(გურია ნიუსი, ლანჩხუთი) _ ჩვენი გაზეთი წერდა, რომ გარდაცვლილი გია ორაგველიძის ოჯახი ლანჩხუთის სამედიცინო ცენტრის ექიმს პაციენტის გარდაცვალებაში ადანაშაულებს. საქმე ეხება 48 წლის გია ორაგველიძის გარდაცვალებას. პაციენტი კუჭის წყლულის გასკდომის გამო, ოპერაციისთვის ლანჩხუთის საავადმყოფოში 30 ივნისს მიიყვანეს, სადაც ქირურგმა დავით გოგლიჩიძემ ოპერაცია გაუკეთა. როგორც მედიას ორაგველიძეების ოჯახში განუცხადეს, ექიმმა პაციენტს სისხლის გადასხმა ისე დაუნიშნა, რომ ჯგუფის თვისებადობაზე არანაირი ანალიზი არ ჩაუტარებია. სისხლის გადასხმის შემდეგ, პაციენტის მდგომარეობა საგრძნობლად დამძიმდა, რის შემდეგაც ის ჯერ ქუთაისში, შემდეგ კი თბილისის რესპუბლიკურ საავადმყოფოში გადაიყვანეს. ორაგველიძეს თბილისში დამატებით ექვსი ოპერაცია ჩაუტარდა, თუმცა მისი გადარჩენა ვეღარ მოხერხდა.
გარდაცვლილის ქალიშვილი, თინათინ ორაგველიძე: _ სისხლი გადაუსხეს შეუთავსებელი, რამაც მდგომარეობა დაამძიმა. კუჭის წყლული ჰქონდა, მაგრამ ამ ოპერაციით 21-ე საუკუნეში ადამიანი რომ მოკვდეს, უბრალოდ, სირცხვილია. როდესაც ლანჩხუთის საავადმყოფოში მივიყვანეთ, სრული გარანტია მოგვცეს, რომ ოპერაციის შემდეგ კარგად იქნებოდა. გადასხმის მერე სიცხეები მისცა, მთლიანად გაყვითლდა, შოკში ჩავარდა და ცახცახი დააწყებინა. ისეთი ტკივილები დაეწყო, რომ მორფით გათიშეს. გადავიყვანეთ ქუთაისში, სადაც ტყუილად გაგვაჩერეს რამდენიმე დღე, ვერაფერი გააწყვეს, ამიტომ, გადმოვიყვანეთ თბილისში. იქ შეაერთეს აპარატზე. მანამდე ექვსი ოპერაცია გაუკეთდა, მაგრამ იმდენად იყო ჩათრეული უკვე ყველა ორგანო, რომ გადარჩენა ვერ შეძლეს. მერე სხვა ექიმებთან გავარკვიეთ, რომ ეს მოჰყვა შეუთავსებელი სისხლის გადასხმას.
_ მთელი ლანჩხუთი პატივს სცემდა ჩემს მეუღლეს. გამგეობაში მუშაობდა და ძალიან აფასებდნენ. შეუთავსებელი სისხლი გადაუსხეს. მესამე დღეს ბულიონის ჭამის ნებართვა მისცეს, არადა, წყლის დალევაც კი იზღუდებოდა თურმე მაგ დროს. ჩვენ არ ვიცოდით ეს, _ ამბობს გარდაცვლილის მეუღლე იამზე ყაჭეიშვილი.
_ აქ არიან არაპროფესიონალები. ცოცხალი რომ გამოხვიდე, უნდა გაგიმართლოს. სამწუხაროდ, ჩვენ არ გაგვიმართლა. რამე რომ უთხრა, აქეთ დაგადანაშაულებენ. ამბობს, არაფერი დამიშავებიაო. მაგ გადასხმის შემდეგ სეფსისი განვითარდა, მოეწამლა ორგანიზმი. 8 დღის განმავლობაში გვაიმედებდნენ და დრო ტყუილად დაგვაკარგვინეს. ყველა გაოცებულია, კუჭზე ოპერაციით ადამიანი გარდაიცვალოს, ეგეთი ამბავი კარგა ხანია, არ გვსმენიაო. ასეთი ექიმები არ უნდა ამუშაონ, კიდევ სხვაც რომ არ გააუბედურონ, _ ეს ოჯახის ნათესავის, შორენა სივსივაძის კომენტარია.
მედიაში გავრცელებული ინფორმაციით, პაციენტის გარდაცვალების შემდეგ, ოჯახის მიერ ბრალდებულმა ქირურგმა, დავით გოგლიჩიძემ სამსახურიდან წასვლის შესახებ განცხადება დაწერა. ექიმი, რომელსაც საავადმყოფოს დირექტორი კარგ სპეციალისტს უწოდებს, გარდაცვლილის ახლობლები კი საკმაოდ მძიმე ბრალდებებს უყენებენ, ლანჩხუთის საავადმყოფოში აღარ მუშაობს. სტატიაზე მუშაობის პროცესში, ჩვენთვის ცნობილი გახდა, რომ დავით გოგლიჩიძემ პაციენტ ორაგველიძის გარდაცვალების შემდეგ განცხადება დაწერა და სამსახური დატოვა. საავადმყოფოს ხელმძღვანელობამ გოგლიჩიძესთან დაკავშირებაზეც უარი განგვიცხადა. აწ უკვე ყოფილი თანამშრომლის კოორდინატები მკაცრად გასაიდუმლოებული აღმოჩნდა.
ჩვენი ინფორმაციით, ქირურგმა მართლაც მიიღო მიხეილ ჩაჩავას სახელობის ცენტრიდან წასვლის გადაწყვეტილება, მაგრამ ამის მიზეზი ისაა, რაც სხვა პერსონალის შემთხვევაში _ ცუდი პირობები. როგორც ცნობილია, საავადმყოფოს ახალმა მფლობელმა “ადიტტმა” პერსონალს პირობები გაუუარესა.
რაც შეეხება გია ორაგველიძის საქმეს, ის ჯანდაცვის სამინისტროს, სავარაუდოდ, რამდენიმე დღეში გადაეცემა. გარდაცვლილის ოჯახი არ გამორიცხავს, რომ ლანჩხუთის საავადმყოფოს ექიმების წინააღმდეგ სარჩელი სამედიცინო რეგულირების სააგენტოში შეიტანოს, რომელსაც წლებია ლანჩხუთელი გია თვალავაძე ხელმძღვანელობს. თუ გარდაცვლილის ოჯახის პრეტენზიები დადასტურდა, თვალავაძეს თავისი ყოფილი საავადმყოფოს წინააღმდეგ მკაცრი გადაწყვეტილების მიღება მოუწევს.
