ცოტა ხნის წინ, სოციალურ ქსელში პოლიციელების ჩხუბის ვიდეო კადრები გავრცელდა. საზოგადოებრივი წესრიგის დამცველები, ქუჩაში ერთმანეთს სცემდნენ და სიტყვიერ შეურაცხყოფას აყენებდნენ. უფრო მეტიც, პოლიციელების გინება შინაგან საქმეთა მინისტრსაც მოუწია:
_ ყ……-ზე მკიდია ჭიკაიძე! _ გარკვევით ისმის კადრებში. მართალია, ეს პოლიციელები მეორე დღესვე გაათავისუფლეს სამსახურიდან, თუმცა, როგორც ჩანს, საზოგადოებრივი თავშეყრის ადგილებში გინება ე. წ. “საზოგადოებრივი წესრიგის დამცველებისთვის“ გადამდებია.
გასულ კვირას, როცა ჩოხატაურში, აღმაშენებლის ქუჩაზე, თხევადი ქლორის გაჟონვის გამო ყველა უწყება ფეხზე იდგა, პოლიციელები წინ და უკან სიარულით დაიღალნენ. ამ დროს, მინისტრი ჭიკაიძე პირდაპირ ეთერში ამბობდა, რომ მის უწყებას ყველაფერი კონტროლზე ჰყავდა აყვანილი, თუმცა, ეს "კონტროლი" პოლიციამ, რომელმაც აღნიშნულის შესახებ ორი დღით ადრე იცოდა (ამის დამადასტურებელი მასალები "გურია ნიუსის" რედაქციაში ინახება) და არაფერი თქვა, მხოლოდ მას შემდეგ დაამყარა, რაც საგანგებო სიტუაციების მართვის სამსახურმა მიუთითა.
ამ მითითებას საევაკუაციო ზოლის გავლება მოჰყვა. თუმცა, ზოლს იქით, ორი ავტომობილი დარჩათ. შენიშვნაზე, რომ ევაკუაცია შემთხვევის ადგილიდან ყველას გაყვანას გულისხმობდა, მათ შორის ავტომობილების გატანასაც, ერთ-ერთი პოლიციელის სიცილი მოჰყვა. არადა, პანიკაში ჩავარდნილი მოქალაქეების ფონზე, სასაცილო არაფერი იყო!
ამ პოლიციელის მხიარული განწყობა კოლეგებსაც გადაედოთ და ნახევარი საათის განმავლობაში იქვე, "ბირჟაზე" მჯდარნი ანეკდოტებსაც კი ყვებოდნენ.
მოგვიანებით, ერთ-ერთმა პოლიციელმა მიმდებარე ტერიტორიაზე გინებ-გინებით ჩაიარა. ჩვენს კითხვაზე ვის და რატომ აგინებდა, პასუხი არ გაგვცა, თუმცა თანამშრომლის დაცვა პოლიციის უფროსის მოადგილემ სცადა:
_ ისე იგინება, ზოგადად. არავის აგინებს!!!
ასე "ზოგადად გინებისთვის" პოლიციელი არ ისჯება; არადა, ერთი წლის წინ, პოლიციის წინ გინება ახალგაზრდებს ერთდღიან პატიმრობად და 500-500-ლარიან ჯარიმად დაუჯდათ.
ასე "ზოგადისთვის", რომელიც ხშირად ძალიან კონკრეტულია, პოლიციელს პასუხი არ მოეთხოვება: გურიაში ხშირად შეხვდებით "ბირჟაზე" ჩამომჯდარ ფორმიან პოლიციელებს, ხშირად დაინახავთ როგორ მოძრაობენ ღვედის გარეშე, როგორ საუბრობენ ტელეფონზე ავტომობილის მართვის დროს. ეს მაშინ, როცა ჩვეულებრივ მოქალაქეს ამის გამო აჯარიმებენ.
ის, რომ პოლიციელი ავტომობილს არასწორად აჩერებს, ეს არავის უკვირს. ასეთი ფაქტი “გურია ნიუსს“ არაერთხელ დაუფიქსირებია. შეიძლება ზოგმა თქვას, რომ ოპერატიული ავტომობილია და საჭიროების გამო გააჩერაო, მაგრამ ეს ფოტო, რომელიც ამ მასალას ახლავს და რომელიც ჩოხატაურშია გადაღებული, საპირისპიროს ამტკიცებს.
პოლიცია ის უწყებაა, რომლის რეფორმა ერთ-ერთ ყველაზე წარმატებულად ითვლებოდა გასულ წლებში. ახალი ხელისუფლების მოსვლის შემდეგ კი, აქცენტი უწყების დეპოლიტიზირებაზე გაკეთდა! სამართლიანობა მოითხოვს, რომ ეს წარმატება შსს-ს არ დავუკარგოთ, მაგრამ ასევე სამართლიანობისთვის უნდა ითქვას, რომ ყველაზე ხშირად, კითხვები სწორედ ამ უწყების მიმართ ისმის და ეს კითხვები სწორედ პოლიციელთა ქცევიდან იწყება. არადა, მათ ეთიკის კოდექსიც კი აქვთ მიღებული!!!
ამ კოდექსში კი გარკვევით წერია, რომ პოლიციელი, მისი თანამდებობის ან წოდების მიუხედავად, ვალდებულია, საზოგადოების წევრებთან ურთიერთობაში იყოს ტაქტიანი, თავაზიანი და კეთილგანწყობილი; მოქალაქისადმი წაყენებული მოთხოვნები თუ შენიშვნები გამოთქვას მშვიდი, ზრდილობიანი და დამაჯერებელი ფორმით; პოლიციელმა უნდა მისცეს მოქალაქეს საშუალება გამოთქვას საკუთარი მოსაზრება; პოლიციელისგან დაუშვებელია ქედმაღლური მიმართვა, მუქარა, ირონია, ჟარგონის გამოყენება და ფამილარული ტონით საუბარი; ყველა სიტუაციაში და ნებისმიერ ადამიანთან ურთიერთობისას, როგორც სამუშაო, ასევე არასამუშაო დროს, აუცილებელია ქცევის ეთიკური ნორმების დაცვა; პოლიციელი უნდა იყოს კორექტული და საზოგადოების წევრების მიმართ არ უნდა გამოიჩინოს უხეშობა, ძალადობა, თავი უნდა შეიკავოს შეურაცხმყოფელი ქცევებისაგან და პროვოკაციის მიუხედავად შეინარჩუნოს ობიექტური დამოკიდებულება.
სამსახურებრივი მოვალეობების შესრულებისას, მოქალაქესთან ურთიერთობის დროს პოლიციელს ეკრძალება: სიგარეტის მოწევა, საღეჭი რეზინის ღეჭვა, მობილურზე საუბარი, მანქანიდან საუბარი, მზის სათვალეების ტარება და მოუწესრიგებელ მდგომარეობაში ყოფნა.
და ამ ყველაფერს, ოფიციალური ინფორმაციის თანახმად, სამინისტროში 50-კაციანი ჯგუფი აკონტროლებს, რომელიც თავის დროზე, ირაკლი ღარიბაშვილის ინიციატივით შეიქმნა.
"გურია ნიუსის“ კითხვაზე _ პოლიციის ეთიკის კოდექსის მიღებიდან დღემდე, რამდენმა პოლიციელმა დაარღვია კოდექსი და რა სანქციები გატარდა მათ წინააღმდეგ, 25 მარტს შინაგან საქმეთა სამინისტრომ ასეთი პასუხი გაგვცა:
_ თქვენი წერილის პასუხად გაცნობებთ, რომ 2013წლის 1 იანვრიდან 31 დეკემბრის ჩათვლით დისციპლინური სახდელი დაეკისრა შინაგან საქმეთა სამინისტროს 1996 თანამშრომელს.
კონკრეტული სტატისტიკა კი შსს-დან იმ მიზეზით ვერ მივიღეთ, რომ ერთიანი სისტემატიზირებული ბაზა არ აქვთ:
_ რაც შეეხება ინფორმაციას შინაგან საქმეთა მინისტრის 2013 წლის 31 დეკემბრის #999 ბრძანებით დამტკიცებული "საქართველოს პოლიციის ეთიკის კოდექსის" ნორმების დარღვევებისა და დაკისრებული დისციპლინური პასუხისმგებლობის შესახებ, მოკლებული ვართ აღნიშნული სტატისტიკური მონაცემების მოწოდების შესაძლებლობას ერთიანი სისტემატიზირებული ბაზის არარსებობის გამო, _ მოგვწერა შსს-ს ადმინისტრაციის უფროსმა ზურაბ ზუბადალაშვილმა.
ამავე თემაზე:რატომ დაეკისრა 1996 პოლიციელს დისციპლინური სახდელი;
