ორშაბათს, ჩოხატაურის მუნიციპალიტეტის ახალი მოწვევის საკრებულოს პირველი სხდომა გაიმართა. ჩოხატაურის საოლქო საარჩევნო კომისიის თავმჯდომარემ თემურ კუტუბიძემ დეპუტატებს და დამსწრე საზოგადოებას არჩევნების შედეგები გააცნო. ჩოხატაურის საკრებულო 38 დეპუტატითაა წარმოდგენილი _ აქედან 2 მანდატი "ნაციონალურ" მოძრაობას" ეკუთვნის, ერთი "ბურჯანაძე _ გაერთიანებულ ოპოზიციას", ორი "პატრიოტთა ალიანსს", საკრებულოს 5 დეპუტატი საინიციატივო ჯგუფების მიერ წარდგენილნი არიან, დანარჩენი წევრები კი "ქართულ ოცნებას" წარმოადგენენ.
საკრებულოს წევრთა უფლებამოსილების ცნობის შემდეგ, დეპუტატებმა საკრებულოს თავმჯდომარე აირჩიეს _ 37 ხმით (ერთი ბიულეტენი ბათილად იქნა ცნობილი), უალტერნატივო კანდიდატი _ ზაალ მამალაძე ჩოხატაურის მუნიციპალიტეტის საკრებულოს თავმჯდომარე გახდა:
_ მე ვიქნებით თითოეული თქვენთაგანის ინტერესის დამცველი, ყველა ჩოხატაურელის ოჯახის წევრი და გულშემატკივარი. ეს ნდობა უფრო მეტ პასუხისმგებლობას მაკისრებს. ერთად მუშაობით ჩვენ ბევრ რამეს გავაკეთებთ ჩოხატაურისთვის, _ თქვა მამალაძემ და დეპუტატებს მოადგილის კანდიდატურა წარუდგინა:
_ ეს კანდიდატურა უნდა დავასახელო, რადგან ასეთია კოალიციის პოლიტსაბჭოს გადაწყვეტილება. კვოტების გადანაწილების შედეგად, მიწევს დავასახელო ჩემი მოადგილის კანდიდატურა _ შალვა ჩანტლაძე "მრეწველებიდან", _ განაცხადა მამალაძემ (ჩანტლაძე წინა მოწვევის საკრებულოში "ნაციონალური მოძრაობის" სიით მიხვდა და ის საფინანსო-საბიუჯეტო კომისიას ხელმძღვანელობდა. ავტ.).
ამ ინფორმაციას და ამგვარ წარდგენას დარბაზში სამარისებული სიჩუმე მოჰყვა _ დირექტივას "ზემოდან" დეპუტატები ასე შეხვდნენ..
დეპუტატები არჩევნის გასაკეთებლად ისე გავიდნენ, რომ ჩანტლაძეს მათთვის არც კი მიუმართავს. შეცვლიდა თუ არა რაიმეს მიმართვა, ვერ გეტყვით, რადგან ყველასთვის ცნობილი იყო, რომ ჩანტლაძეს, მიუხედავად იმისა, რომ ის კოალიციაში შემავალი პარტიის "მრეწველების" რაიონული ორგანიზაციის" თავმჯდომარეა, არჩევნებზე "ოცნების" და მისი კანდიდატის სასარგებლოდ არ უმუშავია.
საბოლოო განაჩენი დეპუტატებმა ნახევარ საათში გამოიტანეს _ 6 მომხრე და 32 წინააღმდეგი _ შალვა ჩანტლაძე ჩოხატაურის საკრებულოს თავმჯდომარის მოადგილე ვერ გახდა.
_ ჩვენ ხალხმა აგვირჩია და ხალხს უნდა ვემსახუროთ. არ ვართ ვალდებულები პოლიტსაბჭოს გადაწყვეტილებები გავითვალისწინოთ. როგორც გვითხრეს, ეს რეკომენდაციაა, თუმცა, ჩვენ აქ ვცხოვრობთ, ამ რეალობაში და იმ რეკომენდაციებს, რომლებიც ხალხის ინტერესებს არ ემსახურება, ვერ გავითვალისწინებთ. ხალხმა ხმა "ქართულ ოცნებას" მისცა და არა "ნაციონალურ მოძრაობას" ან ვინმეს ინტერესებს ჩოხატაურში. ჩვენც შესაბამისი არჩევანი გავაკეთეთ, _ აღნიშნეს დეპუტატებმა "გურია ნიუსთან" საუბრისას.
ამის შემდეგ უმრავლესობა სათათბირო ოთახში ახალი კანდიდატურის შესარჩევად გავიდა. თათბირი მედიისთვის დახურული იყო, თუმცა, როგორც გავიგეთ, დეპუტატებმა შიდაპრაიმერი "თავისუფალი დემოკრატების" ორ წევრს _ მანანა მინდაძეს და ვლადიმერ სიხარულიძის შორს ჩაატარეს და ხმათა უმრავლესობით საკრებულოს სრულ შემადგენლობას მოადგილის პოსტზე კანდიდატად ვლადიმერ სიხარულიძე წარუდგინეს.
32 მომხრე, 5 მოწინააღმდეგე და ერთი ბათილი ხმა _ ასეთი შედეგებით გახდა სიხარულიძე საკრებულოს თავმჯდომარის მადგილე (შიდაპრაიმერი ისეთივე სიახლეა ჩოხატაურის პოლიტიკური ცხოვრებისთვის, როგორც დირექტივების უსიტყვოდ დამორჩილების "ტრადიციის" დარღვევა. რედ.).
მოადგილის არჩევის შემდეგ ფრაქციები შეიქმნა და მათი თავმჯდომარეების ვინაობაც გახდა ცნობილი: "ქარული ოცნება _ დემოკრატიული საქართველოს" ფრაქციის თავმჯდომარე ზვიად მამალაძე გახდა; "ქართული ოცნება _ ეროვნულ ფორუმის" _ ქეთევან სიხარულიძე; "ქართული ოცნება _ რესპუბლიკელების" _ გოჩა ჯიქია; "ქართული ოცნება _ თავისუფალი დემოკრატების" კი ერეკლე უღრელიძე.
ხმაურის გარეშე არ ჩაუვლია მუდმივმოქმედი კომისიის თავმჯდომარეების არჩევას.
ახალი მოწვევის საკრებულოს პირველ სხდომაზე "რესპუბლიკურ პარტიას" კანდიდატურა ჩაუვარდა. ფრაქცია "ქართული ოცნება _ რესპუბლიკელების" მიერ დასახელებული კანდიდატი, ირაკლი ახობაძე, ქონების მართვის კომისიის თავმჯდომარის პოსტზე დეპუტატებმა არ აირჩიეს.
აღნიშნული თანამდებობა საინიციატივო ჯგუფის მიერ წარდგენილმა კანდიდატმა, მალხაზ ჩხიკვაძემ დაიკავა.
აღსანიშნავია, რომ ჩხიკვაძე "რესპუბლიკური პარტიის" წევრია, თუმცა, საკრებულოში შექმნილმა "რესპუბლიკელების" ფრაქციამ მას ნდობა არ გამოუცხადა.
უნდა ითქვას ისიც, რომ ქონების მართვის კომისიის თავმჯდომარის ასარჩევად მეორე ტურის ჩატარება გახდა საჭირო. პირველ ტურში ახობაძემ და ჩხიკვაძემ თანაბარი _ 19-19 ხმა მიიღეს. განმეორებითი კენჭისყრა, რომელიც 20 წუთის შემდეგ ჩატარდა, ასეთი შედეგით დასრულდა: ჩხიკვაძე _ 24 ხმა, ახობაძე _ 14.
_ ცოტა უცნაურია, როცა 20 წუთში ადამიანი ახერხებს გადაწვეტილების შეცვლას. ეს არ არის დემოკრატია. ეს ძალიან ცუდი ტრადიციაა. მიუხედავად ამისა, მინდა მივულოცო ბატონ მალხაზს და წარმატებები ვუსურვო, _ აღნიშნა საკრებულოს სხდომაზე ფრაქცია "ქართული ოცნება _ რესპუბლიკელების" თავმჯდომარემ გოჩა ჯიქიამ.
რაც შეეხება დანარჩენ კომისიებს _ სოციალურ საკითხთან კომისიას დავით შარაშიძე უხელმძღვანელებს; საფინანსო-საბიუჯეტო კომისიას _ მაია პაიჭაძე; სამანდატო-საპროცედურო კომისიას _ მარინა ბერაძე, ინფრასტრუქტურის კომისიას _ დავით გუდავაძე.
ჯერჯერობით, უცნობია, როდის შექმნიან დამოუკიდებელი დეპუტატები და ოპოზიციური პარტიები ფრაქციებს.
"ნაციონალური მოძრაობის" დეპუტატის, დიმიტრი კორიფაძის თქმით, ამ საკითხზე მუშაობენ და ფრაქციაც მალე შეიქმნება.
