ახალი თავმჯდომარე, პირველი შეფასებები და ხმაურიანი სხდომა

ლანჩხუთის მუნიციპალიტეტის ახალარჩეული საკრებულოს პირველ სხდომა, რომელსაც ყველა დეპუტატი დაესწრო, 61-ე საოლქო საარჩევნო კომისიის თავმჯდომარემ ზვიად ნაკაიძემ გახსნა და დეპუტატებს წარმატებები უსურვა.ლანჩხუთის მუნიციპალიტეტის საკრებულოს წევრებად პროპორციული საარჩევნო სისტემით არჩეული არიან: "ქართული ოცნება" _ ელენე ნაჭყებია, ელგუჯა ჩხაიძე, გიორგი ხელაძე, რომან ბიწაძე, ია ჩხაიძე, გელა კილაძე, ამირან ქანთარია, გიორგი ჩახვაძე, კახაბერ გუჯაბიძე; "დავით თარხან-მოურავი-საქართველოს პატრიოტთა ალიანსი" _ ომარ გოგიჩაიშვილი, დარეჯან ბურჭულაძე, ადამ ხუხუნაიშვილი; "ერთიანი ნაციონალური მოძრაობა" _ კახაბერ ასკურავა, გიორგი გოგუაძე. "ნინო ბურჯანაძე _ ერთიანი ოპოზიცია" _ ნონა მურვანიძე.

მაჟორიტარული საარჩევნო სისტემით საკრებულოში მოხვდნენ: ევგენი ჩიჩუა (ქალაქი, საინიციატივო ჯგუფი), გიორგი მორჩილაძე (აკეთი, "არასაპარლამენტო ოპოზიცია _ კახა კუკავა, ფიქრია ჩიხრაძე"), ემზარ თევდორაძე (აცანა, საინიციატივო ჯგუფი), ნიკოლოზ იმნაძე (გვიმბალაური, საინიციატივო ჯგუფი), ელისო ჭიჭინაძე (ლესა, "ქართული ოცნება"), კახა ურუშაძე (მამათი, "ქართული ოცნება"), გურამ კერესელიძე (მაჩხვარეთი, "ქართული ოცნება"), ბესიკ ტაბიძე (ნიგვზიანი, "ქართული ოცნება"), თეიმურაზ ალექსაია (ნიგოითი, "ქართული ოცნება"), დავით ჩხარტიშვილი (ნინოშვილი, "ქართული ოცნება"), ჯუმბერ ბლაგიძე (სუფსა, საინიციატივო ჯგუფი), თეიმურაზ მარშანიშვილი (ღრმაღელე, "ქართული ოცნება"), აკაკი იმნაიშვილი (შუხუთი, "ქართული ოცნება"), იოსებ სარჯველაძე (ჩიბათი, "ქართული ოცნება"), ალექსანდრე სარიშვილი (ჩოჩხათი, "ქართული ოცნება"), ალექსანდრე მახათაძე (ჯურუყვეთი, "ქართული ოცნება").

ზვიად ნაკაიძის შემდეგ სხდომა ასაკით ყველაზე უფროსმა დეპუტატმა ომარ გოგიჩაიშვილმა ("პატრიოტთა ალიანსი") გააგრძელა:

_ ნამდვილად ისტორიული დღეა.  ლანჩხუთს პირველად ეყოლება მრავალპარტიული საკრებულო. ჩვენ უნდა ვემსახუროთ ხალხს, ლანჩხუთს და ლანჩხუთელებს, _ თქვა ომარ გოგიჩაიშვილმა.

საკრებულოს სხდომაზე რვა საკითხი იყო წარმოდგენილი. სხდომის მდივნად ჯერ ელისო ჭიჭინაძის კანდიდატურა დაამტკიცეს, შემდეგ კი დეპუტატებმა ხმის დამთვლელი დროებითი კომისიის სამი წევრი აირჩიეს, სამანდატო დროებითი კომისია რომან ბიწაძეს ჩააბარეს.

სწორედ მეოთხე საკითხის განხილვის დაწყებამდე, როდესაც ჯერ კიდევ არ იყო ლანჩხუთის მუნიციპალიტეტის საკრებულოს წევრების უფლებამოსილება ცნობილი, "ერთიანი ნაციონალური მოძრაობის" დეპუტატმა, გიორგი გოგუაძემ ომარ გოგიჩაიშვილს მიმართა:

_ ბატონო ომარ, კარგი იქნებოდა,  თითოეული საკითხისთვის ცალკე გვეყარა კენჭი. ჩვენ ვაპროტესტებთ მეექვსე საკითხს _ "ლანჩხუთის მუნიციპალიტეტის საკრებულოს თავმჯდომარის მოადგილის არჩევის შესახებ", ლანჩხუთის მუნიციპალიტეტის საკრებულოს განკარგულების დამტკიცების თაობაზე.  თვითმმართველობის ახალ კანონში მითითებულია, მოადგილის ან მოადგილეების არჩევა. მაინტერესებს, ეს ფორმულირება ვისია? თუ ჩვენ საკრებულოს მუშაობას "ზემოდან" დირექტივებით დავიწყებთ, ხალხის უიმედობას დავიმსახურებთ, ამას საკუთარი გამოცდილებიდან გეუბნებით. ჩვენ ხალხის არჩეული ვართ.

გიორგი გოგუაძის ამ განცხადებას "ქართული ოცნების" დეპუტატმა, რომან ბიწაძემ უპასუხა:

_ ამაზე მაშინ უნდა გეფიქრათ, როდესაც დღის წესრიგი მტკიცდებოდა. რაც შეეხება მეექვსე საკითხს _ აქ არ არის კანონდარღვევა და ჩემი მოსაზრებაა, რომ ეს საკითხი ასე უნდა დარჩეს.

სხდომაზე დეპუტატმა ია ჩხაიძემ საკუთარი აზრი დააფიქსირა: _ ჩვენ არ გვაქვს იმის ფუფუნება, რომ ორი მოადგილე ჰყავდეს საკრებულოს თავმჯდომარეს. რაც მთავარია, კანონს არ ვარღვევთ. მე ერთი მოადგილის მომხრე ვარ.

დეპუტატებმა გადაწყვიტეს, რომ  კენჭი ეყარათ მეექვსე საკითხში ცვლილებების შეტანისათვის. "ქართული ოცნების" დეპუტატებისგან შვიდმა დეპუტატმა დაუჭირა მხარი, რომ ცვლილება არ მომხდარიყო. "ქართულმა ოცნებამ" ეს ყველაფერი დარბაზის აკუსტიკას დააბრალა და დეპუტატებთან კონსულტაცია მოითხოვა. კონსულტაციის შემდეგ კი მეექვსე საკითხში ცვლილების შეტანას ოცმა დეპუტატმა აღარ დაუჭირა მხარი, რამაც "ერთიანი ნაციონალური მოძრაობის" წევრების პროტესტი გამოიწვია:

_ მხოლოდ 7 დეპუტატს უნდოდა, ეს საკითხი დარჩენილიყო ისე, როგორც დღის წესრიგში ეწერა. რადგან ვერ მიიღეს ხმათა უმრავლესობა, გამოაცხადეს შესვენება და მოხდა მოლაპარაკება. ეს არის სამარცხვინო ფაქტი _ პირველსავე სხდომაზე გადაწყვეტილების მიღება ხელის გადაგრეხით, _ თქვა კახა ასკურავამ.

ასკურავას განცხადებას საკმაოდ მწვავედ გამოეხმაურა რომან ბიწაძე, რომელმაც კახა ასკურავას სიმშვიდისკენ მოუწოდა: "ნუ დამალაპარაკებთ, გეუბნებით… დაჯექი მაქანე!!!"

ექსპერტი თვითმმართველობის საკითხებში, მამუკა აბულაძე "გურია ნიუსთან" საუბრის დროს ამბობს, რომ საკრებულოს თავმჯდომარის მოადგილეების რაოდენობა ადგილობრივი თვითმმართველობის კოდექსით მკაცრად განსაზღვრული არ არის: _ ამდენად, ეს საკითხი რეგულირდება თავად საკრებულოს რეგლამენტით, რომლითაც თავმჯდომარის ერთი მოადგილის თანამდებობა არის გათვალისწინებული და მასში ცვლილებების გახორციელებამდე რამდენიმე მოადგილის არჩევა არ შეიძლება. ლანჩხუთის საკრებულოს გადაწყვეტილება, მიჰყოლოდნენ დღის წესრიგს, მართლზომიერია, ხოლო დეპუტატის მოთხოვნა, შეეცვალა ერთ-ერთი საკითხის ფორმულირება სხდომის მიმდინარეობის იმ პერიოდში, როდესაც საკრებულოს უფლებამოსილება ჯერ არ იყო ცნობილი, სცილდება პროცედურული საკითხის ფარგლებს და საკრებულოს რეგლამენტში ცვლილებების გახორციელების საკითხის არსებით განხილვაში გადადის. ეს საკითხი, ანუ მოადგილის დანიშვნის შესახებ, შეიძლებოდა, განხილულიყო მეექვსე საკითხის დაწყებისას, _ ამბობს აბულაძე.

რამდენიმეწუთიანი დაძაბულობის შემდეგ, საკრებულოს სხდომაზე დეპუტატებმა საკრებულოს თავმჯდომარედ გოგი ხელაძე აირჩიეს, რომლის კონკურენტი დამოუკიდებელი დეპუტატი ემზარ თევდორაძე იყო, გოგი ხელაძის მოადგილე კი გელა კილაძე გახდა.

სხდომის დასასრულს სიტყვით გამოვიდა "ნაცმოძრაობის" დეპუტატი გიორგი გოგუაძე:

_ სავსებით ლეგიტიმური იქნებოდა, მეექვსე საკითხი დეპუტატთა უფლებამოსილების ცნობისა და თავმჯდომარის არჩევის შემდეგ გაგვეხილა. ჩვენ ხალხის არჩეულები ვართ და ძალიან გთხოვთ ყველას, პარტიული ინტერესები გადავდოთ და საქმე ვაკეთოთ. ჩემი თხოვნა იქნება, კოლეგიალობა არ დავკარგოთ სხდომის მსვლელობის პერიოდში. ყველას აქვს სხდომაზე დასწრებისა და საკუთარი აზრის დაფიქსირების უფლება, მაგრამ არა ყვირილით და ერთმანეთის შეურაცხყოფით.

ამის შემდეგ, საკრებულოს სხდომაზე, საჯარო მოხელემ ირინა დოროხოვამ ახალარჩეულ თავმჯდომარეს, გოგი ხელაძეს მიმართა:

"ბატონო თავმჯდომარე, მე დიდი ხანია, ვარ საჯარო მოხელე. პირველ რიგში, გილოცავთ დღევანდელ დღეს და ვიმედოვნებ, რომ ამ დღიდან მართლა დაიწყება ლანჩხუთში კანონიერების და სამართლიანობის აღდგენა. მე ვარ პიროვნება, რომელმაც საკუთარ თავზე, საკუთარ მხრებზე გადავიტანე წინა ხელისუფლების ყველა უსამართლობა. თავს არ შეგაწყენთ, არ მინდა, პიროვნული შეურაცხყოფა, მაგრამ მიკვირს იმ ადამიანების, რომლებიც დღეს კანონიერებაზე ლაპარაკობენ და რომლებმაც ყველაფერი გააკეთეს, რათა სიტყვა _ "კანონი" ამოღებულიყო ხმარებიდან.

ვიყავი ლანჩხუთის საოლქო საარჩევნო კომისიის მდივანი 2006 წლიდან 2008 წლამდე. ბატონი გიორგი გოგუაძე იმ დროს იყო გამგებლის მოვალეობის შემსრულებელი და ახლა არის ახალმოწვეული საკრებულოს დეპუტატი. სწორედ, გიორგი გოგუაძემ დამიძახა მის კაბინეტში და მითხრა, დამეწერა განცხადება და მდივნობაზე უარი მეთქვა.

ბატონო თავმჯდომარევ, დღეს თქვენ უნდა დაიწყოთ სამართლიანობის აღდგენა, მოგწონთ ეს თუ არა _ მე თქვენი ამომრჩეველი ვარ და ვითხოვ ამას! ეს განცხადება არ გავაკეთე საარჩევნო პერიოდში, რათა ხელი არ შემეშალა პროცესებისთვის. ახლა ვაცხადებ, ყველაფერს გავაკეთებ იმისთვის, ყველამ გაიგოს, თუ რა მოხდა 2008 წელს და რატომ გამათავისუფლეს. თუ არ დაიცავთ ჩემს უფლებებს, გამოდის, თქვენ მაშინ არავის უფლებებს არ დაიცავთ. თქვენ არ იცით, რა ზეწოლა და მუქარები იყო ჩემს მიმართ და ამის შესახებაც აუცილებლად ვიტყვი პრესის წარმომადგენლებთან," _ თქვა ირინა დოროხოვამ.

გიორგი გოგუაძემ, ირინა დოროხოვას განცხადების შესახებ "გურია ნიუსთან" ასეთი კომენტარი გააკეთა: "მსგავსი რამ არ ყოფილა. მას შეუძლია, შესაბამის სტრუქტურებს მიმართოს".

სხდომის დასრულების შემდეგ, დეპუტატმა კახა ასკურავამ მედიის წარმომადგენლებთან პირველი სხდომა მოკლედ შეაფასა:

_ საკრებულოს სხდომა იყო სრული დომხალი და ფინალი ჰქონდა საკმაოდ საოცარი. არ შეიძლება საკრებულოს სხდომაზე მსგავს რაღაცებზე ლაპარაკი. საკრებულო არის რაიონის დონეზე უმაღლესი პოლიტიკური ორგანო და ყველამ პიროვნული პატივი უნდა ვცეთ ერთმანეთს. პირველ რიგში, ვალდებულები ვართ იმ ამომრჩევლების წინაშე, რომლებმაც ხმა მოგვცეს. ეს არის პოლიტიკური განცხადებების ადგილი, მაგრამ ამას აქვს შესაბამისი დრო და მომენტი.  საკრებულოს პირველივე სხდომა დარღვევით წარიმართა და იმედი მაქვს, საკრებულოს თავმჯდომარე მოახერხებს, რომ სხვა დროს ასეთ დარღვევებს ადგილი არ ჰქონდეს. წინააღმდეგ შემთხვევაში, ჩვენ ყოველთვის ხმამაღლა დავაფიქსირებთ ამას და არ შევეგუებით მსგავს სიტუაციას, _ თქვა კახა ასკურავამ.