წელს , გურიაში (როგორც ამბობენ, სამეგრელოშიც), თხილის კულტურა აქამდე არნახული მსხმოიარობით გამოირჩევა.
_კარგა ხანია, ტოტები მიწამდე დაუშვა თხილმა. ასეთი მსხმოიარობა ნაკლებად გვახსოვს. საუცხოო პირი უჩანს. ახლა, მთავარია, ივლისში გვალვა არ იქნეს და არ მოხალოს, თორემ წახდა საქმე. არაფერი არ უშველის, – ამბობენ გურულები და ჩქარობენ მორიგ შეწამვლას.
თხილის პლანტაციების მფლობელთა დიდ ნაწილს შეწამვლის სრული რაოდენობით არ შეუწამლავს. უმეტესობა ამბობს, რომ პლანტაციები იანვრიდან ერთხელ ან ორჯერ შეწამლა აქამდე.
_ხუთი შეწამვლა მაინც სჭირდება კრეფის დაწყებამდე, თუ გვინდა, რომ ხარისხიანი და საიმედო იყოს შესანახად, – ამბობს გამოცდილი ფერმერი აკაკი ღლონტი.
როგორც თხილის მიმღებ პუნქტებში ამბობენ, თხილს წელს ფასიც კარგი ექნება.
_რაც მთავარია, არც ზედმეტი წვიმები უნდა იქნეს ახლა, კრეფამდე დარჩენილ თვენახევრის მანძილზე და არც საპირისპირო-ზედმეტი ცხელი ამინდები, თორემ როგორც ნალექი, ისე გვალვა მოსავალს სანახევროდ მაინც გაანადგურებს, – ამბობენ თხილის მიმღები ოპერატორები „გურია ნიუსთან“.
ავტორი: მარინა ჩიხლაძე
