6 აგვისტოს, თავისუფალი დემოკრატების ლიდერი, ირაკლი ალასანია ოზურგეთის მუნიციპალიტეტის სოფლების _ ნატანების, შრომის, მერიისა და ძიმითის მოსახლეობას შეხვდა. მძიმე სოციალური ფონი, უმუშევრობა, მოუწესრიგებელი შიდა თუ ცენტრალური გზები, უწყლობა, თურქეთში გადახვეწილი მოსახლეობა, ნიჰილიზმი, დაშინება _ ეს ის პრობლემებია, რომელთა შესახებაც ამ სოფლების მცხოვრებლებმა ირაკლი ალასანიასთან შეხვედრაზე ისაუბრეს.
_ გურია უპატრონოდაა დარჩენილი, საერთოდ არ აინტერესებთ ჩვენი ბედი. 21-ე საუკუნეში წყლის პრობლემა როგორ უნდა იყოს? დასაქმების უდიდესი პრობლემა გვაქვს _ მოსახლეობის 50% თურქეთშია გადახვეწილი, ახალგაზრდებს ვერ ნახავთ სოფლებში. თურქეთში თუ კრეფენ თხილს და ჩაის, საკუთარ მიწა-წყალზე იმუშაონ, არ ურჩევნიათ? იაფი კრედიტი რომ მოგვცეს სახელმწიფომ, გლეხისთვის ცოტა შეღავათი იქნება. 600 ჰექტრიდან 20 ჰექტარი თუ იქნება დათესილი ამხელა სოფელში. ყანების დასათესი ფული არ გვაქვს, არც ტრაქტორიც გვყავდა წელს. სასუქი იცით, რა ღირს და რამდენი უნდა ვიყიდოთ? რით უნდა შევიძინოთ? ამერიკული სიმინდი ძალით აყიდინეს ხალხს _ გლეხს ასწავლიან, რა სჯობია, როცა მთელი ცხოვრება თოხი გვიჭირავს ხელში? არჩევნები რომ დაიწყება და მაშინ დაიწყებენ გზების გაკეთებას, მერე ისევ მიატოვებენ, ესაა საქმე? ისეთი შენობებია დანგრეულია, გული მოგიკვდებათ, _ თქვეს სოფელ ნატანების მცხოვრებლებმა, _ იმის ნებასაც არ გვაძლევენ, ჩვენი სახლების წინ მიწაში ჩაყრილი, დაჟანგული და უვარგისი მილები ამოვიღოთ, ჯართში ჩავაბაროთ და ამ ფულით წყალი ჩვენ თვითონ გამოვიყვანოთ. ადგილობრივი ხელმძღვანელობა ჩვენთან არ არსებობს, სოფელში არაფერი არ წყდება, არანაირი ფუნქცია სოფლის რწმუნებულს არ აკისრია. ელემენტარულ ცნობას ვერ გვაძლევს სოფლის რწმუნებული, სოფელს არ უნდა ჰქონდეს საკუთარი ბიუჯეტი? თვითმმართველობა უნდა დაბრუნდეს სოფელში, თორემ სოფელი წაიშლება. სააკაშვილი რომ დაგვპირდა, პენსია ასი დოლარი გახდებაო, სადაა? რომ იქნებით მთავრობაში, ბატონო ირაკლი, მერე ეგ დაპირებები და ხალხთან შეხვედრები თქვენც არ დაივიწყოთ! ხალხს არც ოპოზიციის სჯერა, თორემ აქ მეტი ადამიანი მოვიდოდა. საარჩევნოდ არის დაშინებები, დამუქრებები. როდის მოეღება ამას ბოლო? _ შესჩივლეს სოფელ ნატანების მცხოვრებლებმა “თავისუფალი დემოკრატების” ლიდერს.
სოფელ შრომაში ირაკლი ალასანიასთან შეხვედრისას მოსახლეობა ნაკლები აქტიურობით გამოირჩეოდა _ მიზეზად მათ უიმედობა და შიში დაასახელეს, თუმცა, მათი პრობლემები ნატანებლების პრობლემებისგან არ განსხვავდება: შიდა და ცენტრალური გზების მოუწესრიგებლობა, უწყლობა, უშუქობა, უმუშევრობა, თურქეთში გადახვეწილი მოსახლეობა, შიში.
ნატანების შემდეგ, სოფელი შრომა ყველაზე დიდი სოფელია. სოფელში 1 600 კომლი ცხოვრობს. აქ ერთადერთი შემოსავალი ჩაი იყო. ახლა ჩაის ფაბრიკები დანგრეულია და ჩაის საკრეფად თურქეთში არიან წასულები: _ წელს მოსახლეობამ ციტრუსი სანაგვეზე გადაყარა; ხალხში ღირსება და რწმენა დაკარგულია, უიმედობაა არა მარტო ხელისუფლების, არამედ ოპოზიციის მიმართაც. არავის არაფრის აღარ სჯერა, სოფელი სოფელს ვერ უკავშირდება, ხიდიც გასაკეთებელია, შარშან გვპირდებოდნენ, გაზაფხულზე დაიწყება მშენებლობაო, მერე ივნისშიო, ახლა არჩევნები მოვა და ალბათ, მაშინ დაიწყებენ. ორი წელია გვესმის, გზას გავაკეთებთო. შუქის ზედმეტი გადასახადის გამო მეზობელი მეზობელს მისდევს, არა შენ მპარავ, არა _ შენო. ვინ მოაგვარებს ამდენ პრობლემას? არ გვგონია, რომ ამ გაჭირვებულ ხალხს რაიმე ეშველოს, _ თქვეს შრომელებმა.
სოფელ მერიაში მოსახლეობამ უმთავრეს და უპირველეს პრობლემად მერიაში არსებული კარიერი დაასახელა და დახმარება ითხოვა. მათი თქმით, მდინარემ შეიცვალა კალაპოტი და რამდენიმე ჰექტარი საყანე ფართობი წაიღო, თუმცა, აქაურებს ერთი ნიჩაბი ქვიშა-ხრეშის ამოღების უფლება არ აქვთ: _ გვგონია, ოკუპირებულ ტერიტორიაზე ვცხოვრობთ, არაფრის უფლება ჩვენ არ გვაქვს, _ ამბობენ აქაურები.
ძიმითსა და მერიაში მოსახლეობა ალასანიასთან შეხვედრისას მეტი აქტიურობით გამოირჩეოდა. სხვების მსგავსად, მათაც უმუშევრობა, შიდა გზების მოუწესრიგებლობა აწუხებთ. მათ სოფლის მეურნეობის აღდგენა და ყურადღების მიქცევა მოსთხოვეს ალასანიას მისი ხელისუფლებაში მოსვლის შემდეგ.
ირაკლი ალასანიამ მოსახლეობას საარჩევნო გარემოს შეცვლისა და გაუმჯობესების გეგმა გააცნო: _ სერიოზულად ვმუშაობთ ამ კუთხით. გვქონდა მოლაპარაკება აშშ-ში _ ისინი მხარს გვიჭერენ. იცის სააკაშვილმა, რომ არავინ დაუჭერს მას მხარს, თუ არჩევნებს გააყალბებს. სამოქალაქო საზოგადოება უნდა დაგვიდგეს გვერდით. გვინდა, დავანახოთ სააკაშვილს, რომ მარტო ჩვენ კი არ ველაპარაკებით, ცვლილებები მარტო მე კი არ მინდა, ხალხს სჭირდება. ადამიანებს აშინებენ, ემუქრებიან, თუმცა, აქ მეორე მომენტიც არის _ სამოქალაქო პასუხისმგებლობა ყველამ უნდა ვიგრძნოთ. გპირდებით, რომ არჩევნებზე ვერავის დააშინებენ, ამას საერთაშორისო მეგობრობის მხრიდან რეაქცია მოჰყვება. ძალიან მძიმე სოციალური ფონია დღეს _ უმუშევრობა, ტოტალურად გაზრდილი ფასები. ცვლილების ერთადერთი გზაა მშვიდობიანად, არჩევნებით შევცვალოთ ხელისუფლება. ძალადობა კიდევ უფრო უკან წაიყვანს ქვეყანას. მთავარი და უპირველესი ის არის, მივაღწიოთ იმას, რომ პოლიცია და უშიშროება არ ჩაერიოს არჩევნებში, შიში, რომელიც არსებობს ადამიანებში, უნდა აღიკვეთოს; მონოპოლიები უნდა მოვსპოთ, თვითმმართველობა უნდა გავაძლიეროთ, არც სასამართლო გვაქვს. ასე ცხოვრების გაგრძელება არ შეიძლება, _ თქვა ალასანიამ.
