(გურია ნიუსი, ჩოხატაური) _ საქართველოს ენერგეტიკისა და ბუნებრივი რესურსების სამინისტროს “ბუნებრივი რესურსების სააგენტომ”, 9 სექტემბერს გამართულ აუქციონზე ზოტის ოქროს შემცველ გოგირდ-კოლჩედანურ გამოვლინებაზე სასარგებლო წიაღისეულის შესწავლა-მოპოვების ლიცენზია გაყიდა. ლიცენზიის საწყისი ფასი 90 ათას აშშ დოლარი იყო. საბოლოო ფასი კი 306 ათასი აშშ დოლარი დაფიქსირდა და ოქროს საბადოს მფლობელი, 40 წლით “ჯორჯიან რესორს კომპანია” გახდა. როგორც კომპანიის ოფიციალური გვერდიდან გავარკვიეთ, იგი ამერიკის შეერთებულ შტატებშია რეგისტრირებული და მისი დირექტორი ბრიტანელი ტიმოთი ჯეიმს ქოფლინია. პროფესიით გეოლოგი, მაგისტრი, კვლევისა და სამთო გეოლოგიის მეცნიერებათა დოქტორი. ოფიციალური ინფორმაციით, კომპანია მინერალების ძიებით არის დაკავებული და ამჟამად ოქროს აღმომჩენ პროგრამას სომხეთში ახორციელებს. კომპანია ძირითადად აღმოსავლეთ ევროპაზე მუშაობს. მისი ყველაზე დიდი აქციონერები მსოფლიო და გერმანიის რეკონსტრუქციის ბანკებია. ოფიციალურ საიტზე, ბოლო პრესრელიზი 31 აგვისტოთია დათარიღებული და სომხეთს ეხება. საქართველოს შესახებ არაფერია ნათქვამი. საიტზე არ იძებნება, რა ინტერესები აქვს კომპანიას ჩვენს ქვეყანაში და მით უმეტეს არ წერია, რომ 9 აგვისტოს ზოტის ოქროს საბადოს 40-წლიანი ლიცენზია შეიძინა.
ის, რაც საქართველოში ამ კომპანიაზე იძებნება, მეტად საინტერესოა _ საჯარო რეესტრის ოფიციალური ვებგვერდის თანახმად, შპს “ჯორჯიან რესორს კომპანიას” იურიდიული მისამართია საქართველო, ძველი თბილისის (ყოფილი მთაწმინდის) რაიონი, ყაზბეგის ქ. ზ3-5. კომპანია საქართველოში 2010 წლის 20 სექტემბერს არის რეგისტრირებული. რა ინტერესები აქვს ამ კომპანიას საქართველოში, რა ღირებულებისაა ზოტის ოქროს საბადო და რეალურად ვინ გახდა მისი მფლობელი, ამ თემაზე ჟურნალისტურ გამოძიებას მალე შემოგთავაზებთ.
