მუნიციპალიტეტის საკრებულოს გადაწყვეტილებით, საფეხბურთო კლუბ ლანჩხუთის „გურიას“ ადგილობრივი ბიუჯეტიდან 200 000 ლარი გამოეყო.
მას შემდეგ, რაც სახელმწიფომ თავის თავზე აიღო ფეხბურთის დაფინანსება და განვითარების ფონდი შექმნა, ადგილობრივი ბიუჯეტიდან თანხის გაცემის პრეცენდენტი კარგა ხანია არ ყოფილა, თუმცა, გუნდში არსებულმა დღევანდელმა რეალობამ აუცილებლობა მოიტანა, მუნიციპალიტეტის ხელმძღვანელებს ასეთი გადაწყვეტილება მიეღოთ. მიუხედავად იმისა, რომ კლუბს მართავენ კერძო პირები, თავიდანვე იყო შეთანხმება, რომ წილობრივად მუნიციპალიტეტსაც რაღაც თანხები გამოეძებნა. ჰოდა, აღმოჩნდა, რომ ახლა სხვა გზა უბრალოდ არ არსებობდა და ბიუჯეტიდან კლუბისთვის თანხის გაცემის აუცილებლობა დადგა.
აღნიშნულ თემასთან დაკავშირებით გარკვეული კითხვები გაუჩნდათ საკრებულოს დეპუტატებს. კერძოდ, საკმაოდ საფუძვლიანი შენიშვნები გამოთქვა ენმ-ის ერთ-ერთმა ადგილობრივმა ლიდერმა გია გოგუაძემ.
„მაინტერესებს დღეს ვინ მართავს კლუბს?! იურიდიულად ვინ არიან ეს ადამიანები?! ფულს რომ ვაძლევთ ვის ვაძლევთ და რა ფორმით?!“-ჯერ ეს იკითხა გოგუაძემ. პასუხად მიიღო ის, რომ საუბარია შპს „ლანჩხუთის გურიაზე“.
„გასაგებია, მაგრამ ამ ეტაპზე მას ხომ შეჩერებული აქვს მართვის უფლება, თუმცა ხელფასები გუშინ მაინც დაარიგა. როგორ ხდება ეს?! იცით თქვენ ჩემი დამოკიდებულება ფეხბურთთან მიმართებაში, მაგრამ მალე გაგაცნობთ იმ კვლევის შედეგებს, რომელიც „გურიას“ ბოლო წლების ფინანსურ საკითხებს ეხება. 2008 წლიდან 2012 წლამდე, ჩვენ როცა ვიყავით ხელისუფლებაში, გუნდს დავახარჯეთ მილიონ 200 ათასი ლარი და რეგიონალური ლიგიდან უმაღლეს ლიგაში გადავიყვანეთ. 2013 წლიდან 2021 წლის ჩათვლით კი მარტო „გურიაზე“ დახარჯულია 8 მილიონ 175 ათასი ლარი და გუნდი უმაღლესი ლიგიდან მესამე ლიგამდე ჩამოქვეითდა. საკრებულოს წინა სხდომაზე ითქვა, რომ მოვიწვევდით კლუბის მმართველს, ჯაფარიძეს და გავეცნობოდით კლუბში არსებულ სიტუაციას, პრობლემებს, პერსპექტივებს, მაგრამ ეს არ მოხდა. კარგით, ეჭვი არ მეპარება, რომ საკრებულო მხარს დაუჭერს ამ თანხის გამოყოფას, მაგრამ მაინტერესებს, თუ ვინ იქნება პასუხისმგებელი, რომ ეს თანხა მიზნობრივად დაიხარჯება?“- კითხვა დასვა გოგუაძემ.
იგი დაინტერესდა იმითაც, როგორც ა(ა)იპ-ებთან მიმართებაში ხდება ბიუჯეტის დამტკიცება, ამ შემთხვევაში თუ წარმოადგინა შპს-ს ხელმძღვანელობამ ოფიციალური მიმართვა, რაში ხარჯავს აღნიშნულ თანხას. მუნიციპალიტეტის ხელმძღვანელობის განმარტებიდან კი გაირკვა, რომ ასეთი არაფერი ხდება.
„გურიასთვის“ 200 ლარის გამოყოფის საკითხზე მოსაზრება გამოთქვა „ლელოს“ ადგილობრივმა ლიდერმა გოჩა ჯანაშიამაც, რომელმაც თავიდანვე გამოხატა პოზიცია, რომ არც ის არის გულგრილი სპორტისა და ზოგადად ფეხბურთთან მიმართებაში, მაგრამ მისი თქმით, აღნიშნულ შემთხვევაში არის რამდენიმე საკითხი, რომელიც დაფიქრებას მოითხოვს.
„ჩემი პოზიციაც გეცოდინებათ, სპორტის და ზოგადად ფეხბურთის გულშემატკივარი ვიყავი ყოველთვის, მაგრამ ძნელია ისაუბრო იმაზე, რასაც გადავეჩვიეთ. მას შემდეგ, რაც ფეხბურთის განვითარების ფონდი შეიქმნა, ადგილობრივი ბიუჯეტიდან კლუბზე თანხა თითქმის არ გაცემულა და ძალიან ცუდია, ამ მავნე პრაქტიკას კვლავ რომ დავუბრუნდით იძულებით. მესმის, რომ ამ თანხის გაცემა აუცილებლობას წარმოადგენს და მე ხელს ვერ შევუშლი იმ პერსპექტივებს, რომელიც შეიძლება „გურიას“ მიმდინარე სეზონში ქონდეს. ცუდი გუნდი ნამდვილად არ არის და დიდი შანსია, მეორე ლიგაში გადავიდეს და არ მინდა თუნდაც ჩემი ერთი ხმა ხელისშემშლელი აღმოჩნდეს, მაგრამ არის რამდენიმე „მაგრამ“. როცა კლუბის მესვეურებთან შეხვედრა გვქონდა საკრებულოს წევრებს, იქ იყო საუბარი მილიონი ლარის ბიუჯეტის მქონე გუნდის შექმნაზე. იყო გარკვეული ვალდებულებები, როგორც მმართველების, ისე მუნიციპალიტეტის მხრიდან, მაგრამ მე მაშინ ვერ დავინახე ბიუჯეტიდან თანხის გამოყოფის აუცილებლობა. მესმის ეს იძულებითი ნაბიჯია, მაგრამ ისიც გასათვალისწინებელია, რომ ა(ა)იპ-ების თანამშრომლები მიზერულ ანაზღაურებაზე გვყავს, მათ ხელფასს ვერ ვუმატებთ და ამ დროს კი 200 ათას ლარს „გავიქნევთ“ ფეხბურთზე. ვიმეორებ, არაპოპულარული ნაბიჯია, მაგრამ მე მაინც მხარს ვუჭერ ამ თანხის გაცემას“, _ დასძინა ჯანაშიამ.
სხვათა შორის ლანჩხუთში ფეხბურთის განვითარებაზე საკრებულოს ბოლო სხდომაზე ბევრი ითქვა. იმავე გია გოგუაძემ ბავშვთა ფეხბურთის პერსპექტივების არარსებობაზე გაამახვილა ყურადღება და ამ სფეროში წლების განმავლობაში ფუჭად დახარჯულ თანხებზე გააკეთა აქცენტი.
„ბოლო ათი წლის განმავლობაში ბავშვთა საფეხბურთო სკოლა სამი მილიონი ლარით დავაფინანსეთ, შედეგი კი დიდი ვერაფერი. მე გამოვითხოვე ინფორმაცია ამ წლების განმავლობაში სკოლის აღზრდილი რომელიმე ბავშვი თუ იყო მიწვეული ეროვნული ჩემპიონატის რომელიმე გუნდში ან შესაბამის ასაკობრივ ნაკრებში. არაფერი ასეთი, უბრალოდ წელიწადში 300 ათას ლარს ვხარჯავთ 70-მდე თანამშრომლის ხელფასებში. ჩემი მოსაზრებით, აუცილებელია ყველა იმ თანხა, რაც ფეხბურთის სფეროს ხმარდება ერთ სივრცეში მოექცეს და როცა გამოვაცხადებთ აუქციონს „გურიას“ პატრონობაზე, მისი შეძენის მსურველს ერთიან პაკეტად შევთავაზოთ როგორც ბავშვთა ფეხბურთის, ასევე კლუბ „ჩიბათის“ და სტადიონის მოვლა-პატრონობის თემა. მითუმეტეს, რომ ცნობილია „გურიას“ მმართველების მიზანი მეორე ლიგაში გადასვლაა, იქ კი ვალდებულება გვექნება ასაკობრივი გუნდებიც გვყავდეს“, _ ამბობს გოგუაძე.
გაჟღერებული შენიშვნები სულაც არ დარჩა ხელისშემშლელი იმისთვის, რომ საკრებულოს უმრავლესობას საკითხისთვის მხარი არ დაეჭირა და „გურიასთვის“ 200 ლარი გაეცა.
ავტორი
