რომელიც 28 თებერვალს საჯარო ბიბლიოთეკაში შედგება. მაგრამ, ჩვენი დამოკიდებულება არის განსხვავებული. ჩვენ დაინტერესებულები ვართ შევისწავლოთ აღნიშნული საკითხი უფლება დაცვითი კუთხით. გამოვავლინოთ ირღვევა თუ არა ადგილობრივი მოსახლეობის უფლებები, არის თუ არა თუნდაც კომპენსაციის საკითხი დარეგულირებული. არის თუ არა განსახლების გეგმა მომზადებული. ჩვენ თითქმის დავამთავრეთ მუშაობა, გავაანალიზეთ ის ინფორმაცია, რომელიც სახალხო დამცველისთვის ამ საკითხებთან მიმართებაში გახდა ცნობილი. რა თქმა უნდა, ამ ინფორმაციას საზოგადოებას გავაცნობთ.
რაც შეეხება დებატებს, ეს არის ჩვენი კიდევ ერთი ინიციატივა. გვინდა მსგავსი დებატები შედგეს. მოვიწვევთ ყველა მხარეს. სადაც სწორედ ამ კუთხეზე იქნება საუბარი. ასევე საუბარი იქნება უფლებების კუთხით არსებულ მდგომარეობაზე. არა ზოგადად ხუდონჰესთან დაკავშირებულ პრობლემებსა და ენერგეტიკულ საკითხებზე, არამედ მხოლოდ უფლებების კუთხით.
_ თქვენ განაცხადეთ, დასკვნა თითქმის ბოლომდე გვაქვს მიყვანილიო, რა შეგიძლიათ გვითხრათ პირველადი ინფორმაციის სახით?
_ჩვენ დეტალურად ვამზადებთ დასკვნას. კიდევ ერთხელ ვიმეორებ უფლებადაცვითი კუთხით არის თუ არა დარღვეული ადგილობრივი მოსახლეობის, ხაიშელების უფლებები და ზოგადად ამ პროცესების შეფასება. თუმცა შემიძლია პირველადი ინფორმაციით განვაცხადო, რომ მთლიანად ამ პროცესში არის გარკვეული ხარვეზები. მათ შორის ხელისუფლების მხრიდან.
_ რომელს გულისხმობთ, ახალს თუ წინა ხელისუფლებას?
_ ფაქტია ის, რომ წინა ხელისუფლებამ… პირველ რიგში ხდება გარემოს ზემოქმედების შეფასება, თუ როგორ მოახდენს კონკრეტული ჰესის აშენება გარემოზე ზემოქმედებას. მომზადდება ანგარიში, რომელიც საზოგადოებას გაეცნობა. შემდეგ ხდება მშენებლობაზე ნებართვის მიღება. ბოლოს კი ხდება მემორანდუმის და ხელშეკრულების გაფორმება ხელისუფლებასა და ინვესტორს შორის. ჩვენთან ყველაფერი უკუღმა დაიწყო. ანუ არსებობს მხოლოდ ხელშეკრულება, მემორანდუმი სამინისტროსა და ინვესტორ კომპანიას შორის და არ არსებობს ქვემო რგოლები. ყველაფერი უკუღმა დაიწყო. სწორედ ეს არის იმის საფუძველი, რომ ამ საქმეში არის გარკვეული დარღვევები.
იგივე კომპენსაციებთან დაკავშირებით არავის არ აქვს კონკრეტული ინფორმაცია. რა სახის კომპენსაცია უნდა მოხდეს და როგორ?! თუნდაც განსახლების გეგმასთან დაკავშირებით, ჩვენ შევხვდით “ტრანსელექტრიკა ჯორჯიას” წარმომადგენლებს, მათ მოგვცეს გარკვეული დოკუმენტები. მაგრამ, ჩვენთვის იქაც ბევრი რამ გაუგებარია. შეიძლება ითქვას, რომ ბევრი რამე საერთაშორისო სტანდარტებს არ უახლოვდება. ბევრი პრობლემები არის იმ მხრივ, რომ არის დიდი რისკი იმისა, რომ მოსახლეობის უფლებები იყოს ხელყოფილი. ჩვენ სწორედ ამიტომ ვაპირებთ დეტალური დასკვნის გამოქვეყნებას.
ეს არის ჩვენი წინასწარი მონაცემები.
_ თქვენი აზრით, ხუდონჰესი უნდა აშენდეს?
_ არ ვიცი. როგორც ეკონომიკურ პროექტზე, ნაკლებად შემიძლია კომენტარის გაკეთება, იმიტომ, რომ ქვეყნისთვის საჭიროა ეკონომიკის განვითარება, ენერგოდამოუკიდებლობა. მაგრამ როგორ მოხდება ეს ყველაფერი, რის ხარჯზე ხდება ქვეყნის ეკონომიკური განვითარება, ამას ჩემთვის ძალიან დიდი მნიშვნელობა აქვს.
_ ხომ არ გაქვთ ინფორმაცია როდის გაიმართება მესტიაში უხუცესთა კრება?
_ მე არ ვიცი როდის გაიმართება სვანეთში დაანონსებული ყრილობა. ეს ნამდვილად ჩვენს პრეროგატივას აღემატება.
