საქართველოს იურისტთა ასოციაციის ოზურგეთის ოფისში პრესკონფერენცია 10 სექტემბერს ჩატარდა. ამავე ოფისის ხელმძღვანელმა თამაზ ტრაპაიძემ მოწვეულ სტუმრებს განუცხადა, რომ საია-ს მიერ გავრცელებული ინფორმაცია, რომელიც ეხებოდა ნიკა კვინტრაძის სიცოცხლის ხელყოფის საქმეს, ტელეკომპანიებმა “რუსთავი-2”-მა და “იმედმა” ფაქტების დამახინჯებით გააშუქეს და მოსახლეობის დიდმა ნაწილმა არასწორი ინფორმაცია მიიღო. როგორც ცნობილია, საია “რუსთავი-2”-ს და “იმედს” სასამართლოში უჩივის.
ოზურგეთში ჩატარებულ პრესკონფერენციას სამი მედიასაშუალების და ერთი არასამთავრობო ორგანიზაციის წარმომადგენლები ესწრებოდნენ, დანარჩენი მედია საშუალებების და არასამთავრობო ორგანიზაციების წარმომადგენლები საია-ს მიერ ორგანიზებულ შეხვედრას არ დაესწრნენ:
_ აქ სხვა არასამთავრობო ორგანიზაციის და მედიის წარმომადგენლებიც იყვნენ მოწვეულნი, მაგრამ არ მოვიდნენ, არ ვიცი, შეიძლება, ეს სხვა გარემოებების გამო ხდება. მოგეხსენებათ, რომ საია-ს წინააღმდეგ გაილაშქრა მასმედიის იმ საშუალებებმა, რომლებსაც, ფაქტობრივად, მონოპოლიზებული აქვთ სატელევიზიო სივრცე ქვეყნის მასშტაბით. საია-ს პრესკონფერენცია სხვადასხვანაირად და ფაქტების დამახინჯებით გაშუქდა, _ თქვა თამაზ ტრაპაიძემ.
ნიკა კვინტრაძის სიცოცხლის ხელყოფის საქმესთან დაკავშირებით, მიმდინარე წლის 17 აგვისტოს საია-მ სასამართლო ექსპერტიზის ბიუროს DABS Fingerprints/Forensics LTD-ს, სავარაუდოდ, ნიკა კვინტრაძის დაკავების ამსახველი ფოტო და ვიდეო მასალის ექსპერტიზა შეუკვეთა.
_ ფოტო და ვიდეო მასალაზე გამოსახული პირის შედარებისა და მისი იდენტიფიკაციის მიზნით, ჩვენ ექსპერტ კენეტ ლინჯს გავუგზავნეთ: 1. “რუსთავი-2”-ის ეთერში გასული ვიდეო მასალა, 2. ის ფოტო, რომელზეც ერთ-ერთმა მოწმემ, სავარაუდოდ, ნიკა კვინტრაძე ამოიცნო (ფოტო #2) 3. ნიკა კვინტრაძის პასპორტისა და გარდაცვალების შემდეგ, პროზექტურაში გადაღებული ფოტოები, _ ითქვა პრესკონფერენციაზე.
დასკვნაში წერია: “იმის გათვალისწინებით, რომ სურათებზე არ აღნიშნულა რაიმე მნიშვნელოვანი განსხვავებები, ხოლო ნაპოვნი იქნა რამდენიმე აშკარა მსგავსება, მიმაჩნია, რომ მოცემული სურათები მნიშვნელოვნად ამყარებს მოსაზრებას იმის თაობაზე, რომ სამივე სურათზე – პასპორტის სურათი, სურათი #4 და სიკვდილის შემდეგ გადაღებული ფოტო – ერთი და იგივე პიროვნებაა გამოსახული. სიკვდილის შემდეგ გადაღებული ფოტოსა და მე-4 სურათს ერთმანეთთან მტკიცედ აკავშირებს მარცხენა საფეთქელზე არსებული ამონაზნექი. პასპორტის ფოტოსა და სიკვდილის შემდეგ გადაღებულ ფოტოს შორის კავშირი კი, მორფოლოგიურმა და პროპორციულმა შედარებებმა ცხადჰყო.
ვიდეო ჩანაწერის შემოწმების შედეგად, არ გამოვლენილა მონტაჟის ნიშნები, თუ არ ჩავთვლით მასალის ჩვეულებრივ რედაქტირებას და განათებას, რასაც ორიგინალი მასალის ნახვის გარეშე ვვარაუდობ”, _ ნათქვამია ექსპერტის დასკვნაში.
ახალგაზრდა იურისტთა ასოციაციამ, ამ საფუძვლიანი ეჭვის გამო, მიმართა პროკურატურას და შინაგან საქმეთა სამინისტროს, ხელახლა გამოძიებაში დაბრუნდეს ეს საქმე და გაირკვეს, ხომ არ მოხდა ადამიანის ერთ-ერთი მნიშვნელოვანი უფლების, სიცოცხლის ხელყოფა. თუმცა, სახელისუფლებო არხებმა წარმოდგენილი მასალები ფაქტების დამახინჯებით გააშუქეს.
