29 აგვისტოს, ოზურგეთის მუნიციპალიტეტის სოფელ ჭანიეთში, ადგილობრივ მცხოვრებთა კრება შედგა. როგორც წინასწარ იყო ცნობილი, სოფლის მაჟორიტარი დეპუტატი, ავთანდილ სურგულაძე სხვადასხვა პრობლემურ საკითხზე, მათ შორის, ყოფილ კოლმეურნეთა ქონების განკარგვის თაობაზე და ამჟამად არსებულის კანონიერებაზე, ისაუბრებდა.
როგორც ავთანდილ სურგულაძემ განაცხადა, დარიგებული იყო 300 მოსაწვევი, ანუ სულ ცოტა ამდენივე ადამიანი უნდა მოსულიყო კრებაზე, თუმცა 100-მდე კაციც არ შეიკრიბა. აღსანიშნავია, რომ ახლა თხილის კრეფის სეზონია, სხვა სამუშაოც უამრავი აქვს გლეხკაცს და ამ მომენტმაც განაპირობა დამსწრეთა სიმცირე.
დეპუტატმა ისაუბრა სოფლის პროგრამის ფარგლებში გაწეული მუშაობის შესახებ _ რომ გაკეთდა სტადიონი, მდინარე ჩოლოქზე შენდება დიდი ხნის ნაოცნებარი ხიდი გაღმა-გამოღმა ქაქუთს შორის; მან სინანული გამოთქვა იმ ფაქტის გამო, რომ ხალხის სურვილის შესაბამისად, შეძენილიყო საყანე ფართობების შესაღობი მასალა, თუმცა ენთუზიაზმით არ იმუშავეს და ჯერჯერობით, მავთულბადე თუ ლურსმანი არ გამოუყენებიათ. აღსანიშნავია, რომ სურგულაძის განცხადება სამართლიანია, თუმცა მეყანეების გარკვეული ჯგუფი აწი აპირებს ფართობის შეღობვას, რადგან მოძალებული სამუშაოების გამო დროში ვერ ჩაეტივნენ.
კრებაზე ისაუბრეს აგრეთვე გარე განათებისა და სოფელში გაზის შემოყვანის თაობაზე, რომელიც დაწყებულია და აუცილებლად უნდა დასრულდეს. ხალხმა განსაკუთრებით მწვავე განცხადება გააკეთა ამერიკული პეპლის მომძლავრების გამო: _ ისე მოედო ყველა მცენარეს, გაისად ხეებს ფოთლები აღარ ექნება, გვიშველონ რაიმე, _ კატეგორიულად მოთხოვეს სურგულაძეს. ბატონმა ავთომ თქვა, რომ არაერთხელ მიმართა შესაბამის სამსახურს, სადაც უთხრეს, არსებული შესაწამლი მანქანები აჭარაში გაუშვეს _ საკურორტო სეზონია და სხვანაირად არ ხერხდებაო.
დღის წესრიგის ერთ-ერთ მთავარი საკითხი, ხანგრძლივი დავის საგანი _ სოფელში ყოფილი კოლმეურნეობის ქონებაზე დაფუძნებული შპს-ს არსებობის კანონიერება იყო. სურგულაძემ შეკრებილებს უთხრა, რომ ხალხი შეცდომაშია შეყვანილი _ ლეკიანის ტერიტორიად წოდებული ფართობი, რომელიც სოფელს სარგებლობის უფლებით ჰქონდა კოლმეურნეობის არსებობის ჟამს და იქ სიმინდს თესავდა, სოფლის საკუთრება არასოდეს ყოფილა. ამჟამად ის კერძო პირთა საკუთრებაა და სოფლის ნებისმიერ მცხოვრებს უფლება აქვს, დათესოს და მოიწიოს ყანა, თუმცა, სახელმწიფოს უნდა გადაუხადოს გადასახადი.
იგივე პირობებს სთავაზობენ ხალხს 30 ჰა ჩაის ფართობზე ნედლეულის მოკრეფის შემთხვევაში, რომელიც ასევე უკვე კერძო საკუთრებაა.
სოფელ ჭანიეთის მცხოვრებ თითოეულ ოჯახს კერძო საკუთრებაში მიზომილი აქვს ნორმით გათვალისწინებული, მინიმუმ 1 ჰა მიწის ფართობი, ბევრს კი _ გაცილებით მეტი. დასანანი ის არის, რომ ამ ფართობების ნაწილის დამუშავებას მოსახლეობა თვითონ ვერ ახერხებს, მძიმე ეკონომიკური ყოფის გამო.
_ ძალიან კარგია, რომ კრება ჩატარდა და დეპუტატთან გარკვეულ პრობლემატურ საკითხებზე ვისაუბრეთ. ძალიან გადაჩვეული ვართ ასეთ თავშეყრას. იმედია, შეხვედრები გახშირდება, რაც მეტი პრობლემის გადაჭრის გარანტი იქნება, _ თქვა კრების ბოლოს სოფლის მკვიდრმა, სულიკო ლომჯარიამ.
