საქართველოს საარჩევნო ადმინისტრაციის თავმჯდომარის მოადგილე გიორგი სიორიძე აცხადებს, რომ ცესკომ არალეგიტიმურ არჩევნებს ბეჭედი დაარტყა და ამ პროცესში მონაწილეობას ის მონაწილეობას ვერ მიიღებდა.
“საარჩევნო რეფორმიდან მოყოლებული, მთელი ჩემი ძალისხმევა მიმართული იყო იქითკენ, რომ საზოგადოებაში გაჩენილიყო ნდობა არჩევნებისა და სარჩევნო ადმინისტრაციის მიმართ. სამწუხაროდ, ჩვენ მივიღეთ საპირისპირო სურათი: უფრო მეტად პოლარიზებული პოლიტიკური ველი, საზოგადოების მხრიდან უფრო მეტი უნდობლობა და რაც მთავარია, ცალკეულ შემთხვევებში ლეგიტიმაციის საკითხი. საარჩევნო ადმინისტრაციას შეეძლო თავის ხელთ არსებული სამართლებრივი ბერკეტები გამოეყენებინა სასიკეთოდ, თუმცა, ამისი ნება არ არსებობდა. დღეს, შემაჯამებელ სხდომაზე მოხდა ასეთი არჩევნებისთვის ბეჭდის დარტყმა. მე ამ პროცესში მონაწილეობას ვერ მივიღებ. საარჩევნო კომისიას აქვს საჭირო უმრავლესობა, რომ მიიღოს ნებისმიერი გადაწყვეტილება. ამის გათვალისწინებით, ჩემი, როგორც ოპოზიციონერი წევრისა და თავმჯდომარის მოადგილის მხრიდან ხმის არამოღება და პროტესტის არქონა, დანაშაულის ტოლფასი იქნებოდა“, _ აღნიშნა გიორგი სიორიძემ.
“გურია ნიუსი“ დაინტერესდა ჰქონდა თუ არა მას კონკრეტული ფაქტები და თუ კი, გეგმავს თუ არა სამართლებრივად ბრძოლას გაყალბებისგან დასაცავად.
“რაიმე სამართლებრივ ქმედებას ამ საკითხთან დაკავშირებით არ ვგეგმავ. ცალკეულ შემთხვევებში ლეგიტიმაციის პრობლემები იყო საქართველოს რამდენიმე დიდ ქალაქში: ქუთაისში, ბათუმში, საქართველოს დიდ ქალაქებში თბილისის შემდეგ. იქ, რომ კანდიდატებს შორის მცირე განსხვავება იყო; იქ, რომ ბათილი ბიულეტენების რაოდენობა აღემატებოდა კანდიდატებს შორის სხვაობას… ფოტო და ვიდეო ფაქტები არსებობდა და აშკარად ჩანდა ნება იყო გამოხატული ოპოზიციონერი კანდიდატის სასარგებლოდ, მაგრამ კომისიამ იმსჯელა და ბათილად ცნო… ქალაქ ბათუმის #3საარჩევნო უბანი არ გადაითვალა, არადა, ოპოზიცია ითხოვდა მის გადათვლას…. და მსგავსი ფაქტი უამრავი იყო. საოლქო საარჩევნო კომისიას და ცესკოს ჰქონდა იმის უფლებამოსილება, კომპეტენცია, პრეროგატივა, რომ გადაეთვალა უბნები თავისი ინიციატივითაც იმ შემთხვევაში, თუ ვიღაცის საჩივარი არ დაკმაყოფილდებოდა, მაგრამ ეს არ გამოიყენა. ამიტომ წავუყენე პრეტენზია ცესკოს ადმინისტრაციას, რომ მის ხელთ არსებული კომპეტენცია არ გამოიყენა ისე, როგორც ეს შეესაბამებოდა დემოკრატიის დაცვას“, _ გვითხრა გიორგი სიორიძემ.
“ამ ქვეყნის არჩევნების მთავარი პრობლემა, არის ის, რომ სახელმწიფო არის მონსტრი, რომელიც არის ყველგან _ დაწყებული სოფლის გამგებლიდან, დამთავრებული პრემიერ-მინისტრამდე. ყველგან არის ერთი პოლიტიკური ძალა წარმოდგენილი და საქართველოს მართავს უშიშროების სამსახური ე.წ. სუსი. სუს-ს აქვს წვდომა ყველგან და ყველაფერზე. სუს-ს წვდომა ჰქონდა საარჩევნო კომისიის წევრებზე, ისინი აშანტაჟებდნენ ადამიანებს. ყველაფერს აკეთებდნენ იმისთვის, რომ ამომრჩეველს თავისუფლად საკუთარი ნება არ გამოეხატა.
მთავარი პრობლემა ის იყო, რომ სუსი არჩევნების დღემდე აკეთებდა ყველა აკრძალულ მეთოდს, რაც არც ერთ დემოკრატიულ ქვეყანაში არ კეთდება და აქედან გამომდინარე, ყველამ კარგად დაინახა, რაც მოხდა 2021 წლის არჩევნებზე. ყველამ კარგად ვნახეთ საარჩევნო უბნებთან ძალიან ახლოს იყო ე.წ. “ძველი ბიჭების“ თავყრილობა და იდგნენ კოორდინატორები, რომლებიც ხელს უშლიდნენ ქვეყანაში ჩატარებულიყო დემოკრატიული არჩევნები. აუცილებლად უნდა თქმულიყო ცესკო-დან, რომ ბევრი პრობლემა იყო ამ არჩევნების დროს, მაგრამ ეს არ გააკეთა. აქედან გამომდინარე, მე ვთქვი ის, რაც დავინახე და რაშიც იყო პრობლემა“, _ გვითხრა გიორგი სიორიძემ.
[sexy_author_bio]
