„2020 წელს „ოცნების“ მარცხის შემდეგ ივანიშვილი პოლიტიკიდან ნამდვილად წავა“_ დავით ზურაბიშვილი

მმართველი პარტიაში არსებული კრიზისის ფონზე საქართველოს პრეზიდენტი სალომე ზურაბიშვილი პოლიტიკიდან ბიძინა ივანიშვილის წასვლას აანონსებს. აღნიშნულ საკითხს „რესპუბლიკური პარტიის“ ეროვნული კომიტეტის წევრი დავით ზურაბიშვილი ეხმაურება და აცხადებს, რომ 2020 წელს, საზოგადოების გადაწყვეტილებით, ბიძინა ივანიშვილს პოლიტიკის დატოვება აუცილებლად მოუწევს. ამ და სხვა პოლიტიკურ საკითხებთან დაკავშირებით დავით ზურაბიშვილი „გურია ნიუსს“ ესაუბრა.

_ ბატონო დავით, საქართველოს პრეზიდენტი სალომე ზურაბიშვილი  გერმანული გამოცემა „შპიგელისთვის“ მიცემულ ინტერვიუში „ქართულ ოცნებას“ სუსტ გუნდს უწოდებს და პარალელურად დასძენს, რომ პარტიის ხელმძღვანელი ბიძინა ივანიშვილი პოლიტიკას საპარლამენტო არჩევნების შემდეგ დატოვებს. თქვენი შეფასებით, ივანიშვილს 2020 წელს პოლიტიკიდან დისტანცირება რატომ შეიძლება სურდეს?

_ ბიძინა ივანიშვილი პოლიტიკიდან ნამდვილად წავა და აღნიშნული იმიტომ მოხდება, რომ 2020 წელს „ქართული ოცნება“ საპარლამენტო არჩევნებში დამარცხდება. „ქართული ოცნება“ ბიძინა ივანიშვილის გარეშე, უბრალოდ, ვერ არსებობს, შესაბამისად, სანამ მმართველი პარტია ქვეყანას მართავს, ივანიშვილს გავლენები პოლიტიკაში არაფორმალურად თუ ფორმალურად  ყოველთვის შეუნარჩუნდება. ძალოვანი სტრუქტურები, უშიშროება, სუს-ი, პროკურატურა სხვა უწყებები ივანიშვილს ექვემდებარება და ასე იქნება იმ შემთხვევაშიც, თუკი ივანიშვილი პარტიულ თანამდებობას დატოვებს და კულუარულ მმართველობაში გადაინაცვლებს.

_ ექსპრეზიდენტმა მიხეილ სააკაშვილმა, რომელმაც საქართველოში ჩამოსვლა კიდევ ერთხელ დაანონსა, „კვირის აქცენტებში“ განაცხადა, ციტირება: „თუ მექნება საშუალება ჩემს ბიბლიოთეკამდე მივაღწიო, სიტყვაზე, სადაც სამი დღე ვიქნები, გარწმუნებთ, ხალხი ივანიშვილს მშვიდობიანად დაემშვიდობება“. როგორ ფიქრობთ, ყოფილ პრეზიდენტს ქართულ საზოგადოებაში ისეთი გავლენა შერჩა, რომ ხალხი მისი ხელმძღვანელობით “ოცნებას“ სახლში გაუშვებს და ხელისუფლებაში კვლავ „ნაციონალურ მოძრაობას“ დააბრუნებს?

_ მიხეილ სააკაშვილის სიტყვები, სულ მცირე, არასერიოზულია. ის რევოლუციის გზით ხელისუფლების დამხობას ვერ შეძლებს. საქართველო არ არის ისეთი ქვეყანა, რომელიც  შეიძლება ორ დღეში ააყირავო და რევოლუციის გზით ხელისუფლება შეცვალო. მიხეილ სააკაშვილი საზოგადოების ძალიან მნიშვნელოვანი ნაწილისთვის საფრთხობელას როლს ჯერ კიდევ თამაშობს. მის მიერ გაკეთებული განცხადებები ხელს უშლის იმას, რომ ხელისუფლების ცვლილება მოხდეს. ქვეყანაში რევოლუცია შიშს აჩენს. მიხეილ სააკაშვილი აღნიშნულზე აპელირებით კი მუდმივად აძლიერებს შიშს მოსახლეობის იმ ნაწილში, რომელთაც სააკაშვილის მმართველობა მწარედ ახსოვთ.

_ სახალხო დამცველის, ნინო ლომჯარიას  ყოველწლიურ ანგარიშში ისეთი გამოუძიებელი საქმეები მოხვდა, როგორებიცაა: საქართველოს პირველი პრეზიდენტის, ზვიად გამსახურდიას, აფგან მუხთარლის, თემირლან მაჩალიკაშვილის, ხორავას ქუჩაზე მომხდარი მკვლელობისა და სხვათა საქმეები. აგრეთვე, ამ მწვავე ანგარიშში პოლიტიკური ნიშნით დევნის შემთხვევებზე და წინასწარი დაკავების იზოლატორში არაადამიანური მოპყრობის მაჩვენებლის ზრდაზეა საუბარი. თქვენი აზრით, რაზე მეტყველებს ისეთ სენსიტიურ საკითხებზე ხელისუფლებისა და საგამოძიებო ორგანოების გულგრილობა, როგორიც აღნიშნული საქმეებია?

_ ამ ხელისუფლების გამტყუნება გამსახურდიას  გარდაცვალების გარემოებების გამოძიებაში მიჭირს. „ქართული ოცნების“ წარმომადგენლებს უფრო იმაში დავადანაშაულებდი, რომ აღნიშნული თემით პოპულისტობენ.  ბიძინა ივანიშვილს უცებ გაახსენდა, რომ პირველი პრეზიდენტის საქმე გამოუძიებელია და ბუნებრივია, პარტიის ლიდერი აღნიშნულზე აპელირებით სამეგრელოს მოსახლეობის გულის მოგებას ცდილობს. დანარჩენი საქმეები, რა  თქმა უნდა, ამ ხელისუფლების შავი ლაქაა. „ქართულ ოცნებაში“ საქმეების გამოძიების პოლიტიკური ნება არ არსებობს.

_ უკრაინის საპრეზიდენტო არჩევნებში ლიდერობს ვლადიმერ ზელენსკი, რომელიც საქართველოს ყოფილი პრეზიდენტის, მიხეილ სააკაშვილის მიმართ დადებითად არის განწყობილი და დიდია ალბათობა იმისა, რომ ზელენსკის გაპრეზიდენტებამ უკრაინაში სააკაშვილის მაღალ თანამდებობაზე დანიშვნა გამოიწვიოს. აღნიშნული საქართველოსა და უკრაინას შორის ურთიერთობებზე რა სახის გავლენას მოახდენს?

_ საქართველო და უკრაინა სტრატეგიული პარტნიორები არიან და იმ შემთხვევაში, თუ მიხეილ სააკაშვილი მაღალ თანამდებობას დაიკავებს, ბუნებრივია, აღნიშნული, რბილად რომ ვთქვათ, ქვეყნებს შორის ურთიერთობებს გააფუჭებს. ისე, როგორც იყო გაფუჭებული პოროშენკოს დროს, მაშინ, როცა სააკაშვილი ოდესის გუბერნატორის პოსტს იკავებდა. გარდა ამისა,  იმ შემთხვევაში, თუ მიხეილ სააკაშვილი უკრაინაში დასაქმდა, ყოფილი პრეზიდენტი ქართული პოლიტიკით ნაკლებად დაკავდება, რაც მისი, როგორც საფრთხობელას იმიჯს საზოგადოებაში შეამცირებს. აღნიშნული კი „ქართულ ოცნებას“ კიდევ უფრო დიდ პრობლემას გაუჩენს.