ახლა, აგვისტოს მიწურულს, 10 სექტემბრამდე განსაკუთრებული ყურადღება მართებს, როგორც გურიაში იტყვიან, ყველა “მებაღჩე” ქალს _ ამ დროს აუცილებლად უნდა დაითესოს რამდენიმე ბოსტნეული კულტურა, რომელიც ნელ-ნელა აღმოცენდება, შემოდგომა-ზამთარს “დამდიდრებისთვის” მოიხმარს და ადრიან გაზაფხულზე თქვენს სამზარეულოს და სუფრას “მწვანე ეშხი” არ მოაკლდება.
ეს ბოსტნეულია: ნიორი, ოხრახუში (მაკიდო), მწვანე ხახვი, (გურიაში სოხვს ეძახიან), ფხალეულიდან კი წითელი და “ჭყანა”.
ოხრახუში ჩვენს ბოსტნებში ახლაც ბლომადაა, მაგრამ გაზაფხულზეც რომ უხვად გვექნეს, ახლა უნდა დავთესოთ. დათესვისას, გირჩევთ შემდეგნაირად მოიქცეთ: თესლი შეურიეთ თავისზე ორჯერ მეტ (ერთ პეშვ) ფხვიერ მიწას და ასე მიმოფანტეთ წინასწარ მომზადებულ განოყიერებულ ნიადაგზე. როცა ჩათოხნით, ზემოდან დატკეპნეთ. ასე უკეთესად და თანაბარი სიმეჩხრით ამოვა, გამოხშირვაც აღარ დაგჭირდებათ და კარგადაც “გაჯეჯილდება”.
მწვანე ხახვი, რომელსაც გურიაში სოხვს ეძახიან, ისეთი ძირხვენაა, რომლის ზედა მწვანე თუ ქვედა ნაწილი ერთნაირად გემრიელი და პოპულარულია. ხახვის ამ სახეობას მოგრძო ფორმის მომცრო ბოლქვი აქვს, არ უნდა აგვერიოს სხვაში, რადგან მრავალი სახეობა არსებობს. თესლი ხელმისაწვდომია აგრარულ ბაზარში. დათესეთ მწკრივში, 7-8 სმ დაშორებით.
რაც შეეხება ნიორს, როგორც ვიცით, ის სპეციფიკური და განსაკუთრებული დანიშნულების სანელებელია, რომლის გარეშე დიასახლისი და სამზარეულო წარმოუდგენელია, რომ არაფერი ვთქვათ მის სამკურნალო თვისებებზე. ყაირათიანობის მოყვარულთათვის საყურადღებოა ისიც, რომ 1კგ ნივრის ფასმა ჩვენს ბაზრებში უკვე 9 ლარს მიაღწია. ამიტომ, ახლა აუცილებლად უნდა დავთესოთ 1-2 კილო ნიორი, რაც ოჯახს წლის მანძილზე მთლიანად ეყოფა.
ნიორი დავყოთ ლებნებად და დავთესოთ 8-10 სმ დაშორებით, ლებანის წვერო მაღლა, ვერტიკალურ ფორმაში მოაქციეთ. განივად ან თავქვე დათესილიც ამოვა, მაგრამ მიწაში მოტრიალება, ანუ “ყირამალა” გაუჭირდება, ამოსვლაც შეუფერხდება და ბოლქვსაც, შესაძლოა, დეფექტი აღმოაჩნდეს.
ფხალის მოყვარულებმა, როგორც წითელი, ასევე “ჭყანაც” დათესეთ იგივე წესით, როგორც ოხრახუში. თუ შემოდგომაზე ცხელი ამინდები დადგება, ეს ნათესები აუცილებლად მორწყეთ. ნუ დაიიმედებთ თავს, რომ თანდათან აგრილდება და ნათესს წყალი აღარ დასჭირდება.
გახსოვდეთ, თქვენ ახლა საგაზაფხულო თადარიგს იჭერთ, როცა “გამოზამთრებულ” სუფრასა და სამზარეულოს განსაკუთრებით შვენის მწვანილეული.
