დღეს, 10 თებერვალს თბილისის სააპელაციო სასამართლომ ძალაში დატოვა თბილისის საქალაქო სასამართლოს გადაწყვეტილება, რითაც გაუქმდა 2011 წლის 27 დეკემბრის წიდის მთლიანი მარაგის გასხვისების ხელშეკრულებები. ს.ს. “ქართულმა ფოლადმა” დაიბრუნა თავისი აქტივი _ წიდა და ნაცარი.
“ქართული ფოლადის” დირექტორის, ნათია ჯაყელის განცხადებით, სამართლიანობის აღდგენისათვის ბრძოლის გზაზე უკვე არაერთი მნიშვნელოვანი გამარჯვებაა მიღწეულია. ნათია ჯაყელი დარწმუნებულია, რომ ის ადამიანები, რომელთაც უკანონო გარიგებებით მარტო სახელმწიფო ბიუჯეტი 39 მილიონი ლარით აზარალეს, კანონის შესაბამისად პასუხს აგებენ.
ნათია ჯაყელი: “უკვე რამდენიმე თვეა ს.ს. “ქართული ფოლადის” მოთხოვნათა სიაში ფიგურირებს ერთ-ერთი თემა _ მაქინაციებითა და კრიმინალური ქმედებებით ინა გუდავაძემ და მისმა გუნდმა, რომელიც დღეს შ.პ.ს “რუსთავის ფოლადს” აკონტროლებს, საქართველოს ბიუჯეტიდან 39 მილიონი ლარი მოიპარა. ჩვენ უკვე გავასაჯაროვეთ ის დოკუმენტები, რომელიც ამ ფაქტის უტყუარი მტკიცებულებაა. დანარჩენი კი მარტივი არითმეტიკაა. ეს მთელი სქემა ერთ დღესაა განხორციელებული, უფრო სწორად ლამის ერთი წუთის ინტერვალით.”
“გურია ნიუსმა“აღნიშნული ანგარიშფაქტურებიუკვე გამოაქვეყნა სტატიაში (“ზესაიდუმლო გარიგება _ პატარკაციშვილებს 39 მილიონის მოპარვაში ადანაშაულებენ”)
“ეს ანგარიშფაქტურები ამტკიცებენ შემდეგს: რამდენიმე წუთის სხვაობით, ქართული ფოლადის კუთვნილი წიდა ჯერ მიყიდეს შუალედურ კომპანიას 3 916 418 ლარად და 1 წუთის შემდეგ იმ შუალედურმა კომპანიამ მიყიდა რუსთავის ფოლადს 256 178 000,00 ლარად. შედეგად წარმოიქმნა დღგ 39 მილიონი (არა რეალური, არამედ ვირტუალური). მათ ეს ვირტუალური თანხა გაანაღდეს, ანუ აქციეს რეალურად – არ არსებული მოიპარეს ბიუჯეტიდან.” _ აცხადებს ნათია ჯაყელი.
სასამართლო პროცესის დასრულების შემდეგ, ქართული ფოლადის დირექტორმა “გურია ნიუსს” განუცხადა:
“დღეს ჩვენ სამართლებრივ ბრძოლაში კიდევ ერთ დიდ გამარჯვებას მივაღწიეთ. უპრეცენდენტო ზეწოლის, შანტაჟის და სიმართლის სათავისოდ შეფუთვის მცდელობის ფონზე, სამართლიანობამ მაინც იზემა და ვიმედოვნებთ რომ ძალიან მალე დავბრუნდებით ჩვენს რუსთავის მეტალურგიულ ქარხანაში!”
ნათია ჯაყელის თქმით, არსებობს კიდევ ორი თემა, რომელიც აუცილებლად უნდა იცოდნენ “რუსთავის ფოლადის” კონტრაგენტმა ფირმებმა.
1. მივმართავ რუსთავის მეტალურგიული ქარხნის თანამშრომლებს: წიდისა და ნაცრის დაყადაღების გადაწყვეტილება ხელს არ უშლის საწარმოს ძირითად პროცესს, თქვენ ყოველთვის შეგეძლოთ წიდის გადამუშავება. შპს “რუსთავის ფოლადის” მენეჯმენტი დეზინფორმაციას ავრცელებდა და ახლაც ამ მეთოდს გამოიყენებს დაშანტაჟებისთვის, მაგრამ იცოდეთ რომ ესეც, როგორც ბევრი რამ, მტკნარი სიცრუე იქნება. ვიმეორებ, წიდის საწარმოო მიზნებისათვის გამოყენება აკრძალული არ არის!
2. საქართველოს მთავარ პროკურატურასა და შპს “რუსთავის ფოლადის” კონტრაგენტ ფირმებს!
სასამართლო გადაწყვეტილებით შპს “რუსთავის ფოლადს” აკრძალული აქვს წიდის გასხვისება და უფლებრივად დატვირთვა! მიუხედავად ამ გადაწყვეტილებისა, ისინი ისევ აგრძელებენ წიდის გაყიდვას!
ნებისმიერი ქვეყნის კანონმდებლობით მსგავსი ქმედება დასჯადია, ამიტომ ჯობს მოკლევადიანი მოგებისაგან თავი შეიკავოთ და ნებსით თუ უნებლიედ კანონის დამრღვევთა რიგებში რუსთავის ფოლადთან ერთად თქვენც არ აღმოჩნდეთ. გვერწმუნეთ ჩვენი უფლებების სრულად აღდგენის შემდეგ, ჩვენი თანაშრომლობა ისევ ორმხრივად საინტერესო იქნება.
საქართველოს მთავარ პროკურატურას ვთხოვთ ადეკვატური და დროული რეაგირება მოახდინოს: ინა გუდავაძისა და მისი გუნდის მიერ საქართველოს ბიუჯეტის მინიმუმ 39 მილიონი ლარით დაზარალების გამო და აღკვეთოს უფლებრივი შეზღუდვის მქონე ქონების უკანონო გასხვისება!”
რაც შეეხება 39 მილიონის საკითხს, “გურია ნიუსის” კითხვებზე პატარკაციშვილების ადვოკატი, გიორგი გეწაძე ასეთ კომენტარს აკეთებდა
_ ბატონო გიორგი, ანგარიშფაქტურები, რომელიც ჩვენს ხელთ არის, ძალიან ბევრ კითხვის ნიშანს აჩენს. ანგარიშფაქტურები, ამტკიცებენ შემდეგს: რამდენიმე წუთის სხვაობით, ქართული ფოლადის კუთვნილი წიდა ჯერ მიყიდეს შუალედურ კომპანიას 3 916 418 ლარად და 1 წუთის შემდეგ იმ შუალედურმა კომპანიამ მიყიდა რუსთავის ფოლადს 256 178 000,00 ლარად. შედეგად წარმოიქმნა დღგ 39 მილიონი. აი ამ 39 მილიონზეა საუბარი. სხვაობა მართლაც უზარმაზარია…
_ იცით როგორ არის, კი ბატონო, არსებობს ეს ორი ხელშეკრულება, მე არ ვარ უფლებამოსილი, ამაზე ვისაუბრო. არ ვიცი, რა ვითარებაში მიმდინარეობდა მოლაპარაკება. ერთია ნასყიდობის ხელშეკრულების გაფორმება და მეორეა კრიმინალი. იმისთვის, რომ მისი განცხადება იყოს ლეგიტიმური, ერთადერთი სასამართლოს კანონიერ ძალაში შესული გადაწყვეტილებაა, რაც არ არსებობს. მისი ეს განცხადება შეიძლება იყოს ვარაუდი, რომელსაც არაფერი აქვს საერთო ფაქტებთან. არ შეიძლება თუნდაც ანგარიშფაქტურა იყოს ამის მტკიცებულება. მისი ეს განცხადება არის კომპანიისთვის საქმიანი რეპუტაციის შემლახავი.
_ ფაქტია, ბატონო გიორგი ისიც, რომ 3 მილიონად ნაყიდის 256 მილიონად გაყიდვა ერთ წუთში ჩვეულებრივი ამბავი არ არის. ასე არ ხდება…
_ ვერაფერს გეტყვით, მაგ კითხვით უფრო ხელმძღვანელობას უნდა მიმართოთ. ამ ხელშეკრულების შესახებ ვერაფერს გეტყვით.
