კახა კუკავა ოზურგეთში _ ვიდეორეპორტაჟი
"თავისუფალი საქართველოს" ლიდერი, კახა კუკავა, 19 სექტემბერს, ოზურგეთში იმყოფებოდა. მისი მოსახლეობასთან შეხვედრა, წინა შეხვედრებისგან განსხვავებით, ინოვაციურ ხასიათს ატარებდა და ძალიან წააგავდა საქართველოს პრეზიდენტის, მიხეილ სააკაშვილის შეხვედრებს ლოპოტაში, ბათუმსა და კახეთში _ კუკავამ და მისმა თანაგუნდელებმა, ლიხაურის ტერიტორიაზე, გავერანებული ჩაის პლანტაციების ფონზე ჩაატარეს საინფორმაციო ხასიათის შეხვედრა, რომლის მიზანი იყო, ხალხისთვის ეცნობებინათ, რუსეთთან ემბარგოს მოხსნის შემთხვევაში, რა პროდუქცია გავა რუსეთში.
ერთსაათიანი შეხვედრა თაკარა მზის ქვეშ მიმდინარეობდა და მთელი ამ ხნის განმავლობაში, კახა კუკავამ რამდენიმე სტატისტიკური მონაცემი მოიყვანა მაგალითად. მისი თქმით, დღესაც კი, ემბარგოს პირობებში, რუსეთი საქართველოსთვის უფრო მნიშვნელოვანი სავაჭრო პარტნიორია, ვიდრე ჩინეთი, ხოლო ემბარგომდე რუსეთს პირველი ადგილი ეკავა საქართველოს საექსპორტო პარტნიორებს შორის: _ 2005 წელს, რუსეთში გახორციელებულმა ექსპორტმა 153 724,50 მლნ ამერიკული დოლარი შეადგინა, იმავე წელს კი, ჩინეთში მხოლოდ 5 599.10 მლნ დოლარის ექსპორტი გახორციელდა. 2010 წლის მონაცემებით ორ ქვეყანაში გახორციელებული ექსპორტის მაჩვენებლებს შორის სხვაობა შემცირდა, მაგრამ რუსეთი მაინც უპირატესობით სარგებლობს. 2010 წელს რუსეთში გატანილი საქონლის საფასურმა 34 298,30 მლნ დოლარი, ხოლო ჩინეთში განხორციელებულმა ექსპორტმა 24 250,50 მლნ დოლარი შეადგინა, _ თქვა კუკავამ.
_ "თავისუფალი საქართველოს" ინიციატივით მიღწეულია შეთანხმება რუსეთთან, რომ ქართული პროდუქტები გავიდეს რუსულ ბაზარზე. ჩვენ კი, ქართველ ხალხს, საქართველოს პრეზიდენტი და მისი მინისტრები გვარწმუნებენ, რომ ეს არ სჭირდება ჩვენს გლეხს და ადგილობრივი პროდუქცია ადგილზევე კარგად საღდება. ამიტომ, ჩვენ გვაინტერესებს ეს ინფორმაცია მივიღოთ არა კორუმპირებული მინისტრებისგან, არამედ სოფლის მოსახლეობისგან.
პრაქტიკულად აქ წარმოდგენილი არის ოზურგეთის მუნიციპალიტეტის ყველა დიდი სოფლის მცხოვრები. ვიზუალურადაც კარგად დავინახეთ, როგორ "კარგად" მიმდინარეობს საქართველოში ჩაის კრეფა. სამწუხაროდ, ცუდი მდგომარეობაა ციტრუსთან და ხილთან დაკავშირებით, რეალურად ეს დარგები განადგურებულია. ჩვენ უნდა მოვახდინოთ მათი რეაბილიტაცია, ანუ პროდუქცია უნდა გაიყიდოს.
დავიწყეთ მოლაპარაკებები რუსეთის მთავარ სანიტართან იმის შესახებ, რომ აღდგეს ქართული პროდუქციის ექსპორტი რუსეთის ბაზარზე. ეს მოლაპარაკებები უკვე ამ წლის გაზაფხულიდან წარმოებს. 26 აგვისტოს მოხდა მეორე შეხვედრა და უკვე დეტალების დონეზე არის შეთანხმებული, რომ ქართული პროდუქციის ექსპორტი რუსეთში აღდგება.
სამი-ოთხი კვირის განმავლობაში, ტელევიზიით მიმდინარეობს ნამდვილი ისტერიკა, რომ ჩვენ არ გვჭირდება რუსეთის ბაზარი, რადგან ჩვენი ყურძენი, ციტრუსი და ჩაი წარმატებით იყიდება ევროპის ქვეყნებში, ჩასაბარებელი ფასი არის ძალიან ნორმალური. მიუხედავად ხელისუფლების წინააღმდეგობისა, ჩვენ მაინც მივაღწიეთ წარმატებებს _ "ბორჯომმა" უკვე დაიწყო ექსპორტი რუსეთის ბაზარზე, თვის ბოლოს დაიწყება ღვინის ექსპორტი, წლის ბოლომდე უნდა მოხდეს ციტრუსისა და ჩაის გატანა, რაც გურიის სოფლებისთვის ძალიან დიდი წინ გადადგმული ნაბიჯი იქნება, _ თქვა კახა კუკავამ.
შეხვედრაზე დამსწრე ოზურგეთელებმა ჩვენთან საუბრისას თქვეს, რომ მათთვის მნიშვნელობა არ აქვს, საქმეს ოპოზიცია გააკეთებს თუ ხელისუფლება: _ მთავარია, საქმე გაკეთდეს. არავინ გულისყურით არ ეკიდება ამ პრობლემის მოგვარებას, ციტრუსის დრო რომ მოდის, ნახევარზე მეტ პროდუქციას ხრამში ვყრით; ამერიკულმა პეპლებმა შეგვჭამეს. გურია მივიწყებული ჰყავთ, ამინდის პროგნოზშიც კი არ გვაცხადებენ, ეს არის საქმე? საერთოდ გურია პერსპექტიული რეგიონია, მაგრამ თუ ყურადღება არ მოგვაქციეს, მარტო პერსპექტივა არაფერს უშველის, _ გვითხრეს სოფლის მცხოვრებლებმა.
_ ადრე ნატანები აღორძინებული სოფელი იყო, პირველ სოფლად ითვლებოდა საქართველოში, ახლა ყველაზე ბოლო სოფელია. გზა და წყალი ჩვენ არ გვაქვს, მატლებმა და პეპლებმა შეგვჭამეს. ჩვენი ციტრუსი არავის არ უნდა; ხილს ვერ ვყიდით, ბაზარი საოცრად გაძვირდა, ხელფასი ჩვენ არ გვაქვს და პენსიას კი 60 წლამდე არავინ გვაძლევს. ყველა გაუსაძლის მდგომარეობაში ვართ, პატრონი ჩვენ არ გვყავს, ამიტომ, პოზიციაა თუ ოპოზიცია, ყველას ვთხოვთ, დაგვეხმარონ, რომ ხალხმა სული მოითქვას, _ დასძინა ერთ-ერთმა ნატანებელმა ქალბატონმა.
