გურიას “თავისუფალი დემოკრატების” ლიდერი ირაკლი ალასანია სტუმრობდა. ცვლილების მოსურნე პოლიტიკოსს უცვლელი და უფრო მეტიც, უარესობისკენ შეცვლილი დახვდა ნატანები, შრომა, მერია, ძიმითი… ამას ამბობდა სოფლების ცენტრებში შეკრებილი ხალხიც, რომელსაც რაოდენობა თუ აკლდა, არ აკლდა გულწრფელობა, ტკივილი და საწუხარი.
მიუხედავად ტელევიზიებით ყოველდღიურად “ყველაზე მაგარი” ქვეყნის _ საქართველოს შესახებ მოთხრობილი საყმაწვილო თუ დიდების ზღაპრებისა, სოფლის ხალხი ერთ ხმაში იძახდა, უმუშევრობამ თურქეთში წაგვლეკა და უწყლობამ ხმელეთზე ამოყრილი თევზებივით დაგვაოსაო.
ლამის, ხუმრობადავიწყებულმა გურულებმა ირაკლი ალასანიას კითხვაზე, ბოლო დროს ყველაზე სასიხარულო დღე რომელი გაგითენდათო, _ ტიტუუ, ბატონო ირაკლი, გზები რო დახნეს, ყველაზე უფრო მაგი გაგვიხარდა, მარტო ჩვენ კი არა, პაწა ბაღნები, ფეხზე რომ ვერ დადიენ და ვერ ლაპარაკობენ, იგენიც გადეირიენ სიხარულით, მარა რად გინდა, დარჩა ეს გზები ასე გადახნული, რომელზეც ბავშვები კი არა, მიხაკო ორაგველიძის მიერ დატიებული ტანკი ლულას ერთი წაბორძიკებით მოიტეხსო!
“გურია ნიუსი” “თავისუფალი დემოკრატების” ლიდერს ირაკლი ალასანიას თან ახლდა სოფლების შემოვლისას და მასთან ინტერვიუც ჩაწერა.
_ ბატონო ირაკლი, თქვენ აპირებთ ხელისუფლებაში მოსვლას, თუმცა, ხალხი თქვენი “ექვსეულის” დაშლასაც ვარაუდობს.
_ მთავარი აქ არის თითოეული ჩვენგანის გადაწყვეტილება, გვინდა თუ არა, დაიწყოს ცვლილებები. მე ვხედავ, რომ ჩვენს მოქალაქეებს სურთ ცვლილება. 7 წელია, საქართველოში ნაციონალური მმართველობაა და რაც “გაკეთდა”, არის ის, რომ უმუშევრობა გაიზარდა; სოციალური მდგომარეობა კიდევ უფრო გართულდა, არც ერთი დაპირება არ შესრულებულა და ბუნებრივია, საზოგადოებას სჭირდება ახალი პოლიტიკური ძალა, რომელიც გამოიყვანს ქვეყანას კრიზისული მდგომარეობიდან. როგორ უნდა გახორციელდეს ეს? ძალადობას საკუთარი თავის, საკუთარი საზოგადოების მიმართ ჩვენ არ ჩავიდენთ, ამ ხელისუფლებას ძალით არ შევცვლით. ამიტომ, რჩება ერთადერთი გზა _ არჩევნები. საარჩევნო გარემო რომ გაუმჯობესდეს, ამ ბრძოლაში ზოგიერთს არ ეყო გამბედაობა და დანებდა, მაგრამ ჩვენ, 6 პოლიტიკური ძალა, ვაგრძელებთ ამ ბრძოლას და დარწმუნებული ვართ, რომ ზეწოლა არჩევნებზე არ იქნება. არ იქნება იდეალური არჩევნები, მაგრამ უნდა იყოს რევოლუციური არჩევნები, უნდა გამოვლინდეს მოსახლეობის ფართომასშტაბიანი ნება. თითოეულმა მოქალაქემ საკუთარ თავში რწმენა უნდა დააგროვოს და შემდეგ უნდა აღვადგინოთ რწმენა პოლიტიკური პარტიის მიმართ. თუ ჩვენი მოსახლეობის 70-80% გამოვა და არჩევნებში მიიღებს მონაწილეობას, ეს ცვლილება, რომელზეც ჩვენ ვლაპარაკობთ, გარანტირებული იქნება.
_ მოსახლეობა ფიქრობს, რომ არჩევნებს მაინც გააყალბებენ!
_ ეს არის შიშის კულტურა, რაც დანერგეს ბოლო წლების განმავლობაში. რწმენა დაგვეკარგა. ხელისუფლება ვერ გააყალბებს შედეგს, თუ მოსახლეობის დიდი ნაწილი მიიღებს არჩევნებში მონაწილეობას. გარდა ამისა, საერთაშორისო თანამეგობრობამ მკაფიოდ გადაწყვიტა, რომ სააკაშვილი ხელისუფლებაში აღარ უნდა იყოს, უნდა ჩატარდეს თავისუფალი არჩევნები. ეს გადაწყვეტილება მიღებულია. ახლა ჩვენ უნდა გადავწყვიტოთ, გვინდა თუ არა ცვლილება. თითოეული ჩემი შეხვედრა ეძღვნება იმას, რომ ზუსტად ვიცოდეთ, რა პრობლემების წინაშე დგას ჩვენი მოსახლეობა და შევთავაზოთ მას ამ პრობლემების გადაჭრის გზები. სააკაშვილს ჰქონდა არასწორი პოლიტიკა სოფლის მეურნეობის, ეკონომიკის, ქვეყნის უსაფრთხოების დარგში. ამან გამოიწვია ის, რომ 3 წლის წინ საომარ კონფლიქტში შევედით რუსეთთან და კიდევ უფრო მეტი დევნილი გვყავს ქვეყანაში, ვიდრე მანამდე. ამიტომ, ამ ყველაფრის გადააზრება უნდა გახდეს საფუძველი იმისა, რომ ერთდღიანი სამოქალაქო გმირობა ჩავიდინოთ, მივიდეთ არჩევნებზე და შიშის გარეშე მივცეთ ხმა, ვისაც გვინდა.
_ ბატონო ირაკლი, სოფელი თუ ფეხზე არ დადგა, ქვეყანა წელში გაიმართება? გლეხს ყველანაირი სახსარი მოუსპეს. ყვითელი სიმინდისა და კვეზერელის აპოლოგიაზე, შეიძლება, შთამომავლობამაც დიდხანს იცინოს სიმწრით. გლეხს მოძღვრავენ, რომ ამერიკული ყვითელი სიმინდი ყველაზე ხელსაყრელი და პერსპექტიულია. მინისტრმა, ლამის სანაძლეო დაუდო “გურია ნიუსს”, რომ აბაშური ყვითელი ჯიშის სიმინდი, თუნდაც ერთი-ორი კილო, არსად არსებობს.
_ სწორად დასვით შეკითხვა. პირველ რიგში, უნდა დავუმტკიცოთ ბაკურ კვეზერელს, რომ ის დამარცხდა “სანაძლეოში” და ეს, მომავალ წელს მისი ხელისუფლებიდან წასვლით უნდა დავადასტუროთ. გარდა ამისა, სოფლის მეურნეობის პროგრამა იყო პირველი პროექტი, რომელიც ჩვენ, “თავისუფალმა დემოკრატებმა” შევქმენით, იმიტომ, რომ მართლაც გვგონია, მთავარი პრიორიტეტი ჩვენი ქვეყნის პრობლემის გადასაწყვეტად, სოციალური სტრატეგიის დანერგვაა. ვთქვით, რომ სოფლის მეურნეობის განვითარების ფონდი უნდა შეიქმნას, სადაც სახელმწიფომ ბიუჯეტის ერთი პროცენტი კი არ უნდა ჩადოს, არამედ _ სამასი მილიონი. მე მოლაპარაკებული ვარ საერთაშორისო დონორებთან, რომ ფული ჩადონ და მილიარდამდე გაიზარდოს ეს ფონდი, რომელიც მერე შეღავათიან კრედიტს მისცემს ხალხს და გლეხს ექნება საშუალება, ეს ფული საკუთარ მიწას მოახმაროს. დღეს მიწების 70% დაუმუშავებელია. რაც შეეხება ხორბლის მოსავალს, ეს არის 35% იმისა, რაც შევარდნაძის დროს იყო.
_ დააპატიმრეს ოზურგეთის მუნიციპალიტეტის გამგებელი. თქვენი აზრით, ტაკიძემ “დააქცია ქვეყანა”?
_ ჩვენი საზოგადოების, ხელისუფლების მთავარი პრობლემა არის ის, რომ მართლმსაჯულება, დამოუკიდებელი სასამართლო არ არსებობს. ადამიანები, რომლებიც არიან გირგვლიანის მკვლელები, გამოდიან ციხიდან და ინდულგენციას იღებენ პირადად სააკაშვილისგან. ამ დროს, ბუნებრივია, ჩვენ ეჭვი გვიჩნდება ნებისმიერ საქმეზე. რა მოხდა გურიაში? საჭიროა, რეალურად დადგინდეს, რატომ მოხდა გამგებლის დაკავება. ეს იყო არა მარტო გამგებელი, არამედ ნაციონალთა ლიდერი ოზურგეთში, ანუ სერიოზული პრობლემებია ნაციონალურ მოძრაობაში. ეს მაძლევს საფუძველს ვივარაუდო, რომ ნაციონალები სააკაშვილს ვეღარ ხედავენ მომავლის ლიდერად. ამიტომ დაჯგუფებებს შორის იწყება ბრძოლა გავლენის მოსაპოვებლად. ასე შეიძლება, იყოს ტაკიძის საქმესთან დაკავშირებითაც. მთავარი პრობლემა სამართლიანობისა და მართლმსაჯულების არარსებობაა. სააკაშვილს აქვს მონოპოლია მართლმსაჯულებაზე, მედიაზე, ეკონომიკაზე.
_ ამბობენ, ალასანია სააკაშვილის კაციაო. ეს სტუმრობა წინასაარჩევნო სვლაა თუ კიდევ ჩამოხვალთ?
_ ოთხი თვის წინაც ვიყავი გურიაში. მინდა, დაბეჯითებით გითხრათ, რომ ის, რაზეც ვსაუბრობთ, არის რეალისტური პროგრამა. ამის შესრულება იქნება ჩემი მთავარი საზრუნავი. სოფლის მეურნეობის, სამართლიანობის აღდგენა, დამოუკიდებელი სასამართლოს გაჩენა და ხელშეწყობა მცირე და საშუალო ბიზნესისთვის, რომ საზოგადოებაში საშუალო ფენა დაიბადოს. ეს იქნება საფუძველი ძლიერი სახელმწიფოს შექმნისა. გარდა ამისა, მზად ვარ და აუცილებლად გავაკეთებთ იმას, მოხდეს ხელისუფლების დეცენტრალიზაცია. მოსახლეობასთან ვსაუბრობთ და ვხედავთ, რომ სოფლებს იმდენად წართმეული აქვთ ფუნქცია, ცნობასაც ვერავინ გასცემს. რაც შეეხება თქვენს შეკითხვას, პოლიტიკაში ოპონენტი ჩვენთვის მართლაც არ არის მოსისხლე მტერი. გვაერთიანებს სამშობლო და გამოვიყვანთ კიდეც ქვეყანას კრიზისიდან. რაც შეეხება სააკაშვილს, მე იგი მთავაზობდა დიდ თანამდებობას იმიტომ, რომ დაინახა, გადაწყვეტილება მივიღე, წავსულიყავი ხელისუფლებიდან. მიზეზი ამისა იყო ის, რომ არ ვეთანხმებოდი მის აგრესიულ პოლიტიკას, მის ავტორიტარულ თვისებებს პოლიტიკაში და ამიტომ, ვერავინ იტყვის დღეს, რომ რაიმე ფორმით ანგარიშს ვუწევდე მას. მაგალითად, მაისის მოვლენებზე კარგად გამოჩნდა, ვინ თამაშობს ხელისუფლების თამაშს და ვინ აგრძელებს ბრძოლას სამართლიანობისთვის. მე 15 წელი გავატარე სახელმწიფო სამსახურში, სააკაშვილამდეც ვმუშაობდი და ჩემი ამოცანა იყო, სახელმწიფოს სამსახურში ვყოფილიყავი. ახლა უკვე საჯარო პოლიტიკიდან ვაპირებ, სწორედ თქვენთან, ხალხთან ერთად, ჩვენს ქვეყანას სასიკეთო ცვლილებები მოვუტანო. მარტო ვერავინ ვერაფერს შეცვლის, თუ საზოგადოების დიდი ნაწილი არ დაგვიდგა გვერდით. ეს არის გურიაში ჩვენი მოგზაურობის ძირითადი მიზანი.
